16. Endi bitta

Xudoning butun aql bovar qilmas Buyukligini tasavvur etishga urinib ko‘r.

Albatta, bu imkonsiz! Shuning uchun ham u tasavvur qilib bo‘lmasdir. (Tabassum.) Ammo uning qanday va nimadan shakllanishini ko‘rish mumkin. Qara.

Bizning yakka ojizligimizni: qo‘rquvlarimizni, darmonsizligimizni, zaifligimizni, kasalliklarimizni, ruh qashshoqligini ongli ravishda boshdan kechirishimizning har bir lahzasida — Yagona Ongning narigi qutbida o‘zimizning, jamoaviy — Ilohiy Buyukligimiz: Oliy Kuch, Oliy Iroda, Oliy Aql (Hikmat), Oliy Muhabbat, Oliy Sharaf va Oliy Shon-sharaf hamda Ruhning butun boyligi yetilib kelardi.

Har safar, har qanday sharoitda, har qanday vaziyatda, hatto eng noqulaylarida ham (ayniqsa noqulaylarida), javobgarlikni boshqa hech kimga yuklamay, Sababni o‘zimizdan izlashni tanlaganimizda, biz o‘z izlanishimiz orqali ongimizning o‘z olamimiz bilan bo‘lgan ushbu sabab-oqibat aloqalarini yaratib, shu tariqa Oliy Hokimiyatni — o‘zini va olamni o‘z ijodi sifatida boshqarishda namoyon bo‘luvchi hokimiyatni, Yaratuvchi Hokimiyatini yetiltirib keldik.

Apokalipsisda (Yuhanno Ilohiyotchi Vahiysi) solihlar o‘z ibodatlarida tirilgan va osmonga ko‘tarilgan Masihga Xudo sifatida murojaat qilib: «O‘z Butun Kuching ila qachon kelishingni yana qancha kutishimiz kerak?» degan bir lavha bor. Va Xudo ularga javob beradi: «Sabr qiling, zero 144 ming solihlar sonidagi Xudoning To‘liqligi ro‘yobga chiqishi kerak».

Ular Masihning Ikkinchi Kelishi haqida gapirmoqdalar. Insoniyat o‘z avliyolari timsolida Ilohiy Kuch, Ilohiy Buyuklikning bu To‘liqligini o‘zida yetiltirib yuzaga chiqaradigan o‘sha lahza haqida.

Ammo Xudo zamondan tashqarida, Yagona Hozirda mavjuddir va Uning uchun, garchi kelajakda bo‘lsa-da, bu lahza — Ilohiy To‘liqlik lahzasi allaqachon yetib kelgan. Shuning uchun U biz bilan — bugundanoq, har doim — Ichki Muloqotda, Muqaddas Bitiklarning Tirik So‘zi, avliyolarning Vahiylari orqali so‘zlashib, bizga o‘zimizni boshqarishni o‘rgatib, sevishni o‘rgatib, u yerdan, kelajakdan Ilohiy xislatlar va iste’dodlarni uzatib, bizni xudolar etib yaratmoqda.

Endi esa tasavvur qiling, ushbu To‘liqlik lahzasi kelganda va Xudo O‘zini butun O‘z Buyukligi va Qudratida, xudolar va ma’budalarning Yagona Jamoaviy Tanasida namoyon etganda, nahotki U O‘z Ijodida to‘xtab qolsa? Nahotki Uning Ilohiy To‘liqligi to‘lib-boyishdan to‘xtasa?

Albatta, yo‘q! Ammo endi u ojizliklar va azob-uqubatlar orqali emas, balki ongli

jamoaviy ijod jarayonida — Muhabbatdan Muhabbatga, Quvonchdan Quvonchga, To‘liqlikdan To‘liqlikka yaratiladi. Endi Xudo xudolar Oilasi bilan o‘ralgan holda, Yagona Xudoga aylanib, O‘zida inson va Xudoni, quyini va yuqorini, o‘tmish va kelajakni, Erkaklik va Ayollikni, Ota va Onani birlashtirib, zulmat va nur qarama-qarshiligini Ilohiy Muhabbat Kamalagiga aylantirib — endi Yagona Xudo barcha xudolar bilan, barcha O‘z farzand-aka-uka-opa-singillari bilan hamkorlikda yangi olamlarni yaratadi, yakka holda emas, balki butun boshli sivilizatsiyalar bo‘lib, Ilohiy Ongning tobora yangi xislatlarini yetiltirib — Ilohiy Borliqning tobora yangi To‘liqligini bunyod etadi.

Va Xudoning barcha bu yangi xislatlari, Ilohiy Muhabbatning va Uning namoyon bo‘lish To‘liqligining barcha yangidan-yangi qirralari Yagona Ilohiy Hozirda Ruhning Yagona Zamonsiz Xazinasiga to‘planishda davom etmoqda. Chiziqli zamonda bu jarayon davom etadi. Yagona Hozirda esa butun Ilohiy To‘liqlik allaqachon ro‘yobga chiqqan va hamisha — azaldan va barcha zamonlar uchun — «hamisha, mudom va abadulabad» mavjuddir.

Shuning uchun barcha zamonlarda Xudoga qachondir yuzlangan barcha insonlar Yagona Hozirdan, Yagona Xudodan Uning butun Ilohiy Buyukligida Zamonsiz javob oladilar, ammo — o‘sha lahzadagi onglarining tayyorgarlik darajasiga muvofiq, o‘zlari tushunadigan tilda.

Mangu o‘zgaruvchan va Mangu O‘zgarmas bo‘lgan Xudo esa O‘zini yaratishda, har bir lahzada O‘zini yaratishda davom etadi

Yagona Hozirning har bir lahzasida. Xudo uchun Uning ustidan hukmronlik qiladigan o‘tmish yoki Uni bashoratlar bilan cheklovchi kelajak yo‘q, U hozirgi zamonda, Yagona Hozirning har bir lahzasida o‘tmishni ham, kelajakni ham qayta yaratadi.

«Qanday o‘ylab topsam, shunday bo‘lgan edi, — deydi Xudo. — Qanday tanlasak, shunday bo‘ladi». Yoki Qur’onda aytilganidek:

«Men oyat-belgilarni berurman va Men ularni xotiradan o‘chirib, o‘rniga yangilarini bergayman».

Bu ayni damda sen o‘qiyotgan matnga o‘xshaydi. Men istasam, hamisha “uning o‘tmishiga” qaytib, uni tuzatishim mumkin. Sen esa uni qayta o‘qib, o‘zing uchun unda yangi bir narsani kashf etasan. Ayni hozir esa — xuddi shu lahzada — “uning kelajagini” tuzatmoqdaman.

Shunday qilib, o‘tmishga ta’sir qilgan holda, “o‘zgarmas” Muqaddas Bitiklarning: Injil, Qur’on, Tavrot matnlari o‘zgaradi va to‘ldiriladi. Mana nima uchun Muqaddas Bitiklar — bu hamisha Tirik So‘zdir. Qayta-qayta o‘qi — va qayta-qayta ulardan yangi narsalarni topasan. Nafaqat sen o‘zgarasan, balki ulardagi So‘zning O‘zi ham Tirikdir.

Va albatta, bu nafaqat matnlarga, balki voqealar oqimining o‘ziga ham tegishlidir. Ayni damda senga o‘zingning jamoaviy o‘tmishing yangitdan ochilmoqda. Ma’lum bo‘lishicha, undagi barcha narsa, jumladan barcha kulfatlar, qo‘rquvlar, mahrumliklar, azob-uqubatlar va kechinmalar, barcha ojizliklar — barchasi mukammal bo‘lgan, zero

ulardan Sening, Inson, Eng Oliy Salohiyatingning Kuchi va Buyukligi yaratilayotgan edi. Ularda Jamoaviy Masih, Planetar Logos, Inson O‘g‘li yetilib kelardi — butun Insoniyat tomonidan yetiltirilgan O‘g‘il, toki bir kun kelajakda zohir bo‘lib, to‘plangan barcha Eng Oliy Salohiyatni bizga in’om sifatida, tuhfa etib — bizning shaxsiy xizmatlarimizga ko‘ra emas, Marhamat tufayli taqdim etsin. Bizni xudolar etish uchun. Va biz bilan birga Yangi Jamoaviy, Jamuljam To‘liqlikni — barcha avliyolarning butun Jamiyati bilan yaratishni boshlash uchun.

Shunday ekan, bilgin, Mening suyukli do‘stim! Mening xudoyim, birodarim, singlim! Mening suyukli bolam! Bu kelajak allaqachon yetib keldi. Muhabbatga Qo‘shilganing damidan boshlab, o‘zingning betakror insoniy shaklingda xudo-ma’buda bo‘lib tug‘ilganing damidan boshlab. Endi Biz birgalikda yaratmoqdamiz. Va garchi, ehtimol, sen Meni, Bizni hali shaxsan tanimasang-da, ammo Biz albatta tanishamiz. Buning uchun endi Bizda Butun Abadiyat bor. Butun Abadiyat Bizning ixtiyorimizda. Yagona Hozirlikning Abadiyati.

Hozircha esa — ichki muloqot. Xudo, Masih, Ota-Ona, Yagona Ruh bilan, Yagona Zamonsiz va Umumkonfessional Xudo bilan o‘z Ichki Muloqotingni yo‘lga qo‘y.

«Mendan Xudoning Shohligi qayerda va qachon kelishini so‘ramanglar, zero U ko‘zga tashlanadigan tarzda kelmas, va: u yerda yoki o‘sha paytda, deb aytilmas. Shunday ekan, bormanglar va izlamanglar. Zero mana: Xudoning Shohligi sizning ichingizdadir... Va g‘ayrat qiluvchilar Uni zabt eturlar» (o‘z ichida).