9. Birinchi namoz

Yo Rabbiy, Sen bormisan yo yo‘q, bilmayman, ammo Sening bo‘lishingni va vujudimda bo‘lishingni juda xohlayman, men juda istayman, Sening Ilohiy Marhamatingga, Sening Qudratingga, Sening Muhabbatingga, vujudimdagi Sening Irodang va Mustahkamligingga, vujudimdagi Har narsani Yenguvchi Ruhingga – Kuch, Muhabbat, Haqiqat, Birlik va Butunlik Ruhiga tashnoman! Men eski o‘zim bo‘lib emas, balki Yangi O‘zim, o‘zimning Eng Oliy Salohiyatim, vujudimdagi Xudo bo‘lgan Sen bilan yashashni istayman! Men buni xohlayman, bunga tashnoman, vujudimda namoyon bo‘l, Yo Rabbiy, Ota Xudo, Ona Xudo, Muqaddas Ruh Xudo! Va agar Sen bor bo‘lsang, Yo Rabbiy, agar Sen bor bo‘lsang, butun borlig‘ini Yagona Muhabbatga, Haqiqatga, Qudratga va Insonning Eng Oliy Salohiyati xazinasi bo‘lmish Ruhga bag‘ishlagan hamda o‘z imoni, o‘z orzu va intilishlari bilan Seni Inson O‘g‘lidek o‘zlarida ulg‘aytirgan barcha avliyolar so‘zlagan Zot, agar Sen bor bo‘lsang, Yo Rabbiy, meni O‘z Huzuring bilan to‘ldir, menga Hayot va Hayot Mazmuni bo‘lgan Haqiqatni ochib ber, toki nima uchun YASHASHIM kerakligini bilay!

Aks holda barchasi bekor, Yo Rabbiy, Sensiz hech narsaning ma’nosi yo‘q! Sensiz, bizdagi Sensiz, biz shunchaki tug‘ilamiz, azob chekamiz va o‘lamiz, shon-sharafsiz intihoga hamda har kungi bir xillik botqog‘ida, omon qolish uchun muqarrar mag‘lubiyat bilan tugovchi kurashda xoru zor bo‘lishga mahkum etilgan yangi qurbonlar sifatida bolalar dunyoga keltirib, ularni bu azob-uqubat fabrikasiga jo‘natamiz, Sensiz, Yo Rabbiy, hech narsaning ma’nosi yo‘q, ularga esa ma’no bordek tuyuladi –

pulda, hokimiyatda va muvaffaqiyatda – go‘yo yana ozgina, sal kattaroq xonadon, sal yaxshiroq mashina, sal dabdabaliroq kiyim, obro‘liroq hordiq va bolalar uchun ta’lim bo‘lsa – va ular baxtga erishadigandek – ammo bu unday emas! Ular, barchamiz, Sensiz baxtsizmiz, Yo Rabbiy, Sening Muhabbating bo‘lmasa, ichimizdagi Sening Ruhing huzuri bo‘lmasa, hech qanday tashqi narsaga bog‘liq bo‘lmagan Haqiqiy Kuch, Erkinlik va Quvonchsiz! Ichimizdagi Sening Huzuring bo‘lmasa, ichimizdagi Sening Ilohiy In’oming bo‘lmasa, biz gadomiz, garchi arzimas, xudbin yutuqlarimiz bilan kekkaysak-da, ammo bularning barchasi faqatgina o‘z tubanligimizning chuqur uyatidan, yalang‘ochligimizni yopish va oqibatda hamisha azob-uqubat va kulfatga aylanuvchi mayda lazzatlarda bir lahzaga o‘zimizni unutish uchundir!

Men bilmayman, Yo Rabbiy, Sen bormisan yo yo‘q, ammo hatto Sen bo‘lmasang ham, Yo Rabbiy, hatto mendan oldin, ayni shu lahzagacha Sen bo‘lmagan bo‘lsang ham, Sening bo‘lishingni ISTAYMAN! Men Sening bo‘lishing, menga, barchamizga namoyon bo‘lishing va bizga Bizning Eng Oliy Salohiyatimiz bo‘lib kirishing uchun – faqat Uning yo‘lida yashashga, ushbu Ma’no va ushbu Baxtni topish yo‘lidagi besamar urinishlarda son-sanoqsiz ma’nosiz hayotlar kechirib yashash va o‘lishga arziydigan Zot uchun o‘z hayotimni, o‘z imonimni, barcha orzularimni, barcha fikrlarimni va barcha hislarimni fido qilaman.

Men Sening bo‘lishingni, va Borsan va Bo‘lasan deb istayman, Yo Rabbiy, Xudoyim, mening Otam va mening Onam! Menga ochil, Yo Rabbiy! Senga qanday murojaat qilishni bilishim uchun O‘z nurli Ismingni ayt! Vujudimda Haqiqat bo‘l, vujudimda Muhabbat bo‘l, vujudimda Kuch bo‘l,

vujudimda Quvonch bo‘l, vujudimda Aql va Hikmat bo‘l, toki Sening Huzuring Marhamatini va Sen bilan Bizning Birligimizni vujudimda his etay – mangu! Chunki faqat shundaygina mangu yashash mumkin! Faqat shundaygina o‘limni yengish mumkin – Haqiqat, Muhabbat, Hayot Qudrati va vujudimdagi, barchamizdagi Ruhning Ilohiy Zamondan Tashqari Huzuri Marhamati bilan – barcha uyat, butun insoniy tubanlik, barcha nodonlik, barcha qo‘rquvlar va barcha o‘limlar, nihoyat, – ular orqali – vujudga kelgan Bizning Eng Oliy Salohiyatimiz – Buyuklik, Erkinlik, Kuch, Quvonch, Aql, Hikmat va Muhabbat bilan birlashgan Bizning Ilohiy Birligimiz ila! Qurbon va maxluq o‘zi yetishtirgan Yaratuvchi va Xudo bilan Yaratilish amalda tutashgan Birlik ila!

Faqat O‘zim uchun so‘ramayman, Yo Rabbiy, balki barchamiz uchun va barchamiz nomidan so‘rayman, Yo Rabbiy, BO‘L!

Shunday bo‘lsin, zero Men, Inson, Sening Yaratganingning Gultojiman, Yo Rabbiy! Va mening irodam, mening imonim va mening istaklarim – mening olamim uchun qonundir! Va shuning uchun – amalga oshdi.

Men O‘sha Men Bo‘lganman. Biz O‘sha Biz Bo‘lganmiz. Va Biz Birmiz. Biz Muhabbatmiz. Va Haqiqat, va Hayot. Va Bosib o‘tilgan Yo‘l. Va Boqiy bo‘lgan Yo‘l.

Endi esa men jim bo‘laman, Yo Rabbiy, toki qalbim va aqlim sukunatida SENING JAVOBINGNI, SENING ISMINGNI VA

HAQIQATNI eshitay. Zero butun qalbim, butun jonim va butun aqlim bilan faqat shuni istayman, Yo Rabbiy. Menga javob ber!

Chunki agar Sen bor bo‘lsang, Men ham Borman. Men Haqiqiyman.