1. Boshlanish

Mening sevikli do‘stim! Senga salom yo‘llayman. Men senga shartsiz Sevgi va Senga Ilohiy mavjudot sifatidagi Ishonch yuksakliklaridan murojaat qilmoqdaman. Senga O‘zingni Haqiqiy holingda eslashingga yordam berishni juda ham istayman. Seva oladigan, Kuchli, Ijodkor, Haqgo‘y, qo‘rquvlar, aybdorlik, gina-kudurat va g‘azabdan hamda uchlik (uch do‘zax) yaxshi ta’riflaydigan barcha «zararli odatlar»dan: azob chekish, qo‘rqish va sevmaslikdan ozod bo‘lgan holingda.

Senga yordam berishni istayman. Ammo sening yo‘lingni sening o‘rningga bosib o‘tolmayman. Shu sababli qarshingda oldindagi yo‘l xaritasining kichik bir xomaki chizgisi turibdi – toki sen manzilda mo‘ljal ola bilgaysan, ammo hozircha idrokingni tafsilotlar bilan toliqtirmagaysan. Vaqt keladi va u juda tez orada yetib keladi, o‘shanda sen o‘zing boshdan kechirgan ko‘plab qissalar va sarguzashtlardan iborat, shaxsan o‘zingga tanish bo‘lgan barcha yo‘l bosqichlari bilan o‘z shaxsiy xaritangni chiza olasan. Ha, sarguzashtlar. Negaki sen ayni damda butun koinotdagi eng ulug‘vor va eng hayajonli Sarguzasht-O‘yin ostonasida turibsan – dastlab begona va xavfli dunyoning asiriga aylangan holda, ozod bo‘lish huquqiga o‘z Ilohiy irodangni namoyon etish va o‘z koinotingning Anglangan Yaratuvchisiga aylanish arafasidasan.

Ushbu xomaki chizgini o‘qir ekansan, eng muhim narsalarning mag‘zini chaqishga, eng asosiy savollarga o‘zingga javob berishga harakat qil – qolgani o‘z-o‘zidan keladi. Agar senga biron narsa

tushunarsiz yoki bahsli tuyulsa, shunchaki buni o‘tkazib yubor, bunga keyinroq, butun manzara qarshingda to‘liq namoyon bo‘lganda va sen (ehtimol, bir necha bor) qayta o‘qib, ushbu masala bo‘yicha zarur oydinlik hamda o‘z shaxsiy qarashingni topganingda qaytasan. Men aslo sen uchun so‘nggi haqiqat bo‘lishga da’vo qilmayman, senga o‘z dunyoqarashimdan nimadir majburlab singdirish uchun sening erkin tanloving va irodangni haddan ziyod hurmat qilaman. Qolaversa, mening dunyo manzaramda har bir inson o‘z haqiqatida haqdir, undan to‘g‘riroq yoki chinroq haqiqat yo‘q, shunchaki har bir haqiqat o‘z tasdig‘i uchun kerakli dalillarni topib va tom ma’noda uni tasdiqlovchi faktlarni yaratib, o‘zining shaxsiy voqeligini, o‘zining shaxsiy dunyosini vujudga keltiradi. Masala sening haqiqating, sening dunyo manzarang qanchalik to‘g‘riligida emas, balki sening haqiqating seni qanchalik baxtli qilishidadir. Amaliyot – haqiqat mezonidir va mening amaliyotim shuni ko‘rsatadiki, mening haqiqatim kamida samaralidir – u meni va atrofimdagi insonlarni baxtli qildi, agar istasang, kun kelib sen ham ularning safiga qo‘shilasan.