19. Сүйүүнүн биригүүсү (Бирдиктин биригүүсү)

Мен Сага кайрылам, Бирдиктүү Өмүр Берүүчү Үчилтик: Ата-Кудай, Эне-Кудай, Ыйык Рух-Кудай менин ичимдеги, ар бирибиздин ичибиздеги.

Мен Сенден суранам, Ыйык Үчилтигим менин, менин ичимде Машаяктын Аң-сезимин, Сүйүүнүн Аң-сезимин, өз реалдуулугуна ээлик кылган, өз реалдуулугун, өз дүйнөсүн убакыттын ар бир көз ирмеминде Сүйүү менен, Сүйүүдөн жана Сүйүү үчүн аң-сезимдүү жаратып жаткан Жаратмандын Аң-сезимин толук кандуу ач.

Мага тартуулачы, Өмүр Берүүчү Үчилтигим менин, Сүйүүнү эң бийик ырахат катары сезип-жашоону. Денемдин ар бир клеткасын, жанымдын ар бир кылын, аң-сезимимдин ар бир нейронун мен буга чейин эч качан билбеген Кудайлык Ырайымдын, Бейиштин, эң жогорку даражадагы Кубанычтын ушул агымы менен толтур.

Менин акылымды, денемди жана жанымды Акыйкатты тең бөлүшүп сезүүгө ойгот – менин ичимде жана айланамда Сүйүүнү ар бир көз ирмемде арттырган, Өмүрдүн өзүн анын бардык көрүнүштөрүндө Сүйүүнүн шооласы катары өстүргөн Акыйкатка ойгот.

Менин жанымды Сүйүүнүн эң назик, жогорку термелүүдөгү жыштыктарына ойгот, менин Сүйүүнү агым катары кабылдоомду жана сезимдик жашоомду күчөт,

кубанычтын, ырахаттын, ырайымдын, суктануунун, салтанаттын, жан дүйнө титирөөсүнүн, канаттануунун, көккө көтөрүлүүсүнүн, дем-шыктын, өзгөрүп-жаңыруунун, айыгуунун жана Өмүр Майрамынын ушул түбөлүк жашоосунда менин жаныма жеткиликтүү болгон Сүйүүнүн дагы көптөгөн кырлары менен өңдөрүнүн агымы катары – ал Абсолюттук, Шартсыз жана Түбөлүктүү Сүйүү. Менин Табиятым болгон Сүйүү.

Денемди ичимдеги Сүйүүнү сезип-жашоону торогон бардык калдыктардан, булганычтардан жана бөтөн нерселерден тазала, денемди Ыйык Рух үчүн, Бирдиктүү Рухубуз үчүн, менин ичимдеги Күчтүн, Сүйүүнүн жана Аруулуктун Руху үчүн таза идиш кылып жарат.

Аң-сезимимдин Биримдигин жана Бүтүндүгүн алсыздык менен улуулуктун чачыранды уюлдарынан кайра калыбына келтирип, аларды Сүйүүнүн, Бакыттын, кызматташтыктын жана бирге жаратуунун бирдиктүү спектрине, бирдиктүү палитрасына бириктир.

Менин ичимде, баарыбыздын ичибизде бул Сүйүүнү айланадагыларга төгүүнүн жолу катары, башка адамдар, бирге жаратуучулар, жаныбарлар, өсүмдүктөр, Тирүү Планетанын өзү, жаңы цивилизациялар жана качандыр бир кезде болгон, бар болгон жана боло турган бардык өмүр формалары менен өз ара аракеттенүүнүн жолу катары материалдык дүйнөдө ачылган Кудайлык тартууларды, таланттарды ач.

Калыбына келтир, Өмүр берүүчү Үчилтигим менин, менин ичимдеги биримдикти жана менин ичимдеги жана тышымдагы бардык бар болгон нерселер менен бүтүндүктү.

Мени бардык нерседе жана ар дайым Себепти башка эч кимге жоопкерчиликти оодарбастан, Өзүмдөн гана көрүүгө жана кабыл алууга үйрөт.

Атам менин, Энем менин, Рухум менин, менин кайталангыс, өзгөчө адамдык формамда, адамдык жашоомдо ачылган Кудайдын, Ата-Кудайдын, Эне-Кудайдын, Рух-Кудайдын сүйүктүү перзенти болуу эмнени билдирерин эсиме салгыла.

Эсиме салчы, Жаратканым, мен Өмүрдүн эбегейсиз чоң лотереясында кереметтүү мүмкүнчүлүктү – Өзүм болуу мүмкүнчүлүгүн утуп алганымды!

Мага жеткиликтүү болгон, мен аркылуу ачылган жана бир гана мен тарабынан жашалышы мүмкүн болгон, Бирдиктүү Кудайдын, Бирдиктүү Өмүрдүн казынасын байыткан Сүйүүнүн ошол формасы так мен аркылуу денеленип, ошол Сүйүүнүн көрүнүшүн күтүп жатканын эсиме сал.

Жана бул Сүйүүнү мен өз эмгегим боюнча эмес, Сенин ырайымың жана Бирдиктүү Кудайдын мээрими менен, Бирдиктүү Өмүр Берүүчү Үчилтиктин мээрими менен алып жатканымды. Ошондуктан бул Сүйүү дагы да таттуураак. Ошондуктан бул Сүйүү Керемети мен тарабынан дагы да жаркыныраак сезилип-жашалат.

Мен бул Сүйүүгө татыктуу болуу үчүн менин жеке күч-аракетим жетишсиз экенин, эч качан жетиштүү болбогонун жана эч качан жетиштүү болбой турганын түшүнөм, бирок мен

өз ичимде Кудайдын Падышалыгын ачып, буга колумдан келишинче күч-аракет жумшайм.

Ичимдеги Кудай Сүйүүсүнүн бардык Эң Жогорку Дараметин – Атанын, Эненин, Бирдиктүү Рухтун ырайымы жана мээрими аркылуу толук кабыл алып, мени мыйзам ченемдүү жыйынтык катары өлүмгө жетелеген күнүмдүк иштердин ошол боз, мүрзө сымал көнүмүшүнөн Түбөлүк Өмүргө кереметтүү түрдө кайра жаралып. Ар бир көз ирмем кайталангыс болгон жана азыркыдан азыркыга, андан ары – бир гана азыр – Түбөлүк Азыркы созулган Өмүр Майрамына кереметтүү түрдө кайра жаралып!

Баарыбыздын Өмүрүбүздүн чыныгы маңызына – Сүйүүгө кереметтүү түрдө кайра жаралып.

Мен Сүйүүгө ачылам жана ырайым агымы менен аны бүт жүрөгүм, бүт жаным, бүт акылым, бүт денем, бүт эрким, бардык сезимдерим, жан дүйнөмдүн ар бир кылы менен кабыл алам.

Ыраазымын Сага, Атам менин, Энем менин, Рухум менин, мени дал азыр өзүмдүн кайталангыс адамдык формамда Кудай-Машаяк кылып, кайталангыс реалдуулугумда, баарыбыз бир бөлүгү болгон Бирдиктүү Өмүр Асан-Үсөнүндө Кудайдын Падышалыгына майланган кылып төрөп жатканыңыз үчүн. Анткени Биз Бир Бүтүнбүз. Биз Сүйүүбүз.

Бул Сүйүү үчүн ыраазымын. Даңк Сага, Кудайым!

Даңк Сага, Бирдиктүү Өмүр Берүүчү Үчилтигибиз биздин, Бирдиктүү Ата-Кудай, Бирдиктүү Эне-Кудай жана менин ичимдеги Ыйыктыктын, Бүтүн Акылмандыктын, Сүйүүнүн, Акыйкаттын жана Күчтүн Бирдиктүү Руху!

Даңк Сага, Ыйык Рух, Бирдиктүү Рух, дал азыр мени толтуруп, бардык коркууларды, тынчсызданууларды, санааларды сүрүп чыгарган, денемдин ар бир клеткасын, аң-сезимимдин ар бир нейронун, жанымдын ар бир кылын, ички ар бир кылымды Түбөлүк Өмүргө ойготкон Рух!

Даңк Сага, Бир тууганыбыз, Ыйса Машаяк! Даңк Сага, Эгебиз биздин!

Сүйүү жолун эң жогорку баалуулук катары, Рух Эркиндигин, Биримдикти, Бүтүндүктү тандап алган жана Себепти өзүнөн кабыл алган, ар бир көз ирмемде өз реалдуулугу үчүн жоопкерчилик тарткан жана Өмүрдүн эң жогорку чыныгы маңызы катары өзүн башкаруу, дүйнөнү башкаруу, дүйнөнү жаратуу жана ар бир көз ирмемде Сүйүүнү жаратуу өнөрүн өздөштүргөн баарыбызга даңк!

Оомийин. Ошондой болсун жана аткарылды. Сүйүүгө даңк!

Сүйүүнүн бул Табынуусун үн чыгарып айт, же ичиңден бир нече жолу окуп чык. Анткени БУЛ СЕН ЖӨНҮНДӨ, Менин жаш кудайым, Менин бир тууганым, Менин эжем-карындашым, Менин сүйүктүү досум.

13. Өз Бүтүндүгүңдү (Аруулугуңду) калыбына келтир. «Мен өз эркимди билдирем: Мен Рухтагы өз Бүтүндүгүмдү калыбына келтирем: мен өзүмдө Рух Кудайды жана Ата Кудайды жана Эне Кудайды жана Кудайдын Ыйык Баласын жана Өмүр Берүүчү Башатты кабыл алам. Мен эки ача аң-сезимдин уюлдарын – адамдын алсыздыгы менен Кудайдын Улуулугун, алсыздык менен Күчтү, бөлүнүүнү жана Биримдикти, күрөштү жана Макулдашууну, жалганды жана Акыйкатты, коркунучту жана Сүйүүнү, өлүмдү жана Өмүрдү Бирдиктүү Өмүр Асан-Үсөнүнө өзүм аркылуу бириктирем – адамдын Кудайдан бөлүнүшүндөгү түпкү күнөөнү айыктырып, байкуштуктун уятын жана аны жаап-жашырган кичинекей “мен”имдин менменсинген текебердигин коё берип, “мен”ден Бирдиктүү “Биз”ге кайра жаралам. Бардыгы Менин ичимде. Баары бар. Жана Биз Бирбиз. Биз Сүйүүбүз. Биз Өмүрбүз. Оомийин».

Көңүл бур! Сүйүүнүн Тирүү Технологиясынын ар бир кадамы өз алдынча көндүм болуп саналат, ал белгилүү бир кырдаалда – жалгыз өзү да – сени Сүйүү менен толтура алат!

Ошондуктан алардын баарын Жаңы Аң-сезимдин, Жаратмандын Аң-сезиминин көндүмдөрү катары өздөштүрүп, кырдаалга жараша Кудайлык Сүйүүнүн Чеберинин кеңири курал-жарагынан өз алдынча куралдар катары колдонуу мааниге ээ.

Кандайча? Каалап, буга өз эркин билдирүү керек. Андан кийин бардыгы ушул эрктин аткарылышы үчүн кандайча ачылып, курала баштаганына байкоо салуу керек.....

Түбөлүк Өмүр келди, эми аны кандай ЖАШАЙСЫҢ, өзүң чечесиң.