80. Abasa

1Yalidhihiri mabadiliko na mkunjiko katika uso wa Mtume, rehema ya Mwenyezi Mungu na amani zimshukie

2na akapa nyongo kwa sababu ya kwamba Abdallah bin Ummi Maktum alimjilia akitaka aelekezwe. Na alikuwa Mtume, rehema ya Mwenyezi Mungu na amani zimshukie, ameshughulika kuwalingania miamba wa Kikureshi katika Uislamu

3Ni kitu gani kinakufanya wewe ujue uhakika wa jambo lake? Kwani huenda ikawa, kwa kuuliza kwake, nafsi yake itatakasika na kusafika

4Au pengine apate mazingatio zaidi na kutishika

5Basi yule alijyejitosheleza na kutouhitajia uongozi wako

6wewe ndiye unayemjali na wapulikiza maneno yake

7Na ni kitu gani kinachokupa jukumu kwako iwapo hakusafika na ukafiri wake

8Ama yule ambaye amekuwa na pupa la kukutana na wewe

9na huku anamuogopa Mwenyezi Mungu asiwe na kasoro katika kupata uongofu

10wewe unampuuza. Ilivyotakikana ufanye si kama ulivyofanya, ewe Mtume

11Hakika Sura hii ni mawaidha kwako na kwa kila anayetaka kuwaidhika

12Basi atakaye atamkumbuka Mwenyezi Mungu na kumtaja na atafuata Wahyi Wake

13Wahyi huu, nao ni Qur’ani, uko katika kurasa zilizotukuzwa

14zenye kuheshimiwa, zenye cheo cha juu

15zilizosafishwa na uchafu, uongezaji na upunguzaji

16Zilizoko mikononi mwa Malaika waandishi, mabalozi kati ya Mwenyezi Mungu na viumbe Wake, wenye maumbile mema, tabia zao ni nzuri na njema na pia matendo yao

17Amelaaniwa mtu kafiri na ataadhibiwa. Ni uovu ulioje wa ukafiri wake kwa Mola wake

18Kwani hajui ni kwa kitu gani Mwenyezi Mungu Alimuumba kwacho mwanzo wake

19Mwenyezi Mungu Alimuumba kwa maji machache, nayo ni manii. Akayakadiria miongo yake

20Kisha Akambainishia njia ya kheri na ya shari

21Kisha humkosesha uhai, na Amemuekea mahali pa kuzikiwa

22Kisha Akitaka Mwenyezi Mungu, Aliyetakasika na sifa mbaya, Atamhuisha na kumfufua baada ya kifo chake, kwa ajili ya kuhesabiwa na kulipwa

23Mambo siyo kama yale anayoyasema kafiri na anayoyafanya. Bado hajatakeleza Aliyomuamrisha kwayo Mwenyezi Mungu katika kuamini na kutenda wema kwa kumtii

24Na azingatie binadamu, vipi Mwenyezi Mungu Amekiumba chakula chake ambacho ndicho kinachoendeleza maisha yake

25Aone kwamba Sisi Tumeyamimina maji ya mvua juu ya ardhi kwa wingi

26Kisha Tumeipasua ardhi kwa Tulivyo vitoa kutoka humo miongoni mwa mimea tofauti

27Tukaotesha humo nafaka

28na zabibu, na nyasi za wanyama.Na mizaituni na mitende

29Na mabustani yenye miti mikubwa

30Na matunda

31na ndisha

32Mnajistareheshea kwazo, nyinyi na wanyama wenu

33Utakapokuja Ukelele wa Siku ya Kiyama, ambao utayatia uziwi, kwa kitisho chake, masikizi

34Siku mtu atakapomkimbia, kwa kitisho cha Siku Hiyo, nduguye

35na babake na mamake na

36mkewe na wanawe

37Kila mmoja Siku Hiyo, atakuwa na jambo litakalomzuia asishughulike na mwingine

38Nyuso za wenye neema, Siku Hiyo, zitakuwa ni zenye kung’ara

39zenye furaha na nderemo

40Na nyuso za watu wa Motoni zitakuwa na giza

41nyeusi, zafinikwa na unyonge

42Hao wenye kusifika na sifa hiyo ndiwo wale waliozikufuru neema za Mwenyezi Mungu na wakazikanusha aya zake na wakayakeuka Aliyoyaharamisha kwa kutenda maovu na kukiuka mipaka