79. An-Naazi'aat

1Anaapa Mwenyezi Mungu kwa Malaika ambao huzing’oa roho za makafiri mng’oo mkali

2Na kwa Malaika ambao huzitukua roho za Waumini kwa uchangamfu na upole

3Na kwa Malaika wanaoogelea katika kushuka kwao kutoka mbinguni na kupaa kwao kwenda mbinguni

4Na kwa Mlaika ambao wanakimbilia kutekeleza amri za Mwenyezi Mungu

5Na kwa Malaika wanaopitisha amri za Mola wao katika mambo ya ulimwengu waliowakilishwa kuyafanya na kuyasimamia, - Wala haifai kwa kiumbe kukiapia chochote kile, bali yapasa kiapo chake kiwe ni kwa jina la Mola wake Muumba au sifa Zake. Na lau ataapa kwa asiye Muumba wake, basi huyo amekuwa mshirikina - Watafufuliwa viumbe bila shaka na watahesabiwa

6Siku ambayo ardhi itatetemeka kwa mvuvuo wa kwanza

7mvuvio wa kufisha, ukifuatiwa na mvuvio mwingine wa kuhuisha

8Nyoyo za makafiri, Siku hiyo, zitakuwa na papatiko kwa kicho kikubwa

9Macho ya makafiri hao yatakuwa madhalilifu kwa kitisho watakachokiona

10Wanasema hawa wakanushao kufufuliwa

11«Je, tutarudishwa baada ya kufa kwetu kwenye yale tuliyokuwa nayo katika ardhi? Je, tutarudishwa na hali tushakuwa mifupa iliochakaa?»

12Wakasema: «Kurejea kwetu huko kutakuwa kutupu kusikokuwa kweli.’

13Hakika tukio hilo litakuwa kwa mvivio mmoja tu

14Wakitahamaki wao wako hai juu ya ardhi baada ya kuwa walikuwa ndani yake

15Je imekujilia, ewe Mtume, habari ya Mūsā

16Pindi Mola wake Alipomwita katika bonde lililotakaswa na kubarikiwa, la Ṭuwā. Akamwambia

17«Enda kwa Firauni. Hakika yeye amekiuka mno katika kuasi

18Ukamwambie, ‘Je, unapendelea kuitakasa nafsi yako na upungufu na kuipamba na imani

19Na nikuelekeze njia ya kumtii Mola wako, upate kumcha na kumuogopa?’»

20Mūsā alimuonyesha Firauni alama kubwa: fimbo na mkono

21Hapo Firauni alimkanusha Nabii wa Mwenyezi Mungu , naye ni Mtume Mūsā, amani imshukie, na alimuasi Mola wake Aliyetukuka

22Kisha alikengeuka hali ya kuipa mgongo Imani na kufanya bidii katika kumpinga Mūsā

23Hapo aliwakusanya raia wa utawala wake na akawaita kwa

24kuwaambia,»Mimi ndiye mola wenu ambaye hakuna mola mwengine aliye juu yake.»

25Hapo Mwenyezi Mungu Alimtesa kwa adhabu ya duniani na ya Akhera

26Na Akaifanya adhabu hiyo iwe ni mazingatio na ni onyo kwa watu mfano wake kati ya wale waasi. Hakika Firauni na kile kilichompata cha adhabu ni mawaidha kwa mwenye kuwaidhika na kutishika

27Je, kufufuliwa kwenu, enyi watu, baada ya kufa ni kugumu zaidi, katika vipimo vyenu, au ni kuumbwa kwa mbingu

28Amezipanga juu yenu kama jengo. Na Ameinua sakafu yake angani, haina tofauti wala nyufa

29Na Ameutia giza usiku wake kwa kutwa kwa jua lake. Na Ameweka wazi mchana wake kwa kuchomoza kwake

30Na ardhi baada ya kuumba mbingu Ameitandaza. Na Ameweka humo manufaa yake

31Na Ametumbua humo chemchemu za maji. Na Ameotesha humo mimea inayolishwa

32Na Ameyakita humo majabali yakiwa ni vigingi vyake. Ameumba, Aliyetakasika na kila upungufu

33neema zote hizi zikiwa ni manufaa kwenu na kwa wanyama wenu. (Hakika kurudisha kuumbwa kwenu, Siku ya Kiyama, ni sahali kwa Mwenyezi Mungu kushinda kuumba viumbe hivyo vyingine. Na vyote hivyo, kwa Mwenyezi Mungu, ni rahisi na ni vipesi)

34Pindi kitakapokuja Kiyama Kikubwa na balaa nzito, nao ni Mvuvio wa pili. Kipindi hicho zitaoneshwa kwa binadamu vitendo vyake vyote, za kheri na za shari

35Hapo atazikumbuka na kuzitambua

36Na utaoneshwa Moto wa Jahanamu kwa kila aonaye, uwe waonekana waziwazi

37Ama yule atakayekiuka amri ya Mwenyezi Mungu

38na akapendelea maisha ya ulimwenguni kuliko ya Akhera

39basi kwa kweli marejeo yake ni Motoni

40Na ama yule atakayeogopa kusimama mbele ya Mwenyezi Mungu kuhesabiwa na akaikanya nafsi yake na matamanio mapotofu

41basi Peponi ndiko makazi yake

42Wanakuuliza washirikina, ewe Mtume, kwa madharau, kuhusu wakati wa kuanzia Kiyama unachowaonya

43Wewe huna kamwe ujuzi nacho

44Bali mambo ya ujuzi huo yarejeshwe kwa Mwenyezi Mungu, Mwenye Sifa Tukufu

45Wewe linalokuhusu katika habari zake ni kumuonya nacho yule anayekiogopa

46Kama kwamba wao siku watakapouona Kiyama kimesimama, watakuwa hawakukaa katika maisha yao ya duniani, kwa vituko vya hiko Kiyama, isipokuwa ni kama kwamba wamkaa kati ya adhuhuri mpaka kutwa juwa, au ni kama kati ya kuchomoza jua mpaka nusu ya mchana