71. Nuux

1Hubaal Waxaanu u soo dirnay Nuux dadkiisii (Annagoo leh): U dig dadkaaga inta aysan u iman cadaab xanuun badan

2Wuxuu yidhi: Dadkaygiiyow! Hubaal waxaan anigu idiin ahay dige cad

3Inaad caabudddaan Allaah, oo aad dhowrtaan (xilka uu idin saaray), oo anigana i adeeca

4Wuxuu idiin dhaafi wax ka mid ah dambiyadiinna, oo idiin dib dhigi ilaa muddo magacaaban. hubaal, muddada Alle gooyey marka ay timaaddo lama dib dhigo, waase haddii aad og tihiin

5Wuxuu yidhi: Rabbiyow! Hubaal waxaan anigu ugu baaqay (Towxiidka) dadkeygii habeen iyo maalinba

6Ha yeeshee baaqeygu uma uusan kordhin waxaan aheyn didmo

7Oo mar kastoo aan u baaqo si aad ugu dambi dhaafto, waxay dhex geliyaan farahooda dhegahooda2, oo isku dadaan maryahooda, oo madax adaygaan oo waxaa ka buuxsama kibir iyo san taag

8Haddana hubaal waxaan ugu baaqay (Towxiidka) si cod kore ah

9Haddana hubaal waxaan ula hadlay iyaga si guud , oo waxaan ula hadlay iyaga si gaar ah (sir iyo saaqba)

10Markaas waxaan idhi: Ka barya dambi dhaaf Rabbigiin; hubaal waa Dambi Dhaaf Badane’e

11Wuxuu u soo diri doonaa dushiinna daruur idiin shubeysa roob darar ah

12Oo idinku deeqi maal iyo awlaad, oo idiin yeeli beero, oo idiin yeeli webiyaal

13Maxaa idinku dhacay aydaan uga cabsoon Weynida Ilaahay

14Oo dhab ahaan wuxuu idin abuuray idinkoo soo maray heerar (kala duwan)

15Mawaydan arag sida Allaah u abuuray toddobada samo ee kala korreeya

16Oo yeelay dayaxa dhexdiis nuur, oo ka yeelay qorraxda nal

17Oo Allaah Wuxuu idinka soo bixiyey dhulka bixitaan

18Markaas idinku celin gudahiisa oo idinka soo bixin baxsiis (Cusub)

19Oo Allaah Wuxuu idiinka yeelay dhulka gogol fidsan

20Si aad ugu socotaan dhexdiisa waddooyin waasic ah

21Nuux wuxuu yidhi: Rabbiyow! Hubaal waa ii caasiyeen, oo raaceen mid isagu maalkiisu iyo awlaaddiisu aysan u kordhin waxaan aheyn khasaaro

22Oo waxay qooleen shirqool aad u weyn

23Oo waxay yidhaahdeen: Sinnaba ha uga tegina ilaahyadiinna, hana ka tegina Wadd ama Suwaac ama Yaquus iyo Yacuuq iyo Nasar

24Oo xaqiiq waxay lumiyeen in badan, oo ha u kordhin gar ma qaatayaasha waxaan aheyn habow

25Gefafkoodii dartood baa loo qarqiyey, markaas laga yeelay inay galaan Naar, marka ma helin cid u soo gargaarta Allaah sokadi

26Oo Nuux wuxuu yidhi: Rabbiyow! Ha kaga tegin dhulka korkiisa axad deggan oo ka mid ah gaalada

27Waayo hubaal haddii aad deyso iyaga, waxay dhumin addoomahaaga, oo ma dhali doonaan waxaan aheyn faajir, abaal dhac badan

28Rabbiyow! Ii Dambi dhaaf aniga, iyo waalidkeyba iyo qofkii soo gala gurigeyga isagoo mu’min ah, iyo mu’miniinta iyo mu’minooyinka. Oo ha u kordhin daalimiinta (mushrikiinta, gaalada, iwm,) waxaan aheyn burbur iyo baabba’a