70. Al-Ma'aarij

1Wani mai tambaya yã yi tambaya game da azãba, mai aukuwa

2Ga kãfirai, bã ta da mai tunkuɗẽwa

3Daga Allah Mai matãkala

4Malã'iku da Ruhi (Jibrila) sunã tãkãwa zuwa gare Shi, a cikin yini wanda gwargwadonsa, shẽkara dubu hamsin ne

5Sabõda haka, ka yi haƙuri, haƙuri mai kyãwo

6Lalle ne su, sunã ganin ta mai nĩsa

7Kuma Mu, Muna ganin ta a kusa

8Rãnar da sama zã ta kasance kamar narkakkar azurfa

9Kuma duwãtsu su zama kamar saɓin sũfi

10Kuma abõki bã ya tambayar inda wani abõki yake

11Ana sanya su, su gajũna, mai laifi na gũrin dã zai iya yin fansa, daga azãbar rãnar nan, da ɗiyansa

12Da matarsa da ɗan'uwansa

13Da danginsa, mãsu tattarã shi

14Da wanda ke a cikin dũniya duka gabã ɗaya, sa'an nan fansar, ta tsĩrar da shi

15A'aha! Lalle ne fa, ita ce Lazã

16Mai twãle fãtar goshi

17Tanã kiran wanda ya jũya bãya (daga addini) kuma ya kau da kai

18Ya tãra (dũkiya), kuma ya sanya ta a cikin jaka

19Lalle ne mutum an halitta shi mai ciwon kwaɗayi

20Idan sharri ya shãfe shi, ya kãsa haƙuri

21Kuma idan alhẽri ya shãfe shi, ya yi rõwa

22Sai mãsu yin salla

23Waɗanda suke, a kan sallarsu, su, mãsu dawwama ne

24Kuma waɗanda a cikin dũkiyarsu, akwai wani haƙƙi sananne

25Ga (matalauci) mai rõƙo da wanda aka hanã wa roƙon

26Da waɗannan da ke gaskata rãnar sakamako

27Da waɗannan sabõda azãbar Ubangijinsu, suna jin tsõro

28Lalle ne, azãbar Ubangijinsu bã wadda ake iya amincẽwaba ce

29Da waɗanda suke, ga farjojinsu, mãsu tsarewa ne

30Sai fa a kan matan aurensu da abin da hannayensu na dãma suka mallaka. To lalle ne sũkam ba waɗanda ake zargi ba ne

31To, duk wanda ya nẽmi abin da yake a bayan wannan, to, waɗancan sũ ne mãsu ƙetare iyãka

32Kuma da waɗannan da suke ga amãnõninsu da alkawarinsu mãsu tsarẽwa ne

33Kuma da waɗanda suke, ga shaidarsu, mãsu dãgẽwa ne

34Kuma waɗanda suke, a kan sallarsu, mãsu tsarẽwa ne

35Waɗannan, a cikin gidãjen Aljanna, waɗanda ake girmamãwa ne

36Mẽ yã sãmi waɗanda suka kãfirta, a wajenka, sunã gaugãwar (gudu)

37Daga jihar dãma, kuma daga jihar hagu, jama'a-jama'a

38Shin kõwane mutum daga cikinsu yana nẽman a shigar da shi a Aljannar ni'ima ne (ba da wani aiki ba)

39A'aha! Lalle Mũ, Mun halitta su, daga abin da suka sani

40Sabõda haka ba sai Na yi rantsuwa da Ubangijin wurãren ɓullõwar rãna da wurãren fãɗuwarta ba, lalle Mũ, Mãsu iyãwa ne

41Ga Mu musanya waɗanda suke mafi alhẽri, daga gare su. Kuma ba Mu kasance waɗanda ake rinjãya ba

42Sabõda haka ka bar su, su dulmuya, kuma su yi wãsã, har su haɗu da rãnarsu wadda ake yi musu alkawari (da ita)

43Rãnar da suke fitowa daga kaburbura da gaugãwa, kamar sũ, zuwa ga wata kafaffiyar (tuta), suke yin gaugãwa

44Maƙaskanta ga idanunsu, wani walakanci yana rufe su. wannan shi ne yinin da suka kasance ana yi musa alkawari (a kansa)