56. Al-Waaqia

1Marka ay dhacdada weyni dhacdo

2Ma jiro wax beeninayaa dhiciddeeda

3Hoos u dhigeysaa (qolo) kor u qaadeysaa (qolo kale)

4Marka dhulka la gilgilo gilgilid daran

5Oo buuraha la ridqo ridqin daran

6Markaas waxay ahaan sida boor firdhisan

7Oo waxaad ahaan saddex nooc

8Ma kuwa ah Gacanta Midig, maxay farxad u ahaatay kuwa ah Gacanta Midig

9Kuwase ah Gacanta Bidix, xumaa kuwa ah Gacanta Bidix

10oo kuwa hor maray iyagaa horreyn

11Kuwakan weeye kuwa loo soo dhoweyn Ilaahay

12Beero barwaaqo ah gudahood

13Waa rac ka mid ah kuwii hore

14Iyo in yar oo ka mid ah kuwii dambe

15Sariiro korkooda dahab lagu qurxiyey

16Iyagoo ku jiqleysan korkeeda, oo fool ka fool is qaabilaya

17Waxaa u adeegi wiilal waaraya aanay da’ doorin, kuwaa oo kula wareegi doono

18Koobab iyo kirliyo iyo galaas sharaab macaan oo daahir ah

19Oo aanu marnaba madaxu ku wareerin oo aanay ku maan guurin

20Iyo midho; waxay doortaan ah

21Iyo hilib shimbiro kay rabaanba

22Oo (u wehelin doonaan) xuurul cayn

23La moodo luul la dhowray

24Waa abaalgud waxay camalsan fali jireen

25Kuma maqli doonaan halkaa hadal macno darro ah iyo dambaabid midna

26Waxaan ahayn odhaahda nabad nabad

27Kuwa ah Gacanta Midig, maxay farxad u ahaatay kuwa ah Gacanta Midig

28(Waxay dhex ahaan) geedo gob aan qodax lahayn

29Iyo geedo Muus ah miro karooran

30Iyo har fidsan

31Iyo biyo u socda joogto

32Iyo midho tiro badan

33Marnaba aan go’eyn, mamnuucna ahayn

34Iyo sariiro (boqoreed) la kor yeelay

35Waxaan Annagu ka yeelay inay soo baxaan iyaga (haweenkii adduunka ee Jannada galay) soo bixid gaar ah

36Markaasaan waxaan ka dhignay bikrooyin ugub ah

37Gacalooyin, isku wada da’ ah

38Oo ay leeyihiin kuwa ah Gacanta Midig

39Kuwo badan oo ka mid ah waa horraankii kal hore (soo galay Islaamka)

40Kuwo badan oo ka mid ahna kuwii kal dambe (soo galay Islaamka)

41Kuwa ah Gacanta Bidix _xumaa kuwaa ah Gacanta Bidix

42Waxay dhex ahaan hanfi kulul iyo biyo karkaraya

43Iyo hoos qiiq badan

44Aan laheyn qabow iyo daryeel midna

45Hubaal waxay ahaayeen taa horteed, kuwo loo raaxeeyey

46Oo waxay ku adkeysan jireen Dambiga aad iyo aadka u weyn (shirkiga)

47Oo waxay odhan jireen: Ma markaan dhimanno oo noqonno ciid iyo lafo, miyaa xaqiiq nala soo nooleyn doonaa

48Oo sidoo kale miyaa aabbayaashayadii hore (la soo nooleyn)

49Dheh, kuwii hore iyo kuwa dambaba

50Waxaa hubaal loo soo kulmin doonaa wada jir waqti Maalin la yaqaan

51Markaas idinka kuwiinan habowsanayaasha ahow, ee beeniyow

52Waxaad hubaal wax ka cuni doontaan geed xun oo Zaqquum ah

53Oo ka buuxin doontaan caloolihiinna

54Markaas ku cabbi doontaan biyo kulul oo karkaraya

55Oo u cabbi doontaan sida cabbidda geel asqoobay

56Kani waa waxa lagu soori doona iyaga Maalinta Abaal marinta

57Annagaa idin abuurnay, ee maxaad la rumeyn weydeen

58Ma u fiirsateen minada idinka timaada

59Ma idinkaa abuuray mise waa Annaga Abuurayaasha

60Annagaa idiin qaddarnay dhimashada dhexdiinna, oo ma nihin kuwo laga baxsan karo

61Si aan u keenno halkiinna kuwa idinla mid ah oo aan idiin soo bixinno (qaabab iyo suurado) aydaan garaneyn

62Oo waxaad dhab ahaan og tihiin soo bixitaankii hore, ee maxaad haddaba u garowsan weydeen

63Ma u fiirsateen waxa aad beertaan

64Ma idinkaa sababa inay soo baxaan, mise waa Annaga Kuwa soo Bixiya

65Haddii aan Doonno, waxaan ka dhigi karnaa xaabo engagan, oo waxaad noqoneysaan kuwo murugo iyo ciil qaba

66(idinkoo leh): dhab ahaan Waxaynu nahay kuwo la culaabeysan deyn

67Mayee, waxaynu nahay kuwa la seejiyey (midhahii)

68Ma u fiirsateen biyaha aad cabtaan

69Ma idinkaa kuwa ka soo dajiya daruuraha, mise Annaga weeye kuwa soo dejiya

70Haddii aan doonno, Waxaan ka dhigi lahayn jaan dhanaan oo milix ah, ee maxaad haddaba u shurki naqi weydeen

71Ma u fiirsateen dabka aad madagta ka shiddaan

72Ma idinka baa kuwa u soo saara geedaha, mise Annaga weeye soo saarayaasha

73Innaga baa waxaynu ka dhignay waano; iyo wax ay ku intifaacaan kuwa ku safra saxraha (iyo qeyrkoodba)

74Ee xurmee Magaca Rabbigaa, Weynaha

75Mayee Waxaan ku dhaartay halkay xiddiguhu ku dhacaan

76Oo xaqiiq, waa dhaar dhabtii and u weyn, haddii aad ogaan lahaydeen

77Hubaal waa Qur'aan Sharaf Badan

78Ku yaal Kitaab aad la dhowray

79Cidina taaban kuwa la daahiriyey mooyee

80Ah soo waxyoodka Rabbiga uunanka

81Ee ma warkan baad haddaba u qaadataan wax fudud aan qiimo lahayn

82oo ka yeeshaan risiqiinna inaad ka been sheegtaan

83Ee maxaydaan haddaba marka ay (naftu) dhuunta soo gaadho

84Oo idinku markaas aad eegaysaan

85Oo Annagu aan idiinka dhow nahay, laakiinse aydaan arkaynin

86Ee Maxaydaan haddaba haddii aad tihiin kuwo aan xil qabanayn

87Ugu soo celin (weydeen) nafta (jirkeedii) haddii aad run sheegeysaan

88Haddaba haddii uu ka mid yahay kuwa loo soo dhoweeyo (Allaah)

89Markaas waa farax, iyo risiq, iyo Beer barwaaqo ah

90Oo haddii uu ka mid yahay kuwa ah gacanta midig

91Nabad baa kaaga sugnaatay xagga kuwa ah gacanta midig

92Haddiise uu ka mid yahay kuwa (Xaqa) diida , habowsanaaysaha ah

93Waxaa lagu sooryeen biyo kulul oo karaya

94Iyo ku gubasho Dabka

95Hubaal, arrinkani waa run la hubo

96Ee xurmee Magaca Rabbigaa,Weynaha