52. At-Tur

1Demi gunung Thur

2Demi Kitab Qur'an kang tinulis

3Ana ing papan kang gumelar

4Demi "Baitul Makmur" (Omah kang dimulyakake)

5Demi payon kang dhuwur (langit)

6Demi segara kang banyune agung

7Siksaning Allah Pangeranira kelakon temenan

8Siksa mau ora ana kang bisa nulak

9Kelakone besuk dina qiyamat nalika langit obah lan mubeng

10Lan gunung - gunung padha mlaku

11Ing dina iku siksa kang abot dadi patrapane wong kang padha maido (Rasul)

12Kang padha ketungkul nglakoni barang kang luput

13Hiya iku nalikane wong kafir padha dijorokake marang neraka jahannam

14Sarta didhawuhi, iki neraka kang padha sira paido biyen

15Apa iki sihir, apa pandelengira rusak dadi ora weruh

16Padha rasakna piye rasane sira bantah panase utawa ora, iku padha wae, kang dipatrapi siksa neraka iku kaluputan kang wis sira lakoni biyen

17Para wong kang padha bekti ing Allah padha ana suwarga panggonan kapenak

18Padha enak - enak nampani ganjaran paringe Pangeran sarta direksa ora kecemplung neraka jahannam

19Padha tampa dhawuh padha mangana lan ngombea, kelawan enak ana suwarga ganjarane penggawe becik kang wis sira lakoni biyen

20Wong ing suwarga padha linggih sendhen ing kursi kang ditata jejer - jejer, lan padha Ingsun dhawuhake widadari kang mripate blalak - blalak

21Wong - wong kang percaya ing Allah kang anake ngatur melu manut percaya anak mau Ingsun helokake bapakne, diganjar padha ganjarane Bapa tanpa disuda sethitik - sethitika. Saben manungsa iku gandhenge karo ngamal sing ditindakake

22Wong ing suwarga padha Ingsun paringi tambahan woh - wohan lan daging kang dipingini

23Ana ing suwarga dheweke padha rebutan gelas kang isine tanpa agawe mendem lan ora dadi pasulayan apa dene anggone ngombe ora duraka

24Lan padha ngubengi sacedhake dheweke punakawane kang rupane bagus - bagus kaya mutiara kang isih ana ing congkoke

25Padha hadhep - hadhepan takon - tinakon karo kancane

26Pangucape, "Kala rumiyen kula nalika wonten ing tengah - tengahing keluarga ajrih sanget dhateng siksaning Allah

27Allah lajeng paring pitulung dhateng kula, dipun reksa biten mlebet neraka

28Sayektosipun rumiyen kula bektos ing Allah, sayektosipun Allah punika damel sahe tur Maha Asih

29Sira ditaberi nyurup - nyurupake (nerangake). Sira dudu guru pagorohan lan dudu wong edan, nanging diparingi kabungahan ing Pangeranira

30Wong mangro tingal malah padha kondha, "(Muhammad) iku pinter nganggit tembang, Hiya tak entenane horeging jagad kang wecana

31Dhawuha, "Hiya padha ngentenana, aku uga ngenteni karo kowe

32Wong mangro tingal anggone kondha mangkono mau, thukul saka akale kang nasar, utawa saka kebangeten anggone dhemen padu

33Dheweke (wong mangro tingal) malah padha kandha, "Dheweke (Muhammad) iku anggone gawe - gawe". Satemene wong mangro tingal mau ora padha iman

34Manawa pangucape temen padha gawea Kitab kang madhani al-Quran (terange lan bergase)

35Ana wong mangro tingal iku padha digawe nanging ora ana kang gawe, utawa dheweke iku gawe awake dhewe

36Utawa dheweke padha gawe bumi lan langit? Sejatine dheweke ora ngandel (kang kandhakake dhewe)

37Utawa dheweke mau nyekel gedhong pasimpene Pangeranira utawa dheweke kang kuasa

38Apa dheweke duwe ondho (nyang langit) kanggo ngrungokake guneme malaikat ana ing andha mau. Yen mangkono, iya wong kang ngrungokake mau nganakna tandha yekti kang cetha

39Apa nyata Allah peputra putri, lan kowe (kang mangro tingal) padha manak lanang

40Apa anggonira ngondhangake perintah Ku, kango jaluk pituwas marang dheweke, nganti dheweke padha abot anggone nganakake pituwas

41Apa dheweke padha kadunungan kaweruh ghoib, weruh samu barang kang samar banjur padha ditulisi (kena dianggo madoni Muhammad)

42Apa dheweke neja maheka marang Sira, pahekane malah bakal balik marang si kafir kabeh

43Apa dheweke mau ngaku duwe Pangeran liyane Allah. Allah iku maha suci , adoh banget yen kaya panemune wong mangro tingal

44Manawa wong kafir mau padha deleng gempalaning langit runtuh, padha ngucap, "iki mega kang tumpuk - tumpuk

45Padha tokna wae nganti tekan dina anggone padha mati

46Yaiku dina kang ora ana gunane pahekane si kafir marang awake sethithik - thithika lan ora ana kang bisa nulungi marang dheweke

47Lan satemene kanggo wong kang nganiaya ana siksa sak durunge mati. Ananging kang akeh ora padha weruh

48Lan padha sabara narima pranataning Pangeranira awit sira tansah Ingsun huningani lan sira nyebuta, "Maha suci" lan memuji ing Pangeranira nalikane sira ngadeg (arep sholat)

49Lan ing wayah wengi apadene ing wayah surupe lintang (waktu fajar) sira hiya nyebuta "Maha Suci" ing Allah