51. Adh-Dhaariyat

1By diegene wat wyd en syd verstrooi

2En hulle wat die laste dra

3En diegene wat maklik voortgaan

4En by die deelgenote aan die Saak

5Wat julle belowe word, is sekerlik waar

6en die Oordeel sal waarlik geskied

7By die hemel vol van paaie

8waarlik, julle verskil van mening

9Hy wat hom wou wegdraai, word daarmee van die ware geloof verlei

10Vervloek is die leuenaars

11wat op die bodemlose diepte nie ag slaan nie

12Hulle vra: Wanneer sal die Dag van Oordeel wees

13Dit sal die Dag wees wanneer hulle in die Vuur beproef sal word

14Daar sal gesê word: Smaak nou julle vervolging! Dít is wat julle wou verhaas

15Maar die godvresendes sal te midde van Tuine en fonteine wees

16en daaruit neem wat hulle Heer aan hulle gee. Vóór dit was hulle sekerlik onder die weldoeners

17Gedurende die nag het hulle weinig geslaap

18En in die môre het hulle om Goddelike beskerming gesmeek

19En van hulle rykdom was daar ’n billike aandeel vir die bedelaar en vir diegene wat te skaam is om te bedel

20En op die aarde is daar tekens vir diegene wat sekerheid van geloof het

21en ook in julleself. Kan julle dan nie sien nie

22En in die hemele is julle onderhoud, en ook dít wat aan julle beloof is

23By die Heer van die hemele en die aarde dan! ~ dit is inderdaad die waarheid wat julle praat

24Het julle die verhaal van Abraham se geëerde gaste gehoor

25Hoe hulle na hom gekom het, en gesê het: Vrede! Vrede! ~ toe het hy geantwoord: Vreemdelinge

26Hy het weggedraai na sy gesin, en toe ’n vet kalf gebring

27Dit het hy voor hulle neergesit, en gesê: Wil julle nie eet nie

28Daarop het hy hulle begin vrees. Hulle het gesê: Moenie vrees nie. En hulle het hom die blye tyding van ’n wyse seun gebring

29Toe het sy vrou gekom en, in verbystering, het sy haar gesig geslaan en gesê: ’n Onvrugbare, bejaarde vrou

30Hulle het gesê: U Heer sê so. Voorwaar, Hy is die Allerwyse, die Alleswetende

31Abraham het gesê: Wat is julle opdrag, o boodskappers

32Hulle het geantwoord: Ons is na ’n misdadige volk gestuur

33sodat ons kleiklonte op hulle kan neerwerp

34wat deur u Heer vir die oortreders bestem is

35Die gelowiges wat daar was, het Ons toe laat weggaan

36En Ons het maar ’n enkele huis van Moesliems daar gevind

37En Ons het ’n teken daarin gelaat vir diegene wat die pynlike straf vrees

38En in Moses, toe Ons hom na Farao met ’n duidelike gesag gestuur het

39Maar hy was afkerig vanweë sy mag, en het gesê: ’n Towenaar, of ’n kranksinnige

40Daarom het Ons hom en sy skare gegryp en hulle in die see gewerp, omdat hy skuldig was

41En in Aad, toe Ons ’n vernielende orkaan teen hulle uitgestuur het

42Dit het niks gespaar waarmee dit in aanraking gekom het nie, en dit het van alles as gemaak

43En in Thamoed, toe aan hulle gesê is: Vermaak julle vir tyd en wyl

44Maar hulle het die gebod van hulle Heer oortree, daarom het die donderstraal straf hulle agterhaal, terwyl hulle dit aanskou het

45daarom was hulle nie in staat om op te staan nie, nóg kon hulle hul verdedig

46en die volk van Noag: Voorwaar, hulle was ’n onheilstigtende volk

47En die hemel, dié het Ons deur Ons mag opgestel, en Ons is waarlik die Makers van die uitgestrektheid

48En die aarde, dié het Ons uitgesprei. Hoe uitmuntend het Ons dit gemaak

49En van elke ding het Ons pare geskape, sodat julle kan onthou

50Haas julle dan na Allah. Waarlik, ek is vir julle ’n duidelike waarskuwer van Hom

51En moenie ’n ander god naas Allah opstel nie. Waarlik, ek is vir julle ’n duidelike waarskuwer van Hom

52En nooit het daar ’n boodskapper tot diegene vóór hulle gekom nie, of hulle het gesê: ’n Towenaar, of ’n kranksinnige

53Het hulle mekaar hiertoe aangespoor? Nee, hulle was verslae oortreders

54Draai daarom weg van hulle af, want u is sonder blaam

55En vemaan, want die vermaning sal die gelowiges bevoordeel

56En Ek het die djien en die mense om geen ander rede geskape nie, as dat hulle My moet aanbid

57Ek verlang van hulle geen onderhoud nie, nóg wens Ek dat hulle My moet voed

58Voorwaar, Allah is die Allergrootste Voorsiener, die Heer van Mag, die Sterke

59Die lot van die kwaaddoeners is sekerlik soos die lot van hulle metgeselle; daarom moet hulle My nie vra om dit te verhaas nie

60Wee die ongelowiges vanweë die Dag waarmee hulle bedreig word