Zechariah 2

1Nígbà náà ni mo gbé ojú mi sókè, mo sì rí ọkùnrin kan tí ó mú okùn ìwọ̀n ní ọwọ́ rẹ̀.

2“Níbo ni ìwọ ń lọ?” ni mo béèrè. Ó sì dáhùn pé, “Láti wọn Jerusalẹmu, àti láti mọ bí ìbú rẹ̀ àti gígùn rẹ̀ yóò ti rí.”

3Nígbà náà ni angẹli tí ń bá mi sọ̀rọ̀ jáde lọ, angẹli mìíràn sì jáde wá láti pàdé rẹ̀

4ó sì wí fún un pé, “Sáré, sọ fún ọ̀dọ́mọkùnrin náà pé: ‘Jerusalẹmu yóò jẹ́ ìlú tí kò ní odi nítorí ọ̀pọ̀lọpọ̀ ènìyàn àti ẹran ọ̀sìn tí yóò wà nínú rẹ̀.

5Nítorí Èmi yóò jẹ́ odi iná yí i ká, ni OLUWA wí, Èmi yóò sì jẹ́ ògo nínú rẹ̀.’”

6“Ẹ dìde! Ẹ dìde! Ẹ sá kúrò ní ilẹ̀ àríwá,” ni OLUWA wí, “nítorí mo ti fọ́n yín ká bí igi afẹ́fẹ́ mẹ́rin ti ọ̀run,” ni OLUWA wí.

7“Dìde, ìwọ Sioni! Sá àsálà, ìwọ tí ń gbé pẹ̀lú Ọmọbìnrin Babiloni!”

8Nítorí báyìí ni OLUWA àwọn Ọmọ-ogun wí: “Lẹ́yìn tí Ògo Rẹ̀ ti rán Mi sí àwọn orílẹ̀-èdè tí ó ti kó yín lẹ́rù—nítorí ẹnikẹ́ni tí ó bá fọwọ́ kàn yín ń fọwọ́ kan ẹyinjú Rẹ̀—

9Nítòótọ́ Èmi yóò ju Ọwọ́ Mi lé wọn, kí wọn baà lè di ìkógun fún àwọn ìránṣẹ́ wọn gan-an. Nígbà náà ni ẹ̀yin yóò mọ̀ pé OLUWA àwọn Ọmọ-ogun ti rán Mi.”

10“Kígbe fún ayọ̀ kí o sì yọ̀, ìwọ Ọmọbìnrin Sioni, nítorí Èmi ń bọ̀ wá láti gbé àárín rẹ,” ni OLUWA wí.

11“Ní ọjọ́ náà ọ̀pọ̀lọpọ̀ orílẹ̀-èdè yóò darapọ̀ mọ́ OLUWA, wọn yóò sì di ènìyàn Mi. Èmi yóò sì gbé àárín rẹ, ìwọ yóò sì mọ̀ pé OLUWA àwọn Ọmọ-ogun ti rán Mi sí ọ.

12OLUWA yóò sì jogún Juda gẹ́gẹ́ bí ìpín Rẹ̀ nínú Ilẹ̀ Mímọ́ náà, Òun yóò sì tún yan Jerusalẹmu lẹ́ẹ̀kan sí i.

13Ẹ dákẹ́ níwájú OLUWA, gbogbo ènìyàn, nítorí Òun ti jí ara Rẹ̀ dìde láti inú ibùgbé Rẹ̀ mímọ́ wá.”