Romans 12

1Ошондуктан, бир туугандар, Кудайдын ырайымы үчүн силерден өтүнөм: денелериңерди Кудайга жаккан, ыйык, тирүү курмандык катары тартуулагыла; бул силердин рухий сыйынууңар.

2Бул дүйнөнүн калыбына түшпөгүлө, тескерисинче, акылыңардын жаңыланышы аркылуу өзгөргүлө. Ошондо силер Кудайдын жакшы, жагымдуу жана жеткилең эркин сынап, таанып-биле аласыңар.

3Анткени мага берилген ырайым боюнча силердин ар бириңерге айтам: өзүңөр жөнүндө тийиштүүдөн ашыкча жогору ойлобогула, тескерисинче, Кудай ар бириңерге өлчөп берген ишеним ченине жараша сергек ой жүгүрткүлө.

4Анткени бир денеде көп мүчөбүз болуп, бардык мүчөлөрдүн кызматы бирдей болбогондой эле,

5биз да, көптөр, Машаякта бир денебиз жана ар бирибиз бир-бирибизге мүчөбүз.

6Бизге берилген ырайымга жараша ар кандай жөндөмдөрүбүз бар. Эгер ал пайгамбарчылык болсо, ишенимдин өлчөмүнө жараша колдонсун;

7эгер кызмат кылуу болсо, кызмат кылсын; эгер үйрөтүү болсо, үйрөтсүн;

8эгер насаат айтуу болсо, насаат айтсын; эгер тартуу кылуу болсо, берешендик менен тартууласын; эгер жетектөө болсо, ынтаа менен жетектесин; эгер кайрымдуулук көрсөтүү болсо, кубаныч менен көрсөтсүн.

9Сүйүү жалгансыз болсун. Жамандыктан жийиркенип, жакшылыкка бекем туруңуздар.

10Бири-бириңерге бир туугандык сүйүү менен берилгиле. Бири-бириңерге урмат көрсөтүүдө жарышкыла.

11Ыкласыңар басаңдабасын; рухуңар жалындап, Теңирге кызмат кылгыла.

12Үмүттө кубангыла, кыйынчылыкта сабырдуу болгула, сыйынууда туруктуу болгула.

13Муктаж ыйыктар менен бөлүшкүлө. Меймандостук көрсөтүүгө умтулгула.

14Силерди куугунтуктагандарга бата бергиле. Каргабай, батаңарды бергиле.

15Кубангандар менен бирге кубангыла; ыйлагандар менен бирге ыйлагыла.

16Бири-бириңер менен ынтымакта болгула. Менменсинбегиле, тескерисинче, момундар менен бирге болгула. Өзүңөрдү өзүңөр акылдуу деп эсептебегиле.

17Эч кимге жамандыкка жамандык менен жооп кайтарбагыла. Бардык адамдардын алдында эмне туура экени жөнүндө кылдат ойлонгула.

18Эгерде өз тарабыңардан мүмкүн болсо, бардык адамдар менен тынчтыкта жашагыла.

19Өзүңөр өч албагыла, сүйүктүүлөрүм, тескерисинче, Кудайдын каарына орун бергиле. Анткени: “Өч алуу – Меники; Мен тиешесин берем, – дейт Теңир”, – деп жазылган.

20Тескерисинче: “Эгер душманың ач болсо, аны тойгуз; эгер ал суусаса, ага суу бер. Анткени мындай кылуу менен сен анын башына күйүп турган чок үйөсүң”.

21Жамандыкка жеңдирбе, тескерисинче, жамандыкты жакшылык менен жең.