Romans 12

1Сондықтан, бауырластар, Құдайдың шексіз рақымының құрметіне сендерді өз тәндеріңді Құдайға ұнамды әрі қасиетті, тірі құрбандық ретінде бағыштауға шақырамын; бұл — сендердің саналы рухани ғибадаттарың.

2Осы дәуірдің қалыбына бейімделмеңдер, қайта Құдайдың ізгі, Оған ұнамды әрі кемел еркін ажырата алуларың үшін ақыл-ойларың жаңарып, түбегейлі өзгеріңдер.

3Өйткені маған берілген рақым бойынша араларыңдағы әрбір адамға айтамын: өздерің туралы тиістісінен жоғары ойламаңдар, қайта Құдайдың әркімге бөлген сенім өлшеміне сай салауатты парасатпен ой жүгіртіңдер.

4Себебі бір тәнде мүшелеріміз көп болғанымен, сол мүшелердің бәрінің атқаратын қызметі бірдей емес,

5сол сияқты біздер, көп болсақ та, Мәсіхте бір ғана тәнбіз, ал жеке-жеке бір-бірімізге тиесілі мүшелерміз.

6Бізге берілген рақымға сай сый-сипаттарымыз да әртүрлі. Егер біреудің сыйы пайғамбарлық болса, оны сенімінің мөлшеріне сай қолдансын;

7егер қызмет көрсету болса, қызмет етсін; егер тәлім беру болса, тәлім берсін;

8егер жігерлендіру болса, жігерлендірсін; егер үлестіріп беру болса, мырзалықпен берсін; егер басшылық ету болса, ыждағаттылықпен басқарсын; егер рақым көрсету болса, зор қуанышпен істесін.

9Сүйіспеншіліктерің риясыз болсын. Жамандықтан жиреніп, жақсылыққа берік болыңдар.

10Бір-біріңе бауырластық сүйіспеншілікпен беріліңдер. Құрмет көрсетуде бір-біріңнен озуға тырысыңдар.

11Ынта-жігерлерің бәсеңдемесін; рухта жалындап, Иемізге құлшылық етіңдер.

12Үміттеріңде шаттанып, тауқыметте төзімді болыңдар, дұғада табандылық танытыңдар.

13Мұқтаждық көрген қасиеттілермен бөлісіңдер. Қонақжайлылық көрсетуге ұмтылыңдар.

14Сендерді қудалайтындарға ақ бата беріңдер. Бата беріңдер, қарғамаңдар.

15Қуанғандармен бірге қуаныңдар; жылағандармен бірге жылаңдар.

16Өзара ынтымақта өмір сүріңдер. Тәкаппар болмай, момындармен жақын болыңдар. Менменсінбеңдер.

17Ешкімге жамандыққа жамандықпен қайтармаңдар. Баршаның алдында ізгі болғанды мұқият ойластырыңдар.

18Егер өз тараптарыңнан мүмкін болса, барлық адамдармен бейбіт өмір сүріңдер.

19Сүйіктілерім, өздерің кек алмаңдар, Құдайдың қаһарына жол беріңдер. Өйткені: «Кек алу — Менікі; Мен қарымтасын қайтарамын, — дейді Жаратқан Ие», — деп жазылған.

20Керісінше, «Егер жауың ашықса, оны тамақтандыр; егер ол шөлдесе, сусын бер. Өйткені осылай істеу арқылы сен оның басына жанған шоқ үйесің».

21Жамандыққа жеңілме, жамандықты жақсылықпен жең.