Romans 12

1እንግዲህ ወንድሞች ሆይ፥ ሰውነታችሁን ለእግዚአብሔር ቅዱስና ደስ የሚያሰኝ ሕያው መሥዋዕት አድርጋችሁ ታቀርቡ ዘንድ በእግዚአብሔር ርኅራኄ እለምናችኋለሁ፤ ይህም መንፈሳዊ የአምልኮ አገልግሎታችሁ ነው።

2መልካሙንና ደስ የሚያሰኘውን፣ ፍጹምም የሆነውን የእግዚአብሔርን ፈቃድ መርምራችሁ ታውቁ ዘንድ በአእምሯችሁ መታደስ ተለወጡ እንጂ ይህን ዓለም አትምሰሉ።

3እግዚአብሔር ለእያንዳንዳችሁ በሰጠው በእምነት መጠን ራሳችሁን በመጠን እሰቡ እንጂ፣ ማንም ስለ ራሱ ሊያስብ ከሚገባው በላይ ከፍ አድርጎ እንዳያስብ በተሰጠኝ ጸጋ ለእያንዳንዳችሁ እናገራለሁ።

4በአንድ አካል ብዙ ብልቶች እንዳሉንና የብልቶቹም ሁሉ ሥራ አንድ እንዳልሆነ ሁሉ፥

5እንዲሁ እኛ ብዙዎች ስንሆን በክርስቶስ አንድ አካል ነን፤ እያንዳንዳችንም የአንዳችን ብልቶች ነን።

6እንደ ተሰጠንም ጸጋ ልዩ ልዩ ስጦታ አለን፤ ስጦታውም ትንቢት መናገር ቢሆን፥ እንደ እምነታችን መጠን ይሁን፤

7ማገልገል ቢሆን፥ ያገልግል፤ ማስተማር ቢሆን፥ ያስተምር፤

8የሚያበረታታ ቢሆን፥ ያበርታ፤ የሚሰጥ በልግስና ይስጥ፤ የሚመራ በትጋት ይምራ፤ ምሕረት የሚያደርግ በደስታ ያድርግ።

9ፍቅራችሁ ያለ ግብዝነት ይሁን። ክፉውን ነገር ተጸየፉ፤ ከመልካሙ ጋር ተጣበቁ።

10በወንድማማች ፍቅር እርስ በርሳችሁ ተዋደዱ፤ እርስ በርሳችሁ በመከባበር ተቀዳደሙ።

11ለትጋት አትታክቱ፤ በመንፈስ የምትቃጠሉ ሁኑ፤ ጌታን አገልግሉ።

12በተስፋ ደስ ይበላችሁ፤ በመከራ ታገሡ፤ በጸሎት ጽኑ።

13ለተቸገሩ ቅዱሳን አካፍሉ፤ እንግዳ መቀበልን አዘውትሩ።

14የሚያሳድዷችሁን መርቁ፤ መርቁ እንጂ አትርገሙ።

15ደስ ከሚላቸው ጋር ደስ ይበላችሁ፤ ከሚያለቅሱም ጋር አልቅሱ።

16እርስ በርሳችሁ በአንድ አሳብ ተስማሙ፤ የትዕቢትን ነገር አታስቡ፥ ነገር ግን ዝቅ ከሚሉት ጋር ተባበሩ፤ በነፍሳችሁ ብልሆች አትሁኑ።

17ለማንም በክፉ ፈንታ ክፉን አትመልሱ፤ በሰው ሁሉ ፊት መልካም የሆነውን ነገር አስቡ።

18ቢቻላችሁስ በበኩላችሁ ከሰው ሁሉ ጋር በሰላም ኑሩ።

19ወዳጆች ሆይ፥ ራሳችሁ አትበቀሉ፥ ለእግዚአብሔር ቍጣ ፈንታ ስጡ እንጂ፤ «በቀል የእኔ ነው፥ እኔ ብድራትን እመልሳለሁ ይላል ጌታ» ተብሎ ተጽፎአልና።

20ይልቁንም፥ «ጠላትህ ቢራብ አብላው፤ ቢጠማ አጠጣው፤ ይህን በማድረግህ በራሱ ላይ የእሳት ፍም ትከምራለህና።»

21ክፉውን በመልካም አሸንፍ እንጂ በክፉ አትሸነፍ።