Psalms 76

1እግዚአብሔር በይሁዳ የታወቀ ነው፤ ስሙ በእስራኤል ታላቅ ነው።

2ድንኳኑ በሳሌም፥ ማደሪያውም በጽዮን ነው።

3በዚያ የሚነድዱትን ፍላጾች፥ ጋሻውንና ሰይፉን የጦር መሣሪያዎችንም ሰበረ። ሴላ።

4አንተ በብርሃን የተጐናጸፍህ ነህ፥ አደን ከሞላባቸው ተራሮች ይልቅ የከበርህ ነህ።

5ልበ ብርቱዎች ተዘረፉ፤ የመጨረሻ እንቅልፋቸውንም አንቀላፉ፤ ከኃያላን ሰዎች መካከል ማንም እጁን ማንሣት አልቻለም።

6የያዕቆብ አምላክ ሆይ፥ ከተግሣጽህ የተነሣ ፈረሱም ፈረሰኛውም ደነዘዙ።

7አንተ ብቻ የምትፈራ ነህ፤ በተቈጣህስ ጊዜ በፊትህ ማን ሊቆም ይችላል?

8ፍርድን ከሰማይ አሰማህ፥ ምድርም ፈራች ጸጥም አለች፥

9እግዚአብሔር ለፍርድ በተነሣ ጊዜ፥ የምድርን ምስኪኖች ሁሉ ያድን ዘንድ። ሴላ።

10የሰው ቍጣ እንኳ ያመሰግንሃል፤ ከቍጣ የተረፉትንም እንደ ልብስ ትለብሳቸዋለህ።

11ለአምላካችሁ ለእግዚአብሔር ተሳሉ፥ ስእለታችሁንም ፈጽሙ፤ በዙሪያው ያሉ አገሮች ሁሉ ለሚያስፈራው ገጸ በረከትን ያቅርቡ።

12እርሱ የመሳፍንትን መንፈስ ይሰብራል፤ በምድር ነገሥታት ዘንድ የተፈራ ነው።