Proverbs 16

1Մարդունն են սրտի խորհուրդները, բայց լեզվի պատասխանը ՏԻՐՈՋԻՑ է:

2Մարդու բոլոր ճանապարհները մաքուր են իր աչքերում, բայց ՏԷՐՆ է կշռում դրդապատճառները:

3Քո գործերը ՏԻՐՈՋԸ հանձնիր, և քո ծրագրերը կհաստատվեն:

4ՏԷՐՆ ամեն բան արարել է Իր նպատակի համար, նույնիսկ ամբարշտին՝ չարիքի օրվա համար:

5Սրտով ամեն հպարտ պիղծ է ՏԻՐՈՋ առջև. վստահ եղիր, որ նա անպատիժ չի մնա:

6Գթառատ նվիրվածությամբ և հավատարմությամբ է քավվում անօրենությունը, և ՏԻՐՈՋ երկյուղով մարդը խոտորվում է չարից:

7Երբ մարդու ճանապարհները հաճելի են ՏԻՐՈՋԸ, Նա նրա թշնամիներին անգամ հաշտեցնում է նրա հետ:

8Լավ է սակավն արդարությամբ, քան մեծ եկամուտն անիրավությամբ:

9Մարդու սիրտը ծրագրում է իր ճանապարհը, բայց ՏԷՐՆ է ուղղորդում նրա քայլերը:

10Աստվածային վճիռ կա թագավորի շուրթերին. նրա բերանը չպիտի դավաճանի արդարությանը:

11Ճշմարիտ նժարն ու կշեռքը ՏԻՐՈՋԻՑ են. տոպրակի բոլոր կշռաքարերը Նրա գործն են:

12Անօրեն վարքը գարշելի է թագավորների համար, քանզի գահը հաստատվում է արդարությամբ:

13Արդար շուրթերը թագավորի հաճությունն են, և ուղղամտորեն խոսողը սիրելի է:

14Թագավորի ցասումը մահվան պատգամաբեր է, բայց իմաստուն մարդը կհանդարտեցնի այն:

15Թագավորի երեսի պայծառության մեջ կյանք կա, և նրա բարեհաճությունը գարնանային անձրևաբեր ամպի պես է:

16Որքա՜ն ավելի լավ է իմաստություն ձեռք բերել, քան ոսկի. հասկացողություն ստանալն առավել ցանկալի է, քան արծաթը:

17Ուղղամիտների պողոտան հեռանում է չարից. ով պահպանում է իր ճանապարհը, պաշտպանում է իր կյանքը:

18Կործանմանն առաջնորդում է հպարտությունը, և անկմանը՝ գոռոզ հոգին:

19Լավ է խոնարհամիտ լինել հեզերի հետ, քան ավար բաժանել ամբարտավանների հետ:

20Ով ուշադիր է խոսքին, բարիք կգտնի, և երանելի է նա, ով հույսը դնում է ՏԻՐՈՋ վրա:

21Սրտով իմաստունը խոհեմ կկոչվի, և քաղցրախոսությունն ավելացնում է ուսուցումը:

22Հասկացողությունը կյանքի աղբյուր է իր տիրոջ համար, իսկ հիմարների խրատը հիմարություն է:

23Իմաստունի սիրտը խոհեմ է դարձնում իր բերանը և համոզչություն է ավելացնում իր շուրթերին:

24Հաճելի խոսքերը մեղրախորիսխ են՝ քաղցր հոգուն և բժշկություն ոսկորներին:

25Կա ճանապարհ, որ ուղիղ է թվում մարդուն, բայց նրա վախճանը մահվան ճանապարհն է:

26Աշխատավորի ախորժակն աշխատում է նրա համար, քանզի նրա քաղցը մղում է նրան առաջ:

27Անպիտան մարդը չարիք է փորում, և նրա խոսքը կիզիչ կրակի պես է:

28Խոտորնակ մարդը տարաձայնություն է սերմանում, և քսուն բաժանում է մտերիմ ընկերներին:

29Բռնավոր մարդը հրապուրում է իր մերձավորին և տանում նրան ոչ բարի ճանապարհով:

30Աչքով անողը նենգություն է նյութում, շուրթերը սեղմողը կատարում է չարիքը:

31Ալևորությունը փառքի պսակ է. այն գտնվում է արդարության ճանապարհին:

32Երկայնամիտը ռազմիկից լավ է, և իր ոգուն տիրապետողը՝ քաղաք գրավողից:

33Վիճակը ծոցն է գցվում, բայց նրա ամեն որոշումը ՏԻՐՈՋԻՑ է: