Matthew 11

1Lẹ́yìn tí Jesu ti parí ìtọ́ni fún àwọn ọmọ-ẹ̀yìn Rẹ̀ méjìlá, Ó kúrò níbẹ̀ láti kọ́ni àti láti wàásù nínú àwọn ìlú wọn.

2Nígbà tí Johanu sì gbọ́ nínú túbú nípa àwọn iṣẹ́ Kristi, ó rán àwọn ọmọ-ẹ̀yìn rẹ̀

3láti bi Í léèrè pé, “Ṣé Ìwọ ni Ẹni tí ń bọ̀, tàbí kí a máa retí ẹlòmíràn?”

4Jesu sì dáhùn ó sì wí fún wọn pé, “Ẹ padà lọ kí ẹ sì ròyìn fún Johanu ohun tí ẹ̀yin ń gbọ́ tí ẹ sì ń rí:

5Àwọn afọ́jú ń ríran, àwọn arọ ń rìn, a ń wẹ àwọn adẹ́tẹ̀ mọ́, àwọn adití ń gbọ́ran, a ń jí àwọn òkú dìde, a sì ń wàásù ìhìnrere fún àwọn tálákà.

6Ìbùkún sì ni fún ẹni tí kò kọsẹ̀ nítorí Mi.”

7Bí àwọn ọmọ-ẹ̀yìn Johanu sì ti ń lọ, Jesu bẹ̀rẹ̀ sí í sọ fún àwọn èrò nípa Johanu pé: “Kí ni ẹ̀yin jáde lọ sí aginjù láti wò? Iye tí afẹ́fẹ́ ń mì bí?

8Bí bẹ́ẹ̀ kọ́, kí ni ẹ̀yin jáde lọ láti wò? Ènìyàn tí a wọ̀ ní aṣọ dídán bí? Wò ó, àwọn tí ń wọ aṣọ dídán ń gbé ààfin àwọn ọba.

9Kí ha ni ẹ̀yin jáde lọ láti wò? Wòlíì bí? Bẹ́ẹ̀ ni, Mo wí fún yín, ó sì ju wòlíì lọ.

10Èyí ni ẹni tí a ti kọ̀wé nípa rẹ̀ pé: ‘Wò ó, Èmi rán ońṣẹ́ Mi síwájú Rẹ, ẹni tí yóò tún ọ̀nà Rẹ ṣe níwájú Rẹ.’

11Lóòótọ́ ni Mo wí fún yín, nínú àwọn tí a bí nínú obìnrin kò tíì sí ẹni tí ó ga ju Johanu Onítẹ̀bọmi lọ. Síbẹ̀, ẹni tí ó kéré jù nínú ìjọba ọ̀run tóbí ju òun lọ.

12Láti àwọn ọjọ́ Johanu Onítẹ̀bọmi títí di ìsinsìnyí, ìjọba ọ̀run ń jìyà ìwà-ipá, àwọn oníwà-ipá sì ń fi ipá gbà á.

13Nítorí gbogbo àwọn Wòlíì àti Òfin sọtẹ́lẹ̀ títí di ìgbà Johanu.

14Bí ẹ̀yin bá sì fẹ́ gbà á, òun ni Elijah tí ó ń bọ̀ wá.

15Ẹni tí ó bá ní etí, kí ó gbọ́.

16Kí ni èmi yóò fi ìran yìí wé? Wọ́n dàbí àwọn ọmọdé tí wọ́n jókòó ní àwọn ibi ọjà tí wọ́n sì ń ké pe àwọn ẹlòmíràn:

17‘Àwa fọn fèrè fún yín, ẹ̀yin kò sì jó; àwa kọ orin ọ̀fọ̀ fún yín, ẹ̀yin kò sì pohùnréré ẹkún.’

18Nítorí Jòhánù wá, kò jẹ bẹ́ẹ̀ ni kò mu, wọ́n sì wí pé, ‘Ó ní ẹ̀mí èṣù!’

19Ọmọ Ènìyàn wá, Ó ń jẹ, Ó sì ń mu, wọ́n sì wí pé, ‘Ẹ wo ọ̀kánjúà ènìyàn àti ọ̀mùtí, ọ̀rẹ́ àwọn agbowó-odò àti àwọn ẹlẹ́ṣẹ̀!’ Ṣùgbọ́n ọgbọ́n ni a dá láre nípa àwọn iṣẹ́ rẹ̀.”

20Nígbà náà ni Jésù bẹ̀rẹ̀ sí í bá àwọn ìlú tí a ti ṣe ọ̀pọ̀lọpọ̀ iṣẹ́ ìyanu Rẹ̀ wí, nítorí pé wọn kò ronúpìwàdà.

21“Ègbé ni fún ọ, Kórásínì! Ègbé ni fún ọ, Bẹtisáídà! Nítorí pé bí a bá ṣe àwọn iṣẹ́ ìyanu tí a ṣe nínú yín ní Tírè àti Sídónì, wọn ìbá ti ronúpìwàdà tipẹ́tipẹ́ nínú aṣọ ọ̀fọ̀ àti eérú.

22Ṣùgbọ́n mo sọ fún yín, yóò rọrùn fún Tírè àti Sídónì ní ọjọ́ ìdájọ́ ju fún yín lọ.

23Àti ìwọ, Kápánáúmù, a ó ha gbé ọ ga dé ọ̀run bí? Rárá, a ó sọ ọ́ kalẹ̀ sí Hédíìsì! Nítorí pé bí a bá ṣe àwọn iṣẹ́ ìyanu tí a ṣe nínú rẹ ní Sódómù, kì bá ti wà títí di òní olónìí.

24Ṣùgbọ́n mo sọ fún yín pé yóò rọrùn fún Sódómù ní ọjọ́ ìdájọ́ ju fún yín lọ.”

25Ní àkókò náà ni Jésù kéde pé, “Mo yìn Ọ́, Baba, Olúwa ọ̀run àti ayé, nítorí pé Ìwọ ti fi àwọn nǹkan wọ̀nyí pamọ́ fún àwọn ọlọ́gbọ́n àti àwọn amòye, Ìwọ sì ti fi wọ́n hàn fún àwọn ọmọ kéékèèké.

26Bẹ́ẹ̀ ni, Baba, nítorí pé èyí dùn mọ́ Ọ nínú níwájú Rẹ.

27Ohun gbogbo ni a ti fi lé Mi lọ́wọ́ láti ọ̀dọ̀ Baba Mi. Kò sì sí ẹni tí ó mọ Ọmọ bí kò ṣe Baba, bẹ́ẹ̀ ni kò sí ẹni tí ó mọ Baba bí kò ṣe Ọmọ àti àwọn tí Ọmọ bá yàn láti fi Í hàn fún.”

28Ẹ wá sọ́dọ̀ Mi, gbogbo ẹ̀yin tí ń ṣe làálàá tí a sì di ẹrù lé lórí, Èmi yóò sì fún yín ní ìsinmi.

29Ẹ gbé àjàgà Mi wọ̀, kí ẹ sì kọ́ ẹ̀kọ́ lọ́dọ̀ Mi; nítorí oníwà tútù àti onírẹ̀lẹ̀ ọkàn ni Èmi, ẹ̀yin yóò sì rí ìsinmi fún ọkàn yín.

30Nítorí àjàgà Mi rọrùn, ẹrù Mi sì fúyẹ́.”