Matthew 11

1Откако Исус заврши со поучувањето на Своите дванаесет ученици, Тој замина оттаму за да поучува и проповеда по нивните градови.

2А Јован, откако чу во затворот за делата Христови, ги испрати своите ученици

3да Го прашаат: „Ти ли си Оној што требаше да дојде, или друг да чекаме?“

4Исус им одговори: „Одете и јавете му на Јован што слушате и гледате:

5слепи прогледуваат, хроми одат, прокажени се очистуваат, глуви слушаат, мртви воскреснуваат и на сиромашните им се проповеда радосната вест.

6И блажен е оној што нема да се соблазни заради Мене.“

7А кога тие си заминуваа, Исус почна да му зборува на народот за Јован: „Што излеговте да видите во пустината? Трска ли што се ниша од ветрот?

8Туку, што излеговте да видите? Човек облечен во раскошна облека? Еве, оние што носат раскошна облека се во царските палати.

9Па што излеговте да видите? Пророк ли? Да, ви велам, и повеќе од пророк.

10Овој е Оној за кого е напишано: ‚Еве, Јас го испраќам Својот гласник пред Тебе, кој ќе го приготви Твојот пат пред Тебе.‘

11Вистина ви велам, меѓу родените од жена не се појавил поголем од Јован Крстител; но најмалиот во царството небесно е поголем од него.

12А од деновите на Јован Крстител досега, царството небесно насила се зема, и насилниците го грабаат.

13Зашто сите Пророци и Законот пророкуваа до Јован.

14И ако сакате да го прифатите тоа, тој е Илија кој требаше да дојде.

15Кој има уши, нека чуе.“

16Со кого да го споредам овој род? Тој прилега на деца што седат по пазариштата и им викаат на своите другари:

17‘Ви свиревме, и не игравте; ви пеевме тажачки, и не плачевте.’

18Зашто дојде Јован, кој ниту јаде, ниту пие, а велат: ‘Демон има!’

19Дојде Синот Човечки, Кој јаде и пие, а велат: ‘Еве Човек ненаситен и пијаница, пријател на цариниците и грешниците!’ Но мудроста ја оправдаа нејзините дела.”

20Тогаш Исус почна да ги прекорува градовите во кои беа извршени повеќето од Неговите чудеса, затоа што не се покајаа:

21„Тешко тебе, Хоразине! Тешко тебе, Витсаидо! Зашто, ако во Тир и Сидон беа извршени чудесата што се извршија во вас, тие одамна ќе се покаеја во вреќа и пепел.

22Но ви велам: полесно ќе им биде на Тир и Сидон на судот ден, отколку вам.

23И ти, Капернауме, до небо ли ќе се возвишиш? Не, до адот ќе бидеш спуштен! Зашто, ако во Содом беа извршени чудесата што се извршија во тебе, тој ќе останеше сè до денес.

24Но ви велам дека за Содом на судниот ден ќе биде полесно отколку за тебе.”

25Во тоа време Исус проговори и рече: „Те прославувам, Оче, Господи на небото и на земјата, зашто си го скрил ова од мудрите и разумните, а си им го открил на децата.

26Да, Оче, зашто така беше угодно пред Тебе.

27Сè Ми е предадено од Мојот Отец; и никој не Го познава Синот, освен Отецот; ниту Отецот Го познава некој, освен Синот и оној кому што Синот сака да Му Го открие.”

28Дојдете при Мене, сите вие што сте изморени и обременети, и Јас ќе ви дадам покој.

29Земете го Мојот јарем на себе и поучете се од Мене, зашто Јас сум кроток и смирен по срце, и ќе најдете покој за душите ваши.

30Зашто Мојот јарем е благ и Моето бреме е лесно.”