Matthew 11

1Иса Өзінің он екі шәкіртіне тәлім беріп болған соң, олардың қалаларында тәлім беріп, уағыздау үшін сол жерден әрі қарай жүріп кетті.

2Осы кезде Жақия түрмеде Мәсіхтің істері жайында естіп, шәкірттерін жіберіп,

3Одан: «Келуі тиіс Ол Сен бе, әлде басқа біреуді күтуіміз керек пе?» деп сұратты.

4Иса оларға былай деп жауап берді: «Барып, естіп және көріп жүргендеріңді Жақияға баяндаңдар:

5зағиптар көреді, ақсақтар жүреді, алапестер тазарады, саңыраулар естиді, өлілер тіріледі және жарлыларға Ізгі хабар жарияланады.

6Мен үшін сүрінбеген жан бақытты!»

7Жақияның шәкірттері кетіп бара жатқанда, Иса халыққа Жақия туралы сөйлей бастады: «Шөл далаға нені көруге шықтыңдар? Жел тербеткен қамысты ма?

8Әйтпесе, нені көруге шықтыңдар? Сән-салтанатты киім киген кісіні ме? Міне, сәнді киім киетіндер патша сарайларында болады.

9Ендеше нені көруге шықтыңдар? Пайғамбарды ма? Иә, сендерге айтамын, тіпті пайғамбардан да артықты!

10Өйткені ол туралы былай деп жазылған: «Міне, Мен Өз хабаршымды Сенің алдыңнан жіберемін, ол Сенің алдыңда Сенің жолыңды дайындайды».

11Сендерге шындығын айтамын, әйелден туғандардың арасында Жақия Шомылдырушыдан асқан ешкім шыққан емес; дегенмен, Көктер патшалығындағы ең кішісінің өзі одан ұлы.

12Жақия Шомылдырушының күндерінен осы уақытқа дейін Көктер патшалығы зорлыққа ұшырап келеді, және зорлықшылдар оған күштеп қол сұғуда.

13Себебі барлық Пайғамбарлар мен Заң Жақияға дейін пайғамбарлық еткен еді.

14Егер мұны қабылдағыларың келсе, келуге тиіс Ілияс — осының өзі.

15Еститін құлағы бар жан естісін!»

16Бұл ұрпақты Мен не нәрсеге теңейін? Олар базар алаңдарында отырып, өзгелерге дауыстаған балаларға ұқсайды:

17«Біз сендерге сыбызғы тарттық, ал сендер билемедіңдер; біз жоқтау айттық, ал сендер зар еңіремедіңдер».

18Өйткені Жақия ішіп-жемей келді, ал олар: «Оның бойында жын бар!» десті.

19Адам Ұлы ішіп-жеп келді, ал олар: «Мына мешкей мен маскүнемге, салықшылар мен күнәкарлардың досына қараңдар!» десті. Алайда даналық Өз істерімен ақталады».

20Сонда Иса Өзінің кереметтерінің көбі жасалған қалаларды тәубеге келмегендері үшін сөге бастады:

21«Қасірет саған, Қоразин! Қасірет саған, Бетсайда! Өйткені сендерде жасалған кереметтер Тир мен Сидонда жасалған болса, олар әлдеқашан қап жамылып, күл бүркеніп тәубеге келер еді.

22Бірақ сендерге айтамын: сот күні Тир мен Сидон үшін сендердегіден жеңілірек болады.

23Ал сен, Қапарнаум, көкке шейін көтерілер ме екенсің? Жоқ, тозақ түбіне түсірілесің! Өйткені сенде жасалған кереметтер Содомда жасалған болса, ол бүгінгі күнге дейін тұрар еді.

24Бірақ сендерге айтамын: сот күні Содом жері үшін сендердегіден жеңілірек болады».

25Сол уақытта Иса сөз алып: «Көк пен жердің Тәңірі, Әке, Сені дәріптеймін, өйткені Сен мұны данышпандар мен білгірлерден жасырып, сәбилерге аштың.

26Иә, Әке, өйткені бұл Сенің қалауыңа ұнамды болды.

27Маған Әкем бәрін де сеніп тапсырды. Әкеден басқа ешкім Ұлды танымайды, және Ұл мен Ұл Оны ашуды ұйғарғандардан басқа ешкім Әкені танымайды».

28Маған келіңдер, барша қажығандар мен ауыр жүк көтергендер, сонда Мен сендерге тыныштық беремін.

29Менің мойынторығымды мойындарыңа алып, Менен үйреніңдер, өйткені Мен биязы әрі кішіпейіл жүректімін, сонда жандарыңа тыныштық табасыңдар.

30Өйткені Менің мойынторығым қолайлы, ал Менің жүгім жеңіл.”