Matthew 11

1როდესაც იესომ დაასრულა თავისი თორმეტი მოწაფის დამოძღვრა, წავიდა იქიდან, რათა ესწავლებინა და ექადაგა მათ ქალაქებში.

2ხოლო იოანემ საპყრობილეში გაიგო ქრისტეს საქმეთა შესახებ და მიავლინა თავისი მოწაფეები,

3რათა ეკითხათ მისთვის: „შენ ხარ ის, ვინც უნდა მოვიდეს, თუ სხვას უნდა ველოდოთ?“

4იესომ მიუგო და უთხრა მათ: „წადით და ამცნეთ იოანეს, რაც გესმით და რასაც ხედავთ:

5ბრმები ხედავენ, კოჭლები დადიან, კეთროვნები იწმინდებიან, ყრუებს ესმით, მკვდრები აღდგებიან და გლახაკებს ეხარებათ სახარება.

6და ნეტარია ის, ვინც არ დაბრკოლდება ჩემ გამო“.

7როდესაც ისინი წავიდნენ, იესომ დაიწყო ხალხთან ლაპარაკი იოანეს შესახებ: „რის სანახავად გახვედით უდაბნოში? ქარისაგან შერყეული ლერწმისა?

8აბა, რის სანახავად გახვედით? ძვირფასი სამოსით შემოსილი კაცისა? აჰა, ვინც ძვირფას სამოსს ატარებს, მეფეთა სასახლეებშია.

9მაშ, რის სანახავად გახვედით? წინასწარმეტყველისა? დიახ, გეუბნებით თქვენ, და წინასწარმეტყველზე მეტისა.

10ეს არის იგი, ვისზედაც დაწერილია: ’აჰა, მე ვგზავნი ჩემს მაცნეს შენს წინაშე, რომელიც მოგიმზადებს გზას შენ წინ.’

11ჭეშმარიტად გეუბნებით თქვენ: დედათაგან შობილთა შორის არ აღმდგარა იოანე ნათლისმცემელზე დიდი, თუმცა ცათა სასუფეველში უმცირესიც მასზე დიდია.

12ხოლო იოანე ნათლისმცემლის დღეებიდან მოყოლებული აქამომდე ცათა სასუფეველი ძალით იკაფება, და ძალისმხმეველნი იტაცებენ მას.

13რადგან ყველა წინასწარმეტყველი და რჯული იოანემდე წინასწარმეტყველებდა.

14და თუ გნებავთ მიღება, ეს არის ელია, რომელიც უნდა მოსულიყო.

15ვისაც ყურები აქვს, ისმინოს!“

16ვის ვამსგავსო ეს მოდგმა? იგი ჰგავს მოედანზე მსხდომ ბავშვებს, რომლებიც გასძახიან სხვებს:

17„სტვირი დაგიკარით და არ იცეკვეთ; სამგლოვიარო გიმღერეთ და არ იგლოვეთ“.

18ვინაიდან მოვიდა იოანე, არც ჭამდა და არც სვამდა, და ამბობენ: „ეშმაკია მისში!“

19მოვიდა ძე კაცისა, ჭამს და სვამს, და ამბობენ: „აჰა, კაცი გაუმაძღარი და ღვინის მსმელი, მებაჟეთა და ცოდვილთა მეგობარი!“ მაგრამ გამართლდა სიბრძნე თავისი საქმეებით“.

20მაშინ იესომ დაიწყო იმ ქალაქების გაკიცხვა, სადაც მისი უმეტესი სასწაულები მოხდა, რადგან მათ არ მოინანიეს:

21„ვაი შენდა, ქორაზინ! ვაი შენდა, ბეთსაიდა! ვინაიდან ტვიროსსა და სიდონში რომ მომხდარიყო სასწაულები, თქვენში რომ მოხდა, დიდი ხნის წინათ მოინანიებდნენ ჯვალოთი და ნაცარში.

22მაგრამ გეუბნებით თქვენ: ტვიროსისა და სიდონისთვის უფრო ასატანი იქნება განკითხვის დღეს, ვიდრე თქვენთვის.

23და შენ, კაპერნაუმ, განა ცამდე ამაღლდები? ჯოჯოხეთამდე დაემხობი! ვინაიდან სოდომში რომ მომხდარიყო სასწაულები, შენში რომ მოხდა, იგი დღემდე დარჩებოდა.

24მაგრამ გეუბნებით თქვენ, რომ სოდომის მიწისთვის უფრო ასატანი იქნება განკითხვის დღეს, ვიდრე შენთვის“.

25იმ დროს იესომ თქვა: „გადიდებ შენ, მამაო, ცისა და მიწის უფალო, რადგან დაუფარე ეს ბრძენთა და გონიერთ, და გაუცხადე ჩვილებს.

26ჰოი, მამაო, რადგან ასე იყო სათნო შენს წინაშე.

27ყოველივე გადმომეცა მე ჩემი მამის მიერ. და არავინ იცის ძე, გარდა მამისა, და არც მამა იცის ვინმემ, გარდა ძისა და იმისა, ვისაც ძე ინებებს, რომ გაუცხადოს იგი“.

28მოდით ჩემთან, ყოველნო დამაშვრალნო და ტვირთმძიმენო, და მე მოგასვენებთ თქვენ.

29დაიდგით ჩემი უღელი და ისწავლეთ ჩემგან, რადგან მშვიდი ვარ და გულით თავმდაბალი, და ჰპოვებთ განსვენებას თქვენი სულებისათვის.

30რადგან ჩემი უღელი საამურია და ჩემი ტვირთი — მსუბუქი“.