James 1

1Кудайдын жана Теңир Ыйса Машаяктын кулу Жакыптан чачырап кеткен он эки урууга салам!

2Бир туугандарым, ар кандай сыноолорго дуушар болгондо, аны зор кубаныч деп эсептегиле,

3анткени ишенимиңердин сыналашы чыдамкайлыкты пайда кыларын билесиңер.

4Чыдамкайлык болсо өз ишин аягына чыгарсын, ошондо силер эч нерседен кемтиги жок, жетилген жана кемчиликсиз болосуңар.

5Эгерде араңардан кимдир бирөөнүн акылмандыгы жетишпесе, ал эч кимди жемелебей, баарына марттык менен берүүчү Кудайдан сурасын, ошондо ага берилет.

6Бирок эч шектенбестен, ишеним менен сурасын, анткени шектенген адам шамал айдап, чайпалган деңиз толкуну сыяктуу.

7Мындай адам Теңирден бир нерсе алам деп күтпөсүн.

8Ал — эки ойлуу, бардык жолдорунда туруксуз адам.

9Жөнөкөй абалда болгон бир тууган өзүнүн жогорку даражасына кубансын.

10Ал эми бай адам өзүнүн төмөндүгү менен кубансын, анткени ал талаа гүлү сыяктуу өтүп кетет.

11Анткени күн аптап менен чыгып, өсүмдүктү кууратат; анын гүлү түшүп, сулуулугу жоголот. Ошол сыяктуу эле, бай адам да өз иштеринин арасында соолуп калат.

12Сыноого туруштук берген адам бактылуу, анткени сыноодон өткөндөн кийин, ал Кудай Өзүн сүйгөндөргө убада кылган өмүр таажысын алат.

13Азгырылганда эч ким: «Мени Кудай азгырып жатат», — деп айтпасын. Анткени Кудай жамандык менен азгырылбайт жана Өзү да эч кимди азгырбайт.

14Бирок ар бир адам өзүнүн жаман кумарларына азгырылып жана тартылып кеткенде азгырылат.

15Андан соң кумар бойго бүтүп, күнөөнү тууйт; ал эми күнөө толук жетилгенде, өлүмдү жаратат.

16Адашпагыла, менин сүйүктүү бир туугандарым.

17Ар бир жакшы берүү жана ар бир жеткилең белек жогорудан, өзгөрбөс жана көлөкөсү да бурулбас асман жарыктарынын Атасынан түшөт.

18Өз жараткандарынын арасында бизди бир алгачкы түшүмдөй кылуу үчүн, Ал Өз эрки менен бизди чындык сөзү аркылуу төрөттү.

19Менин сүйүктүү бир туугандарым, муну билип алгыла: ар бир адам угууга даяр, сүйлөөгө сабырдуу жана ачууланууга жай болсун,

20анткени адамдын ачуусу Кудай каалаган адилдикти жаратпайт.

21Ошондуктан ар кандай адеп-ахлаксыз ыпыластыкты жана жамандыктын ар бир түрүн четке кагып, жаныңарды куткарууга кудуреттүү болгон, ичиңерге себилген сөздү момундук менен кабыл алгыла.

22Сөздү жөн гана угуучулардан болуп өзүңөрдү алдабастан, аны аткаруучулардан болгула.

23Анткени сөздү угуп, бирок аны аткарбаган адам өзүнүн табигый жүзүн күзгүдөн караган кишиге окшош:

24ал өзүн карайт да, басып кетип, кандай болгонун ошол замат унутуп коёт.

25Ал эми эркиндиктин жеткилең мыйзамына терең үңүлүп, андан тайбаган, унутчаак угуучу эмес, ишти аткаруучу болгон адам өз ишинде баталуу болот.

26Эгер кимде-ким өзүн такыбамын деп эсептеп, бирок өз тилин ооздуктабаса, ал өз жүрөгүн алдайт жана анын такыбалыгы курулай бекер.

27Биздин Кудайыбыз жана Атабыздын алдындагы таза жана кемтиксиз такыбалык мына бул: жетимдер менен жесирлердин башына кайгы түшкөндө аларга кам көрүү жана өзүн бул дүйнөнүн булганычынан сактоо.