James 1

1Հակոբոսը՝ Աստծու և Տեր Հիսուս Քրիստոսի ծառան, Սփյուռքի տասներկու ցեղերիդ. ողջո՛ւյն։

2Ամենայն ուրախությո՛ւն համարեք, եղբայրնե՛ր իմ, երբ զանազան փորձությունների մեջ ընկնեք,

3քանզի գիտեք, որ ձեր հավատի փորձությունը համբերություն է առաջ բերում։

4Եվ թող համբերությունն իր գործը կատարյալ դարձնի, որպեսզի լինեք հասուն և կատարյալ՝ ոչ մի բանի պակասություն չունենալով։

5Իսկ եթե ձեզնից որևէ մեկը իմաստության պակաս ունի, թող խնդրի Աստծուց, որ առատաձեռնորեն և առանց նախատելու տալիս է բոլորին, և այն կտրվի նրան։

6Բայց թող խնդրի հավատով՝ ամենևին չկասկածելով, որովհետև կասկածողը նման է ծովի ալիքին, որ հողմից տարուբերվում և քշվում է։

7Այդպիսի մարդը թող չակնկալի որևէ բան ստանալ Տիրոջից։

8Նա երկմիտ մարդ է՝ անհաստատ իր բոլոր ճանապարհներում։

9Խոնարհ վիճակում գտնվող եղբայրը թող պարծենա իր բարձրությամբ,

10իսկ հարուստը՝ իր խոնարհությամբ, քանզի նա պիտի անցնի դաշտի ծաղկի պես։

11Քանզի ծագում է արևը խորշակահար տապով և չորացնում բույսը. նրա ծաղիկը թափվում է, և նրա գեղեցկությունը կորչում։ Այդպես էլ հարուստը պիտի թառամի իր զբաղմունքների մեջ։

12Երանելի՜ է այն մարդը, որ տոկում է փորձությանը, քանի որ, փորձությունն անցնելով, պիտի ստանա կյանքի պսակը, որ Աստված խոստացավ Նրան սիրողներին։

13Փորձության մեջ գտնվելիս թող ոչ ոք չասի. «Աստված է ինձ փորձում». քանզի Աստված չարից չի փորձվում, և Ինքն էլ ոչ ոքի չի փորձում։

14Այլ յուրաքանչյուր ոք փորձվում է, երբ հրապուրվում և խաբվում է իր իսկ չար ցանկություններից։

15Ապա ցանկությունը, հղիանալով, ծնում է մեղք, իսկ մեղքը, երբ հասունանում է, ծնում է մահ։

16Մի՛ մոլորվեք, ի՛մ սիրելի եղբայրներ։

17Ամեն բարի շնորհ և ամեն կատարյալ պարգև վերևից է՝ իջնելով լույսերի Հորից, որի մոտ չկա փոփոխություն կամ շրջվելու ստվեր։

18Նա Իր կամքով ծնեց մեզ ճշմարտության խոսքով, որպեսզի մենք լինենք Նրա արարածների մի տեսակ երախայրիքը։

19Իմ սիրելի՛ եղբայրներ, իմացե՛ք սա. ամեն մարդ թող արագ լինի լսելու մեջ, ծանր՝ խոսելու մեջ, և ծանր՝ բարկանալու մեջ,

20քանզի մարդու բարկությունը չի գործում Աստծու արդարությունը։

21Ուստի, դեն գցելով ամեն պղծություն և չարության ամեն ավելցուկ, հեզությամբ ընդունե՛ք ձեր մեջ սերմանված խոսքը, որը կարող է փրկել ձեր հոգիները։

22Եղե՛ք խոսքը կատարողներ և ոչ միայն լսողներ՝ ինքներդ ձեզ խաբելով։

23Որովհետև եթե մեկը լսում է խոսքը և չի կատարում, նա նման է մի մարդու, որ հայելու մեջ դիտում է իր բնական դեմքը.

24դիտում է իրեն, հեռանում և իսկույն մոռանում, թե ինչպիսին էր։

25Իսկ ով ուշադիր նայի ազատության կատարյալ օրենքին և հարատևի դրանում՝ լինելով ոչ թե մոռացկոտ լսող, այլ գործադիր կատարող, նա երանելի կլինի իր գործի մեջ։

26Եթե մեկն իրեն բարեպաշտ է համարում, բայց չի սանձահարում իր լեզուն, այլ խաբում է իր սիրտը, ապա նրա բարեպաշտությունն անօգուտ է։

27Մաքուր և անարատ բարեպաշտությունն Աստծու և Հոր առաջ սա է. խնամել որբերին ու այրիներին նրանց նեղության մեջ և անարատ պահել անձն աշխարհից։