James 1

1የእግዚአብሔርና የጌታ የኢየሱስ ክርስቶስ ባሪያ ያዕቆብ፤ በስደት ለተበተኑት ለአሥራ ሁለቱ ነገዶች፤ ሰላም ለእናንተ ይሁን።

2ወንድሞቼ ሆይ፥ ልዩ ልዩ ፈተና ሲደርስባችሁ እንደ ሙሉ ደስታ ቍጠሩት፤

3የእምነታችሁ መፈተን ትዕግሥትን እንደሚያስገኝ ታውቃላችሁና።

4ምንም የሚጎድላችሁ ሳይኖር ፍጹማንና ሙሉ ትሆኑ ዘንድ ትዕግሥት ሥራውን ይፈጽም።

5ከእናንተ ማንም ጥበብ ቢጎድለው ሳይነቅፍ በልግስና ለሁሉ የሚሰጠውን እግዚአብሔርን ይለምን፥ ለእርሱም ይሰጠዋል።

6ነገር ግን በምንም ሳይጠራጠር በእምነት ይለምን፤ የሚጠራጠር በነፋስ እንደሚገፋና እንደሚናወጥ እንደ ባሕር ማዕበል ነውና።

7ያ ሰው ከጌታ ዘንድ አንዳች እንዳያገኝ አይጠብቅ፤

8ሁለት አሳብ ያለው ሰው በመንገዱ ሁሉ ጸንቶ አይቆምም።

9የተዋረደው ወንድም በከፍታው ይመካ፤

10ባለጸጋውም በመዋረዱ ይመካ፥ እንደ ሣር አበባ ያልፋልና።

11ፀሐይ ከሚያቃጥል ሙቀት ጋር ይወጣልና፥ ሣሩንም ያደርቃል፥ አበባውም ይረግፋል፥ የፊቱም ውበት ይጠፋል፤ እንዲሁም ባለጸጋው ደግሞ በመንገዱ ሁሉ ይጠወልጋል።

12በፈተና የሚጸና ሰው የተባረከ ነው፤ ከተፈተነ በኋላ እርሱን ለሚወዱት እግዚአብሔር የሰጠውን የተስፋውን የሕይወትን አክሊል ይቀበላልና።

13ማንም ሲፈተን፦ «በእግዚአብሔር እፈተናለሁ» አይበል፤ እግዚአብሔር በክፉ አይፈተንምና፥ እርሱ ራሱም ማንንም አይፈትንም።

14ነገር ግን እያንዳንዱ በራሱ ክፉ ምኞት ሲሳብና ሲታለል ይፈተናል።

15ከዚህ በኋላ ምኞት ፀንሳ ኃጢአትን ትወልዳለች፤ ኃጢአትም ካደገች በኋላ ሞትን ትወልዳለች።

16የተወደዳችሁ ወንድሞቼ ሆይ፥ አትሳቱ።

17በጎ ስጦታ ሁሉ ፍጹምም በረከት ሁሉ ከላይ ናቸው፥ መለወጥም በእርሱ ዘንድ ከቶ የሌለ የመዞርም ጥላ የሌለበት ከብርሃናት አባት ይወርዳሉ።

18ለፍጥረቱ የበኵራት ዓይነት እንድንሆን በእውነት ቃል በገዛ ፈቃዱ ወለደን።

19የተወደዳችሁ ወንድሞቼ ሆይ፥ ይህን እወቁ፤ ሰው ሁሉ ለመስማት የፈጠነ፥ ለመናገር የዘገየ፥ ለቍጣም የዘገየ ይሁን፤

20የሰው ቍጣ የእግዚአብሔርን ጽድቅ አይፈጽምምና።

21ስለዚህ ርኵሰትን ሁሉ የክፋትንም ትርፍ አስወግዳችሁ፥ ነፍሳችሁን ማዳን የሚችለውን በውስጣችሁ የተተከለውን ቃል በየዋህነት ተቀበሉ።

22ቃሉን የምታደርጉ ሁኑ እንጂ ራሳችሁን እያታለላችሁ ሰሚዎች ብቻ አትሁኑ።

23ቃሉን የሚሰማ የማያደርገውም ቢኖር የተፈጥሮ ፊቱን በመስተዋት የሚያይን ሰው ይመስላልና፤

24ራሱን ተመልክቶ ይሄዳልና፥ ወዲያውም ምን እንደሚመስል ይረሳል።

25ነገር ግን ነጻ የሚያወጣውን ፍጹሙን ሕግ በትኵረት ተመልክቶ የሚጸናበት፥ ሰምቶ የሚረሳ ሳይሆን በተግባር የሚፈጽም፥ እርሱ በሚያደርገው ሁሉ የተባረከ ይሆናል።

26አንደበቱን ሳይገታ ልቡን እያሳተ ሃይማኖተኛ ነኝ ብሎ የሚያስብ ማንም ቢኖር፥ የእርሱ ሃይማኖት ከንቱ ነው።

27በአምላካችንና በአባታችን ፊት ንጹሕና ነውር የሌለበት ሃይማኖት ይህ ነው፤ ወላጅ አልባዎችንና መበለቶችን በመከራቸው መጠየቅ፥ ራስንም ከዓለም ርኵሰት መጠበቅ ነው።