Hebrews 13

1ورورګلوۍ مينه دې تل وساتئ.

2د پرديو مېلمستيا مه هېروئ، ځکه په دې توګه ځينو بې‌خبره د فرښتو مېلمستيا کړې ده.

3بنديان داسې ياد لرئ لکه خپله چې ورسره په بند کې يئ، او کړېدونکي داسې لکه خپله چې کړاو ګالئ.

4واده دې د ټولو په نزد محترم وي او بستر دې ناپاکه نه وي، ځکه چې خدای به په زناکارانو او بدلمنو باندې قضاوت وکړي.

5ژوند مو د پيسو له مينې پاک وساتئ او په هغه څه چې لرئ قناعت وکړئ، ځکه چې خدای فرمايلي دي: «زه به هېڅکله تا پرېنږدم، او هېڅکله به تا يوازې پرېنږدم.»

6نو په پوره ډاډ سره وايو: «مالِک زما مرستندوی دی، زه به ونه وېرېږم؛ انسان ماته څه کولی شي؟»

7خپل مشران ياد لرئ چې تاسو ته يې د خدای کلام واوراوه؛ د هغوئ د ژوند پايښت ته وګورئ او د هغوئ د ايمان پيروي وکړئ.

8عيسىٰ مسيح پرون او نن او تر ابده هماغه يو دی.

9په بېلابېلو او پرديو تعليمونو پسې مه بې‌لارې کېږئ، ځکه چې غوره دا ده چې زړه په فضل سره پياوړی شي، نه په هغو خوراکونو چې هغو ته چې پر هغوئ روان دي هېڅ ګټه نه رسوي.

10موږ يوه قربانګاه لرو چې په خېمه کې خدمت کوونکي د هغې څخه د خوړلو حق نه لري.

11که څه هم لوی کاهن د څارويو وينه د ګناه د قربانۍ لپاره تر ټولو مقدس ځای ته وړي، خو د هغوئ جسدونه د کېمپ څخه بهر سوځول کېږي.

12نو په دې سبب، عيسىٰ هم د ښار له دروازې بهر تکليف وګالۀ، ترڅو قوم په خپلې وينې سره مقدس کړي.

13راځئ چې د کېمپ نه بهر هغه ته ورشو او د هغه پېغور او رسوايي په ځان ومنو.

14ځکه چې دلته زموږ هېڅ پاتېدونکی ښار نشته، بلکې موږ د هغه ښار په لټه کې يو چې راتلونکی دی.

15نو راځئ چې د عيسىٰ په وسيله تل خدای ته د ستاينې قرباني وړاندې کړو، يعنې د هغو شونډو مېوه چې د هغه د نوم اقرار کوي.

16او د نېکۍ کولو او له نورو سره د شريکولو څخه غفلت مه کوئ، ځکه چې خدای په دا ډول قربانيو خوشحاليږي.

17د خپلو مشرانو اطاعت وکړئ او هغوی ته غاړه کېږدئ، ځکه هغوی د ستاسو د روحونو څارنه د هغو کسانو په څېر کوي چې بايد حساب ورکړي. پرېږدئ چې هغوی دا کار په خوشحالۍ سره وکړي، نه په غم او افسوس سره، ځکه چې دا به تاسو ته هېڅ ګټه ونه رسوي.

18زمونږ لپاره دعا وکړئ؛ ځکه چې مونږ باور لرو چې زمونږ وجدان پاک دی او هيله لرو چې په هر څه کې شرافتمندانه ژوند وکړو.

19او زه په ځانګړي ډول له تاسو غوښتنه کوم چې دعا وکړئ ترڅو زه ډېر ژر بېرته تاسو ته درشم.

20اوس دې د سولې خدای، چې زمونږ څښتن عیسیٰ، د پسونو هغه لوی شپونکی، د ابدي لوظ د وينې په وسيله د مړو څخه بېرته راژوندی کړ،

21تاسو په هر نېک کار سمبال کړي ترڅو د هغه رضا پوره کړئ. او هغه څه چې د هغه په حضور کې خوښ وي، د عیسیٰ مسيح په وسيله په مونږ کې سرته ورسوي، چې هغه لره دې تل تر تله جلال وي. آمين.

22ای ورونو، زه له تاسو غوښتنه کوم چې زما دا نصيحت وزغمئ، ځکه چې ما تاسو ته يوازې په لنډه توګه ليکلي دي.

23خبر شئ چې زمونږ ورور تيموتي خلاص شوی دی. که هغه ژر راشي، نو زه به د هغه سره يوځای تاسو ليدو ته درشم.

24خپلو ټولو مشرانو او ټولو مقدسينو ته سلام ووايئ. د ايټاليې خلک تاسو ته سلام وايي.

25فضل دې ستاسو ټولو سره وي.