Hebrews 13

1Братољубието нека пребива меѓу вас.

2Гостољубивоста не заборавајте ја, зашто преку неа некои, и без да знаат, угостија ангели.

3Сеќавајте се на затворениците, како да сте оковани со нив, и на оние што страдаат, како и самите вие да страдате со нив.

4Бракот нека биде на чест кај сите и брачното легло неосквернето, зашто на блудниците и на прељубниците Бог ќе им суди.

5Животот нека ви биде без среброљубие и бидете задоволни со она што го имате, зашто Бог рекол: „Никогаш нема да те оставам, ниту некогаш ќе те напуштам.“

6Така што со доверба велиме: „Господ е мој помошник; нема да се плашам. Што може да ми направи човек?“

7Сеќавајте се на вашите водачи кои ви го проповедаа словото Божјо; набљудувајќи го исходот од нивниот живот, подражавајте ја нивната вера.

8Исус Христос е истиот вчера, и денес, и довека.

9Не занесувајте се со секакви туѓи учења, зашто добро е срцето да се зацврстува со благодат, а не со јадења од кои немаа полза оние што им се предадоа.

10Ние имаме жртвеник од кој немаат право да јадат оние што служат во скинијата.

11Иако првосвештеникот ја внесува крвта од животните во Светилиштето како жртва за грев, нивните тела се спалуваат надвор од логорот.

12Затоа и Исус, за да го освети народот со Својата сопствена крв, пострада надвор од градската порта.

13Затоа да излеземе кај Него надвор од логорот, носејќи го Неговиот срам.

14Зашто овде немаме постојан град, туку го бараме идниот град.

15И така, преку Исус постојано да Му принесуваме на Бога пофална жртва, односно плод од усните што Го исповедаат Неговото име.

16И не заборавајте да правите добро и да споделувате со другите, зашто со такви жртви Бог се благоволува.

17Покорувајте им се на своите водачи и потчинувајте им се, зашто тие бдеат над вашите души како оние што мора да дадат сметка. Затоа, дозволете им да раководат со радост, а не со тага, зашто тоа не би ви било од никаква полза.

18Молете се за нас; уверени сме дека имаме чиста совест и копнееме во сѐ да живееме чесно.

19И особено ве преколнувам да се молите за поскоро да ви бидам вратен.

20А Бог на мирот, Кој преку крвта на вечниот завет Го изведе од мртвите нашиот Господ Исус, големиот Пастир на овците,

21да ве опреми со секое добро за да ја вршите Неговата волја. И нека Тој изврши во нас што е угодно пред Неговото лице преку Исус Христос, Кому нека Му е слава во вечни векови. Амин.

22Ве молам, браќа, поднесете го ова мое слово на поука, зашто накусо ви напишав.

23Знајте дека нашиот брат Тимотеј е ослободен. Ако пристигне наскоро, ќе дојдам со него да ве видам.

24Поздравете ги сите ваши водачи и сите светии. Ве поздравуваат оние од Италија.

25Благодатта нека биде со сите вас.