Hebrews 13

1Бир туугандык сүйүүңөр улана берсин.

2Меймандостукту унутпагыла, анткени ошонун аркасында кээ бирөөлөр өздөрү билбей эле периштелерди коноктошкон.

3Камактагыларды өздөрүңөр алар менен бирге камалгандай, ал эми кордук көргөндөрдү өздөрүңөр денеңерде азап чеккендей эстегиле.

4Нике бардыгы тарабынан урматталсын жана нике төшөгү булганбасын, анткени бузуктук кылгандар менен ойноштук кылгандарды Кудай соттойт.

5Өмүрүңөр акчакорлуктан алыс болсун, колуңарда болгон нерсеге ыраазы болгула, анткени Кудай Өзү: «Сени эч качан калтырбайм, эч качан таштабайм», – деп айткан.

6Ошондуктан биз ишенимдүү түрдө: «Теңир – менин Жардамчым, мен коркпойм. Адам мага эмне кыла алат?» – деп айтабыз.

7Силерге Кудайдын сөзүн айткан жетекчилериңерди эстегиле. Алардын жашоосунун акырына карап, ишенимдерин туурагыла.

8Ыйса Машаяк кечээ да, бүгүн да, түбөлүккө да ошол бойдон.

9Ар кандай бөтөн окууларга азгырылбагыла, анткени жүрөктүн аларга берилгендерге эч бир пайдасы жок тамак-аш менен эмес, ырайым менен бекемделгени жакшы.

10Бизде чатырда кызмат кылгандар андан жегенге укугу жок болгон курмандык чалынуучу жай бар.

11Башкы ыйык кызмат кылуучу жаныбарлардын канын күнөө үчүн курмандык катары Ыйык Жайга алып кирсе да, алардын денелери стандын сыртында өрттөлөт.

12Ошондуктан Ыйса да элди Өзүнүн каны менен ыйыктоо үчүн шаар дарбазасынын сыртында азап тартты.

13Андыктан келгиле, Анын көргөн кордугун көтөрүп, стандын сыртына, Анын Өзүнө баралы.

14Анткени бул жерде биздин туруктуу шаарыбыз жок, биз келечектеги шаарды издеп жатабыз.

15Ошондуктан келгиле, Ыйса аркылуу Кудайга дайыма даңктоо курмандыгын – Анын ысымын даңазалаган ооздордун жемишин тартуу кылалы.

16Жакшылык кылууну жана башкалар менен бөлүшүүнү унутпагыла, анткени ушундай курмандыктар Кудайга жагат.

17Жетекчилериңерге тил алып, аларга баш ийгиле, анткени алар силердин жаныңар үчүн жооп бере турган адамдар катары кам көрүшөт. Муну алар кайгырбай, кубаныч менен аткарышы үчүн ушундай кылгыла, анткени алардын кайгыруусу силерге эч пайда алып келбейт.

18Биз үчүн сыйынгыла; анткени биз абийирибиз таза экенине жана бардык нерседе татыктуу жашоону каалаарыбызга ишенебиз.

19Мен силерге эртерээк кайтып барышым үчүн сыйынууңарды өзгөчө өтүнөм.

20Түбөлүк келишимдин каны аркылуу койлордун улуу Койчусу болгон Мырзабыз Ыйсаны өлгөндөрдүн арасынан кайра тирилткен тынчтыктын Кудайы,

21Өз эркин аткаруу үчүн силерди бардык жакшы нерсе менен камсыз кылсын. Ал Ыйса Машайак аркылуу Өз көз алдында жаккан нерсени бизде ишке ашырсын; Ага түбөлүктөн түбөлүккө даңк болсун. Оомийин.

22Бир туугандар, силерден өтүнөм, менин насаат сөзүмө сабырдуулук менен кулак салгыла, анткени мен силерге кыскача гана жаздым.

23Билип койгула, бир тууганыбыз Тиметей боштондукка чыгарылды. Эгерде ал жакында келсе, мен аны менен бирге силерди көргөнү барам.

24Бардык жетекчилериңерге жана бардык ыйыктарга салам айткыла. Италиядагылар силерге салам жолдошот.

25Баарыңарга ырайым болсун.