Hebrews 13

1Бауырластық сүйіспеншілікті сақтай беріңдер.

2Қонақжайлылық көрсетуді ұмытпаңдар, өйткені осылай істеп, кейбіреулер білместен періштелерді қонақ еткен.

3Түрмеде отырғандарды олармен бірге бұғауланғандай, ал жәбір көргендерді олармен бірге азап шегіп жүргендей естеріңде сақтаңдар.

4Неке баршаға құрметті, ал неке төсегі арамдалмаған болсын, өйткені азғындар мен неке бұзушыларды Құдай соттайды.

5Өмірлерің дүниеқұмарлықтан ада болсын және қолда барға қанағат етіңдер, өйткені Құдай: «Сені ешқашан қалдырмаймын, Сені ешқашан тастамаймын», — деген.

6Сондықтан біз батылдықпен: «Жаратушы Ие — менің көмекшім; мен қорықпаймын. Маған адам не істей алар?» — дейміз.

7Сендерге Құдай сөзін жеткізген жетекшілеріңді еске алыңдар. Олардың өмір жолының нәтижесіне көз салып, сенімдеріне еліктеңдер.

8Иса Мәсіх кеше де, бүгін де және мәңгі бақи да сол қалпында.

9Әртүрлі жат ілімдерге елігіп кетпеңдер, өйткені жүректің соған берілгендерге еш пайдасы жоқ тағамдармен емес, рақыммен нығайғаны игі.

10Бізде киелі шатырда қызмет ететіндердің одан жеуге құқығы жоқ құрбандық үстелі бар.

11Бас діни қызметкер жануарлардың қанын күнә үшін құрбандық ретінде Қасиетті орынға кіргізгенімен, олардың денелері қосынның сыртында өртеледі.

12Сол себепті Иса да Өз қаны арқылы халықты киелі ету үшін қала қақпасының сыртында азап шекті.

13Ендеше, Оның көрген масқарасын арқалап, қосыннан тыс Оған барайық.

14Өйткені бұл жерде біздің тұрақты қаламыз жоқ, бірақ біз келешектегі қаланы іздейміз.

15Сондықтан Иса арқылы Құдайға Оның есімін мойындайтын ерін жемісін — мадақтау құрбандығын үздіксіз ұсынайық.

16Жақсылық жасауды және өзгелермен бөлісуді ұмытпаңдар, өйткені Құдай осындай құрбандықтарға разы болады.

17Басшыларыңызға бағынып, оларға мойынсұныңдар, өйткені олар есеп беретін жандар ретінде сендердің жандарыңды күзетеді. Олар осыны қайғырып емес, қуанышпен атқарсын, әйтпесе бұдан сендерге еш пайда болмайды.

18Біз үшін дұға етіңдер; ар-ұжданымыздың таза екеніне сенімдіміз әрі барлық жағынан абыройлы өмір сүруге талпынамыз.

19Араларыңа тезірек қайта оралуым үшін дұға етулеріңізді әсіресе өтінемін.

20Мәңгілік келісімнің қаны арқылы қойлардың ұлы Бағушысы — Иеміз Исаны өлілерден қайта тірілткен тыныштық Құдайы,

21Өз еркін орындауларың үшін сендерді барлық игілікпен кемелдендірсін. Әрі Иса Мәсіх арқылы Өз алдындағы ұнамды нәрсені біздерде Ол жүзеге асырсын; Оған мәңгіден мәңгіге даңқ болсын. Аумин.

22Бауырлар, осы өсиет сөзіме төзімділікпен қарауларыңызды өтінемін, өйткені сендерге қысқаша ғана жаздым.

23Бауырымыз Тімотенің босатылғанын біліп қойыңдар. Егер ол жақын арада келсе, онымен бірге сендерді көруге барамын.

24Барлық басшыларыңызға және барлық қасиеттілерге сәлем айтыңдар. Сендерге Италиядан болғандар сәлем жолдайды.

25Баршаңызға рақым болсын.