Hebrews 13

1ძმათმოყვარეობა ეგოს თქვენ შორის.

2ნუ დაივიწყებთ სტუმართმოყვარეობას, ვინაიდან მისით ზოგიერთებმა ისე, რომ არც იცოდნენ, ანგელოზებს უმასპინძლეს.

3გახსოვდეთ პატიმრები, თითქოს მათთან ერთად იყოთ შეკრულნი, და შევიწროებულნი, თითქოს თავადაც იტანჯებოდეთ მათთან ერთად.

4პატიოსანი იყოს ქორწინება ყველას მიერ და სარეცელი — შეუბილწავი, რადგან მეძავებსა და მემრუშეებს ღმერთი განსჯის.

5ვერცხლისმოყვარეობის გარეშე იყოს თქვენი ცხოვრება და დასჯერდით იმას, რაც გაქვთ, ვინაიდან ღმერთმა თქვა: „არ მიგატოვებ და არ დაგაგდებ“.

6ამიტომ თამამად ვამბობთ: „უფალია ჩემი შემწე, არ შემეშინდება; რას მიზამს მე ადამიანი?“

7გაიხსენეთ თქვენი წინამძღოლები, რომელნიც გიქადაგებდნენ ღვთის სიტყვას; დაუკვირდით მათი ცხოვრების აღსასრულს და მიჰბაძეთ მათ რწმენას.

8იესო ქრისტე იგივეა გუშინ, დღეს და უკუნისამდე.

9ნუ აჰყვებით ყოველგვარ უცხო მოძღვრებას, რადგან კარგია მადლით გამტკიცდეს გული და არა საზრდელით, რომლისგანაც არავითარი სარგებელი არ ჰქონიათ მათ, ვინც მას მისდევდა.

10ჩვენ გვაქვს სამსხვერპლო, რომლიდანაც ჭამის უფლება არა აქვთ კარავში მსახურთ.

11ვინაიდან ცხოველთა სისხლი მღვდელმთავარს შეაქვს წმიდა ადგილას ცოდვის მსხვერპლად, ხოლო მათი სხეულები ბანაკის გარეთ იწვება.

12ამიტომ იესომაც, რათა თავისი სისხლით განეწმიდა ხალხი, ქალაქის კარიბჭის გარეთ ივნო.

13მაშ, გავიდეთ მასთან ბანაკის გარეთ და ვატაროთ მისი ყვედრება.

14ვინაიდან აქ არ გვაქვს მუდმივი ქალაქი, არამედ მომავალს ვეძებთ.

15მაშ, იესოს მეშვეობით მუდამ შევწიროთ ღმერთს ქების მსხვერპლი, ანუ მისი სახელის აღმსარებელი ბაგეთა ნაყოფი.

16ხოლო ქველისმოქმედებას და თანაზიარობას ნუ დაივიწყებთ, რადგან ასეთი მსხვერპლი სათნოა ღვთისთვის.

17დაემორჩილეთ თქვენს წინამძღოლებს და დამორჩილდით მათ, რადგან ისინი ფხიზლობენ თქვენი სულებისთვის, როგორც ანგარიშვალდებულნი. რათა სიხარულით უძღვებოდნენ და არა მწუხარებით, რადგან ეს უსარგებლო იქნებოდა თქვენთვის.

18ილოცეთ ჩვენთვის; დარწმუნებულნი ვართ, რომ სუფთა სინდისი გვაქვს და ყოველმხრივ ღირსეულად ცხოვრება გვსურს.

19ხოლო განსაკუთრებით შეგაგონებთ ილოცოთ, რათა მალე დაგიბრუნდეთ.

20ხოლო მშვიდობის ღმერთმა, რომელმაც საუკუნო აღთქმის სისხლით მკვდრეთით აღადგინა ჩვენი უფალი იესო, ცხვართა დიდი მწყემსი,

21სრულგყოთ ყოველი სიკეთით მისი ნების აღსასრულებლად და აღასრულოს ჩვენში ის, რაც სათნოა მის თვალში, იესო ქრისტეს მეშვეობით, რომელსაც ეკუთვნის დიდება უკუნითი უკუნისამდე. ამინ.

22შეგაგონებთ თქვენ, ძმებო, შეიწყნაროთ ეს შეგონების სიტყვა, რადგან მხოლოდ მოკლედ მოგწერეთ.

23იცოდეთ, რომ გათავისუფლდა ჩვენი ძმა ტიმოთე. თუ იგი მალე მოვა, მასთან ერთად გინახულებთ.

24მოიკითხეთ ყველა თქვენი წინამძღოლი და ყველა წმიდანი. მოგიკითხავენ იტალიელები.

25მადლი იყოს ყველა თქვენგანთან.