Hebrews 13

1Եղբայրասիրությունը թող հարատև մնա ձեր մեջ:

2Մի՛ անտեսեք հյուրասիրությունը օտարների հանդեպ, քանզի այդպիսով ոմանք, առանց իմանալու, հրեշտակներ հյուրընկալեցին:

3Հիշեցե՛ք բանտարկյալներին, իբրև թե նրանց հետ կապված լինեիք, և չարչարվողներին, իբրև թե ինքներդ էլ նրանց հետ չարչարվեիք:

4Ամուսնությունը թող պատվական լինի ամենքի կողմից, և ամուսնական անկողինը՝ անարատ, քանզի Աստված պիտի դատի պոռնիկներին ու շնացողներին:

5Ձեր կյանքը թող զերծ լինի արծաթասիրությունից, և բավարարվե՛ք ունեցածով, քանզի Աստված Ինքն ասաց. «Երբե՛ք քեզ չեմ թողնի և ո՛չ մի դեպքում քեզ չեմ լքի»:

6Այնպես որ վստահությամբ ասում ենք. «Տերն է իմ օգնականը, ես չեմ վախենա. մարդն ի՞նչ կարող է անել ինձ»:

7Հիշեցե՛ք ձեր առաջնորդներին, որոնք ձեզ Աստծո խոսքն ավանդեցին. խոկալով նրանց կյանքի վախճանի շուրջ՝ նմանվեցե՛ք նրանց հավատին:

8Հիսուս Քրիստոս նույնն է երեկ, այսօր և հավիտյան:

9Մի՛ տարվեք ամեն տեսակ օտարոտի ուսմունքներով, քանզի լավ է, որ սիրտը շնորհով զորանա, և ոչ թե կերակուրներով, որոնցից ոչ մի օգուտ չստացան դրանց նվիրվածները:

10Մենք ունենք մի սեղան, որից ուտելու իրավունք չունեն խորանին ծառայողները:

11Թեև քահանայապետը կենդանիների արյունը Սրբարան է մտցնում իբրև մեղքի պատարագ, սակայն նրանց մարմիններն այրվում են բանակատեղիից դուրս:

12Ուստի և Հիսուս չարչարվեց քաղաքի դարպասից դուրս, որպեսզի Իր իսկ արյամբ սրբագործի ժողովրդին:

13Ուրեմն դո՛ւրս գանք բանակատեղիից դեպի Նա՝ կրելով այն նախատինքը, որ Նա կրեց:

14Քանզի այստեղ մենք չունենք մնայուն քաղաք, այլ փնտրում ենք գալիք քաղաքը:

15Ուրեմն, Նրա միջոցով ամեն ժամ Աստծուն մատուցենք գովաբանության զոհը, այսինքն՝ Նրա անունը խոստովանող շրթունքների պտուղը:

16Եվ մի՛ անտեսեք բարեգործությունն ու ուրիշների հետ բաժնեկից լինելը, քանզի այդպիսի՛ զոհերն են հաճելի Աստծուն։

17Հնազանդվե՛ք ձեր առաջնորդներին և հպատակվե՛ք նրանց, քանզի նրանք հսկում են ձեր հոգիները՝ իբրև հաշիվ տվողներ։ Թո՛ւյլ տվեք նրանց առաջնորդել ուրախությամբ և ոչ թե տրտմությամբ, քանզի դա ձեզ համար ոչ մի օգուտ չէր բերի։

18Աղոթե՛ք մեզ համար, քանզի վստահ ենք, որ մաքուր խիղճ ունենք և ամեն ինչում ցանկանում ենք պատվով ապրել։

19Եվ առավելապես աղաչում եմ աղոթել, որպեսզի շուտով վերադարձվեմ ձեզ։

20Եվ թող խաղաղության Աստվածը, որ հավիտենական ուխտի արյամբ մեռելներից հետ բերեց մեր Տեր Հիսուսին՝ ոչխարների այդ մեծ Հովվին,

21կատարյալ դարձնի ձեզ ամեն բարիքի մեջ՝ Իր կամքը կատարելու համար, և թող Նա մեր մեջ իրագործի այն, ինչ հաճելի է Իր առաջ՝ Հիսուս Քրիստոսի միջոցով, Ում փա՜ռք հավիտյանս հավիտենից։ Ամեն։

22Աղաչում եմ ձեզ, եղբայրնե՛ր, հանդուրժե՛ք հորդորի այս խոսքը, քանզի համառոտ գրեցի ձեզ։

23Իմացե՛ք, որ մեր եղբայր Տիմոթեոսն ազատ է արձակվել․ եթե նա շուտով գա, նրա հետ միասին կգամ ձեզ տեսնելու։

24Ողջունե՛ք ձեր բոլոր առաջնորդներին և բոլոր սրբերին։ Իտալիայից եղողները ողջույն են հղում ձեզ։

25Շնորհը ձեր բոլորի հետ լինի։