Hebrews 13

1የወንድማማች መዋደድ ይኑር።

2እንግዶችን መቀበልን አትርሱ፤ በዚህ አንዳንዶች ሳያውቁ መላእክትን አስተናግደዋልና።

3ከእነርሱ ጋር እንደ ታሰራችሁ ሆናችሁ የታሰሩትን አስቡ፤ እናንተ ራሳችሁ ደግሞ በሥጋ እንዳላችሁ ሆናችሁ መከራ የሚቀበሉትን አስቡ።

4ጋብቻ በሁሉ ዘንድ ክቡር መኝታውም ንጹሕ ይሁን፤ ሴሰኞችንና አመንዝሮችን ግን እግዚአብሔር ይፈርድባቸዋል።

5ኑሯችሁ ያለ ገንዘብ ፍቅር ይሁን፤ ያላችሁም ይብቃችሁ፤ እርሱ ራሱ፦ «አልተውህም ከቶም አልጥልህም» ብሏልና፤

6ስለዚህ በድፍረት፦ «ጌታ ይረዳኛልና አልፈራም፤ ሰው ምን ያደርገኛል?» እንላለን።

7የእግዚአብሔርን ቃል የነገሯችሁን መሪዎቻችሁን አስቡ፤ የኑሯቸውንም ፍጻሜ እየተመለከታችሁ በእምነታቸው ምሰሏቸው።

8ኢየሱስ ክርስቶስ ትናንትና ዛሬ እስከ ለዘላለምም ያው ነው።

9ልዩ ልዩ በሆነ በእንግዳ ትምህርት አትወሰዱ፤ ልብ በጸጋ ቢጸና መልካም ነው እንጂ በመብል አይደለም፤ በዚህ የሚኖሩባት አልተጠቀሙምና።

10መሠዊያ አለን፥ ከእርሱም ድንኳኒቱን የሚያገለግሉ ሊበሉ መብት የላቸውም።

11ሊቀ ካህናት ስለ ኃጢአት የእንስሳትን ደም ወደ ቅድስት የሚያገባ ሲሆን፥ ሥጋቸው ከሰፈር ውጭ ይቃጠላልና።

12ስለዚህ ኢየሱስ ደግሞ በገዛ ደሙ ሕዝቡን እንዲቀድስ ከበር ውጭ መከራን ተቀበለ።

13እንግዲህ ስድቡን እየተሸከምን ወደ እርሱ ወደ ሰፈር ውጭ እንውጣ፤

14በዚህ የምትኖር ከተማ የለችንምና፥ ነገር ግን የምትመጣውን እንፈልጋለን።

15እንግዲህ በኢየሱስ ሁልጊዜ ለእግዚአብሔር የምስጋናን መሥዋዕት፥ ማለት ለስሙ የሚመሰክሩትን የከንፈሮችን ፍሬ እናቅርብ።

16ነገር ግን መልካም ማድረግን ለሌሎችም ማካፈልን አትርሱ፤ እንዲህ ያለው መሥዋዕት እግዚአብሔርን ደስ ያሰኘዋልና።

17ለዋኖቻችሁ ታዘዙና ተገዙ፤ መልስ እንደሚሰጡ አድርገው ለነፍሳችሁ ይተጋሉና። ይህ ለእናንተ የማይጠቅም ነውና፥ ይህን በኀዘን ሳይሆን በደስታ ያደርጉ ዘንድ ፍቀዱላቸው።

18ጸልዩልን፤ በሁሉ ነገር በክብር ልንኖር እየወደድን በጎ ኅሊና እንዳለን አምነናልና።

19በቶሎ ወደ እናንተ እንድመለስ ይልቁንም እንድትጸልዩ አጥብቄ እለምናችኋለሁ።

20በዘላለም ኪዳን ደም የበጎች ታላቅ እረኛ የሆነውን ጌታችንን ኢየሱስን ከሙታን ያወጣው የሰላም አምላክ፥

21ፈቃዱን ታደርጉ ዘንድ በመልካም ነገር ሁሉ ፍጹማን ያድርጋችሁ፤ በፊቱም ደስ የሚያሰኘውን በኢየሱስ ክርስቶስ በኩል በእኛ ውስጥ ያድርግ፤ ለእርሱ ከዘላለም እስከ ዘላለም ድረስ ክብር ይሁን፤ አሜን።

22ወንድሞች ሆይ፥ በጥቂት ቃላት ጽፌላችኋለሁና የምክሬን ቃል እንድትታገሡ እለምናችኋለሁ።

23ወንድማችን ጢሞቴዎስ እንደ ተፈታ እወቁ፤ ፈጥኖ ቢመጣ ከእርሱ ጋር አያችኋለሁ።

24ለዋኖቻችሁ ሁሉና ለቅዱሳን ሁሉ ሰላምታ አቅርቡ። ከኢጣልያ የሆኑት ሰላምታ ያቀርቡላችኋል።

25ጸጋ ከሁላችሁ ጋር ይሁን።