Galatians 6

1اې ورونو، که چېرې یو څوک په کومه ګناه کې ونښلي، نو تاسو چې روحاني یاست، هغه په نرمۍ او حلم سره سمې لارې ته راولئ. مګر د خپل ځان پام هم کوئ، هسې نه چې تاسو پخپله هم په ازمېښت کې پرېوځئ.

2د یو بل بارونه پورته کړئ، او په دې توګه به تاسو د مسیح شریعت پوره کړئ.

3ځکه که څوک ځان څه شی وګڼي په داسې حال کې چې هیڅ هم نه وي، نو هغه خپل ځان غولوي.

4خو هر یو دې خپل عمل وڅېړي، نو هغه وخت به یوازې په خپل ځان د ویاړ کولو سبب ولري، نه په بل چا.

5ځکه چې هر یو به خپل بار پخپله پورته کوي.

6خو هغه څوک چې د کلام تعلیم مومي، باید په ټولو ښو شیانو کې خپل ښوونکی شریک کړي.

7مه غولېږئ: د خدای سره مسخره نه شي کېدای. ځکه هر هغه څه چې یو انسان کري، هماغه به رېبي.

8څوک چې د خپل جسماني طبیعت لپاره کري، د جسماني طبیعت څخه به بربادي رېبي؛ خو څوک چې د روح لپاره کري، د روح څخه به ابدي ژوند رېبي.

9راځئ چې په نېکۍ کولو کې ستړي نه شو، ځکه که زړه توري نه شو، په خپل وخت به حاصل ورېبو.

10نو تر کومه چې فرصت لرو، راځئ چې له ټولو سره نېکي وکړو، په ځانګړي ډول د ایمان له کورنۍ سره.

11وګورئ چې ما په خپل لاس تاسو ته په څومره لویو تورو لیکلي دي!

12هغه کسان چې غواړي په ظاهري بڼه ځان ښه وښيي، تاسو مجبوره کوي چې سنت شئ. هغوی دا کار یوازې د دې لپاره کوي چې د مسیح د صلیب له کبله ونه ځورول شي.

13ځکه حتی هغه کسان چې سنت شوي دي پخپله هم شریعت نه پالي، خو غواړي چې تاسو سنت شئ ترڅو ستاسو په جسماني حالت وویاړي.

14خو خدای دې نه کړي چې زه زموږ د څښتن عیسی مسیح د صلیب پرته په بل څه وویاړم، چې د هغې په واسطه نړۍ زما لپاره په صلیب شوې ده، او زه نړۍ ته په صلیب شوی یم.

15ځکه چې نه سنت‌والی څه مانا لري او نه بې‌سنتي، بلکې هغه څه چې مهم دي نوی پیداښت دی.

16سلامتي او رحمت دې وي په هغو ټولو چې د دې قاعدې پیروي کوي، ان د خدای په اسرائيلو باندې.

17له دې وروسته دې هیڅوک ماته تکلیف نه رسوي، ځکه چې زه په خپل بدن باندې د عیسیٰ نښې لرم.

18ای وروڼو، زمونږ د څښتن عیسیٰ مسیح فضل دې ستاسو د روح سره وي. آمین.