Galatians 6

1Браќа, ако падне човек во некаков престап, вие, духовните, поправајте го таквиот со дух на кроткост. Но пази се и сам, за да не бидеш и ти искушан.

2Носете ги бремињата еден на друг, и така исполнете го законот Христов.

3Зашто, ако некој мисли дека е нешто, кога не е ништо, самиот себеси се мами.

4Секој нека го испитува сопственото дело, и тогаш ќе има причина за пофалба само во самиот себе, а не во некој друг.

5Зашто секој ќе си го носи своето сопствено бреме.

6А оној што се поучува во словото, нека дели од секое добро со својот поучувач.

7Не лажете се: Бог не дозволува да биде подигруван. Зашто, што ќе посее човекот, тоа и ќе пожнее.

8Оној што сее во своето тело, од телото ќе пожнее погибел; а оној што сее во Духот, од Духот ќе пожнее живот вечен.

9Да не ни дотегнува да правиме добро, зашто во свое време ќе пожнееме, ако не клоснеме.

10И така, додека имаме време, да им правиме добро на сите, а особено на своите по вера.

11Видете со колкави букви ви напишав со својата рака!

12Оние што сакаат да остават добар впечаток однадвор, ве присилуваат да се обрезувате, само за да не бидат прогонувани заради крстот Христов.

13Зашто ни самите оние што се обрезуваат не го пазат законот, туку сакаат вие да се обрезувате, за да се пофалат со вашето тело.

14А мене да не ми даде Бог да се пофалам со друго, освен со крстот на нашиот Господ Исус Христос, преку Кого светот за мене е распнат, и јас за светот.

15Зашто ниту обрезанието, ниту необрезанието значи нешто. Она што важи е новото создание.

16Мир и милост на сите што одат по ова правило, па и на Израелот Божји.

17Отсега натаму никој нека не ми прави тешкотии, зашто јас ги носам на своето тело белезите на Исус.

18Благодатта на нашиот Господ Исус Христос нека биде со вашиот дух, браќа. Амин.