Galatians 6

1Бауырластар, егер біреу байқаусызда бір күнәға ұрынса, Рухқа мойынсұнған сіздер оны жұмсақ рухпен түзеңіздер. Бірақ өзіңізге де абай болыңыз, әйтпесе өзіңіз де азғырылып кетуіңіз мүмкін.

2Бір-біріңіздің ауыртпалықтарыңызды көтеріңіздер, осылайша Мәсіхтің Заңын орындайсыздар.

3Өзі ештеңе болмай тұрып, өзін бірдеңеге санайтын адам өзін-өзі алдайды.

4Әркім өз ісін сынасын. Сонда ол басқа біреудің емес, тек өз ісінің нәтижесімен мақтануға себеп табады.

5Өйткені әркім өз жүгін өзі көтеруге тиіс.

6Дегенмен, Құдай сөзі бойынша тәлім алушы барлық игіліктерді өзіне тәлім берушімен бөлісуге тиіс.

7Алданбаңыздар: Құдайды мазақ ету мүмкін емес. Адам не ексе, соны орады.

8Өз нәпсісіне еккен адам нәпсіден күйреуді орады; ал Рухқа еккен адам Рухтан мәңгілік өмірді орады.

9Жақсылық жасаудан талмайық, өйткені берілмесек, белгіленген уақытта өнімін жинаймыз.

10Сондықтан мүмкіндік бар кезде, барлық адамдарға, әсіресе сенімдегі бауырларымызға игілік жасайық.

11Сіздерге өз қолыммен қандай үлкен әріптермен жазып отырғаныма қараңыздаршы!

12Сырттай жақсы көрінгісі келетіндер сіздерді сүндеттелуге мәжбүрлейді. Олар мұны тек Мәсіхтің айқышы үшін қудаланудан қашу мақсатында ғана істейді.

13Өйткені сүндеттелгендердің өздері де Заңды орындамайды, бірақ сіздердің тәндеріңізбен мақтану үшін сүндеттелулеріңізді қалайды.

14Ал маған келсек, Иеміз Иса Мәсіхтің айқышынан басқа ешнәрсемен мақтану жат болсын; Ол арқылы дүние мен үшін, ал мен дүние үшін айқышқа шегелендім.

15Өйткені сүндеттелудің де, сүндеттелмеудің де еш мәні жоқ; маңыздысы — жаңа Жаратылыс.

16Осы ереже бойынша жүргендердің бәріне, тіпті Құдайдың Исраилына да тыныштық пен мейірім болсын.

17Бұдан былай ешкім маған маза бермесін, өйткені мен өз тәнімде Исаның таңбаларын алып жүрмін.

18Бауырластар, Иеміз Иса Мәсіхтің рақымы сендердің рухтарыңмен бірге болсын. Аумин.