Galatians 6

1Եղբայրնե՛ր, եթե մարդ մի հանցանքի մեջ էլ բռնվի, դուք, որ հոգևոր եք, հեզության հոգո՛վ ուղղեցեք նրան. բայց զգո՛ւյշ եղիր ինքդ քեզ, որպեսզի դու էլ չփորձվես։

2Միմյանց բեռնե՛րը կրեցեք և այդպիսով կատարեցե՛ք Քրիստոսի օրենքը։

3Որովհետև եթե մեկը կարծում է, թե ինքը մի բան է, մինչդեռ ոչինչ է, ինքն իրեն է խաբում։

4Ամեն ոք թող իր սեփական գործը քննի, և այն ժամանակ միայն իր անձով կպարծենա և ոչ թե ուրիշով։

5Որովհետև ամեն ոք իր իսկ բեռն է կրելու։

6Բայց նա, ով խոսքի մեջ է ուսուցանվում, թող ամեն բարիքով բաժնեկից դարձնի իր ուսուցչին։

7Մի՛ խաբվեք. Աստված չի արհամարհվում. որովհետև ինչ որ մարդ սերմանի, նո՛ւյնը և կհնձի։

8Ով սերմանում է իր մարմնի համար, մարմնից ապականություն կհնձի. իսկ ով սերմանում է Հոգու համար, Հոգուց հավիտենական կյանք կհնձի։

9Բարիք գործելուց չձանձրանանք, որովհետև իր ժամանակին կհնձենք, եթե չթուլանանք։

10Ուրեմն, քանի դեռ ժամանակ ունենք, բարի՛ք անենք բոլորին, մանավանդ՝ հավատի ընտանիքին։

11Տեսե՛ք, թե ինչպիսի՜ խոշոր տառերով գրեցի ձեզ իմ իսկ ձեռքով։

12Նրանք, ովքեր ուզում են մարմնապես լավ երևալ, ձեզ ստիպում են թլփատվել միայն նրա համար, որպեսզի Քրիստոսի խաչի պատճառով հալածանք չկրեն։

13Որովհետև թլփատվածներն իրենք իսկ օրենքը չեն պահում, բայց կամենում են, որ դուք թլփատվեք, որպեսզի պարծենան ձեր մարմնով։

14Բայց քա՛վ լիցի, որ ես պարծենամ այլ բանով, քան միայն մեր Տեր Հիսուս Քրիստոսի խաչով, որով աշխարհն ինձ համար խաչված է, և ես՝ աշխարհի համար։

15Քանզի ո՛չ թլփատությունն է որևէ բան նշանակում և ո՛չ անթլփատությունը, այլ կարևորը նոր արարածն է:

16Խաղաղությո՛ւն և ողորմությո՛ւն բոլոր նրանց, ովքեր ընթանում են այս կանոնով, նաև Աստծու Իսրայելին:

17Այսուհետև թող ոչ ոք ինձ նեղություն չպատճառի, քանզի ես իմ մարմնի վրա կրում եմ Հիսուսի նշանները:

18Մեր Տեր Հիսուս Քրիստոսի շնորհը ձեր ոգու հետ լինի, եղբայրնե՛ր: Ամեն: