Galatians 6

1ወንድሞች ሆይ፥ ሰው በማናቸውም በደል ቢገኝ፥ መንፈሳውያን የሆናችሁ እናንተ እንደዚህ ያለውን ሰው በየውሃት መንፈስ አቅኑት፤ አንተ ደግሞ እንዳትፈተን ራስህን ጠብቅ።

2የእርስ በርሳችሁን ሸክም ተሸከሙ፥ እንዲሁም የክርስቶስን ሕግ ፈጽሙ።

3አንዱ ምንም ሳይሆን አንዳች የሆነ ቢመስለው ራሱን ያታልላልና።

4ነገር ግን እያንዳንዱ የገዛ ራሱን ሥራ ይፈትን፥ ከዚያም በኋላ ስለ ሌላው ሰው ሳይሆን ስለ ራሱ ብቻ የሚመካበትን ያገኛል፤

5እያንዳንዱ የገዛ ራሱን ሸክም ሊሸከም ይገባዋልና።

6ነገር ግን ቃሉን የሚማር ከሚያስተምረው ጋር መልካሙን ነገር ሁሉ ይካፈል።

7አትሳቱ፤ እግዚአብሔር አይዘበትበትም። ሰው የሚዘራውን ያንኑ ደግሞ ያጭዳልና፤

8በገዛ ሥጋው የሚዘራ ከሥጋ ጥፋትን ያጭዳልና፥ በመንፈስ ግን የሚዘራው ከመንፈስ የዘላለምን ሕይወት ያጭዳል።

9ባንዝልም በጊዜው እናጭዳለንና መልካም ሥራን ለመሥራት አንታክት።

10እንግዲያስ ጊዜ ካገኘን ዘንድ ለሰው ሁሉ ይልቁንም ለእምነት ቤተ ሰዎች መልካም እናድርግ።

11በገዛ እጄ እንዴት ባሉ ታላላቆች ፊደላት እንደ ጻፍሁላችሁ እዩ።

12በሥጋ መልካም ሆነው ሊታዩ የሚወዱ ሁሉ በግድ እንድትገረዙ ያደርጓችኋል፥ ይህም ስለ ክርስቶስ መስቀል ብቻ እንዳይሰደዱ ነው።

13በሥጋችሁ እንዲመኩ ልትገረዙ ይወዳሉ እንጂ የተገረዙቱ ራሳቸው እንኳ ሕግን አይጠብቁም።

14ነገር ግን ዓለም ለእኔ የተሰቀለበት እኔም ለዓለም የተሰቀልሁበት ከጌታችን ከኢየሱስ ክርስቶስ መስቀል በቀር ሌላ ትምክህት ከእኔ ይራቅ።

15መገረዝ ቢሆን ወይም አለመገረዝ አንዳች አይጠቅምምና፤ የሚጠቅመው ግን አዲስ ፍጥረት መሆን ነው።

16በዚህ ሥርዓት በሚመላለሱ ሁሉ ላይ፣ በእግዚአብሔርም እስራኤል ላይ ሰላምና ምሕረት ይሁን።

17ከእንግዲህ ወዲህ ማንም አያደክመኝ፤ እኔ የኢየሱስን ምልክት በሥጋዬ ተሸክሜአለሁና።

18ወንድሞች ሆይ፥ የጌታችን የኢየሱስ ክርስቶስ ጸጋ ከመንፈሳችሁ ጋር ይሁን። አሜን።