Ephesians 4

1Ǹjẹ́ èmi ẹlẹ́wọ̀n ninu Oluwa ń bẹ̀ yín láti máa rìn ní ọ̀nà tí ó yẹ ìpè tí a ti pè yín:

2pẹ̀lú gbogbo ìrẹ̀lẹ̀ àti ìwà tútù, pẹ̀lú sùúrù, kí ẹ máa fi ìfaradà bá ara yín lò ninu ìfẹ́,

3ẹ sì máa làkàkà láti pa ìṣọ̀kan ti Ẹ̀mí mọ́ ninu ìdè àlàáfíà.

4Ara kan ń bẹ àti Ẹ̀mí kan, gẹ́gẹ́ bí a ti pè yín sínú ìrètí kan nígbà tí a pè yín;

5Oluwa kan, ìgbàgbọ́ kan, ìtẹ̀bọmi kan;

6Ọlọ́run kan àti Baba gbogbo ènìyàn, Ẹni tí ń bẹ lórí gbogbo wọn, tí ó sì ń gbàpasẹ̀ gbogbo wọn, tí ó sì wà ninu gbogbo wọn.

7Ṣùgbọ́n a ti fi oore-ọ̀fẹ́ fún olúkúlùkù wa gẹ́gẹ́ bí ìwọ̀n ẹ̀bùn Kristi.

8Nítorí náà ni ó ṣe wí pé: “Nígbà tí Ó gòkè lọ sí ibi gíga, Ó kó ìgbèkùn ní ìgbèkùn lọ, Ó sì fi ẹ̀bùn fún àwọn ènìyàn.”

9Kí sì ni ìtumọ̀ “Ó gòkè lọ,” bí kò ṣe pé Ó tún ti sọ̀kalẹ̀ lọ sí àwọn apá ìsàlẹ̀ ilẹ̀ ayé pẹ̀lú?

10Ẹni tí ó sọ̀kalẹ̀ náà ni Ẹni tí ó gòkè lọ rékọjá gbogbo àwọn ọ̀run, kí Ó lè kún ohun gbogbo.

11Òun náà sì ni Ó fi àwọn kan láti jẹ́ àpọ́sítélì, àwọn kan láti jẹ́ wòlíì, àwọn kan láti jẹ́ ajíhìnrere, àti àwọn kan láti jẹ́ olùṣọ́-àgùntàn àti olùkọ́,

12láti mú àwọn ènìyàn mímọ́ pé fún iṣẹ́ ìránṣẹ́, fún kíkọ́ ara Kristi ró,

13títí gbogbo wa yóò fi dé ìṣọ̀kan ninu ìgbàgbọ́ àti ninu ìmọ̀ Ọmọ Ọlọ́run, tí a ó fi di ẹni tí ó dàgbà dé kíkún ìwọ̀n gíga Kristi.

14Nígbà náà a kì yóò tún jẹ́ ọmọdé mọ́, tí a ń bì síhìn-ín tí a sì ń bì sọ́hùn-ún nípa gbogbo ẹ̀fúùfù ẹ̀kọ́ àti nípa àrékérekè àwọn ènìyàn ninu ìpètepèrò ẹ̀tàn wọn.

15Dípò èyí, ní sísọ òtítọ́ ninu ìfẹ́, a ó dàgbà ninu ohun gbogbo sí ọ̀dọ̀ Kristi Tìkára Rẹ̀, Ẹni tí í ṣe orí.

16Lati ọdọ Rẹ̀ gbogbo ara, ti a kójọ ti a si so pọ̀ ṣọkan nipa gbogbo oríkèé ti n pèsè ìrànwọ́, gẹ́gẹ́ bí iṣẹ́ olúkúlùkù ẹ̀yà nínú ìwọ̀n tirẹ̀, ń mú kí ara dàgbà sí ìgbéga ara rẹ̀ sókè nínú ìfẹ́.

17Nítorí náà mo sọ èyí, tí mo sì jẹ́rìí nínú Olúwa, pé kí ẹ̀yin má ṣe rìn mọ́ gẹ́gẹ́ bí àwọn Kèfèrí ti ń rìn, nínú asán ti èrò inú wọn.

18Àwọn tí a sọ òye wọn di òkùnkùn, tí a sì yà sọ́tọ̀ kúrò nínú ìyè Ọlọ́run nítorí àìmọ̀kan tí ń bẹ nínú wọn, nítorí líle àyà wọn.

19Níwọ̀n bí wọ́n ti pàdánù gbogbo ìmọ̀-ìtìjú, wọ́n ti fi ara wọn fún wọ̀bìà láti máa fi ojúkòkòrò ṣe gbogbo onírúurú àìmọ́.

20Ṣùgbọ́n ẹ̀yin kò kọ́ Kristi bẹ́ẹ̀.

21Bí ó bá jẹ́ pé ẹ̀yin ti gbọ́ ti Rẹ̀ nítòótọ́, tí a sì ti kọ́ yín nínú Rẹ̀—gẹ́gẹ́ bí òtítọ́ ti ń bẹ nínú Jesu—

22láti bọ́ ìgbé-ayé yín àtijọ́ sílẹ̀, ènìyàn yín àtijọ́, tí ó ti díbàjẹ́ nípa àwọn ìfẹ́kúfẹ̀ẹ́ ẹ̀tàn rẹ̀;

23láti di títun nínú ẹ̀mí ti èrò inú yín;

24àti láti gbé ènìyàn títun wọ̀, tí a dá ní àwòrán Ọlọ́run nínú òdodo àti ìwà mímọ́ tòótọ́.

25Nítorí náà, kí olúkúlùkù yín bọ́ èké sílẹ̀, kí ó sì máa bá aládùúgbò rẹ̀ sọ òtítọ́, nítorí pé ẹ̀yà ara ọmọ-ẹnìkejì ni gbogbo wa jẹ́.

26“Ẹ bínú, ṣùgbọ́n ẹ má ṣe dẹ́ṣẹ̀.” Ẹ má ṣe jẹ́ kí oòrùn wọ̀ bá ìbínú yín,

27bẹ́ẹ̀ ni kí ẹ má ṣe fi àyè sílẹ̀ fún èṣù.

28Ẹni tí ó ti ń jalè kò gbọdọ̀ jalè mọ́, ṣùgbọ́n dípò bẹ́ẹ̀ kí ó ṣiṣẹ́, kí ó fi ọwọ́ ara rẹ̀ ṣe ohun tí ó dára, kí ó lè ní ohun tí yóò pín pẹ̀lú ẹni tí ó wà nínú àìní.

29Kí ọ̀rọ̀ tí kò dára kankan má ṣe jáde lẹ́nu yín, bí kò ṣe irú èyí tí ó dára tí ó sì wúlò fún ìkọ́nilókun ẹni tí ó ṣe aláìní, kí ó lè mú oore-ọ̀fẹ́ wá fún àwọn tí ń gbọ́.

30Ẹ má sì ṣe ba Ẹ̀mí Mímọ́ Ọlọ́run nínú jẹ́, nínú Ẹni tí a ti fi èdìdì sàmì sí yín fún ọjọ́ ìràpadà.

31Ẹ mú gbogbo ìkorò, ìrunú àti ìbínú, ariwo àti ọ̀rọ̀ ẹ̀gàn kúrò, pẹ̀lú gbogbo onírúurú àrankàn.

32Ẹ jẹ́ oníyọ̀ọ́nú àti aláàánú sí ara yín lẹ́nìkíníkejì, kí ẹ máa dárí ji ara yín gẹ́gẹ́ bí Ọlọ́run ti dárí jì yín nínú Kristi.