Ephesians 4

1Како затвореник во Господа, ве молам да живеете достојно за повикот со кој сте повикани:

2со сета смерност и кротост, со трпеливост, поднесувајќи се еден со друг во љубов,

3и грижејќи се ревносно да го зачувате единството на Духот преку врската на мирот.

4Едно тело и еден Дух, како што бевте и повикани кон една надеж кога бевте повикани;

5еден Господ, една вера, едно крштевање;

6еден Бог и Отец на сите, Кој е над сите, преку сите и во сите нас.

7А на секој од нас благодатта му е дадена според мерата на Христовиот дар.

8Затоа се вели: „Кога се вознесе во висините, зароби заробеници и им даде дарови на луѓето.“

9А што значи тоа „Тој се вознесе“, ако не и тоа дека најнапред слезе во најдолните делови на земјата?

10Оној Кој слезе, Самиот е Кој се вознесе над сите небеса, за да исполни сѐ.

11И Тој ги постави едните за апостоли, другите за пророци, третите за евангелисти, а некои за пастири и учители,

12за да ги усоврши светиите за делото на служењето, за изградување на телото Христово,

13додека сите не достигнеме во единството на верата и на познанието на Синот Божји, до степен на зрел маж, до мерата на возраста на Христовата полнота,

14та да не бидеме веќе деца, фрлани од брановите и занесувани од секој ветар на учењата преку човечкото лукавство, во измамничка итрина на заблуди;

15туку, со љубов говорејќи ја вистината, во сѐ да пораснеме во Него, Кој е главата – Христос.

16Од Него целото тело, складно споено и сврзано преку секоја потпорна врска, расте и се изградува себеси во љубов преку дејствувањето на секој поединечен дел.

17Ова ви го велам и настојувам на тоа во Господа: да не одите повеќе онака како што одат незнабошците, во суетата на својот ум.

18Тие се помрачени во својот разум и отуѓени од животот Божји поради незнаењето што е во нив, заради закоравеноста на нивните срца.

19Откако го загубија секое чувство за срам, тие му се предадоа на развратот за да вршат секаква нечистотија со ненаситен копнеж.

20Но вие не Го познавте Христа така.

21Навистина, вие сте слушнале за Него и во Него сте поучени — според вистината што е во Исуса —

22да го соблечете поранешниот начин на живот, вашиот стар човек, кој се распаѓа во измамливите желби;

23да се обновувате во духот на вашиот ум;

24и да се облечете во новиот човек, создаден според Бога во вистинска праведност и светост.

25Затоа, секој од вас нека ја отфрли лагата и нека му зборува вистина на својот ближен, зашто сме членови еден на друг.

26„Гневете се, но не грешете.“ Сонцето да не заојде над вашиот гнев,

27и не давајте му место на ѓаволот.

28Оној што крадел, повеќе да не краде, туку нека се труди вршејќи добро со своите раце, за да има што да подели со оној што е во невола.

29Никаков гнил збор да не излегува од вашите усти, туку само оној што е добар за изградување онаму каде што е потребно, за да им принесе благодат на оние што слушаат.

30И не Го тажете Светиот Дух Божји, со Кого сте запечатени за денот на искупувањето.

31Отстранете од себе секаква горчина, јарост и гнев, викот и хулење, заедно со секој облик на злоба.

32Бидете добри и милосрдни еден кон друг, проштевајќи си еден на друг, токму како што и Бог во Христос ви прости вам.