Ephesians 4

1Сондықтан Иеміз үшін тұтқын болған мен сендерден өздеріңе бұйырған шақыруға лайықты өмір сүрулеріңді өтінемін:

2әрдайым кішіпейілділікпен және биязылықпен, шыдамдылық танытып, біріңе-бірің сүйіспеншілікпен төзімді болыңдар,

3және бейбітшілік байланысы арқылы Рухтың бірлігін сақтауға бар ықыластарыңды салыңдар.

4Сендер бір үмітке шақырылғандарыңдай, Дене бір және Рух та біреу;

5бір Ие, бір сенім, бір шоқыну;

6бәрінен Жоғары, бәрі арқылы және барлығыңның іштеріңде болатын бәрінің жалғыз Құдайы әрі Әкесі бар.

7Ал біздің әрқайсымызға Мәсіх сыйының өлшеміне қарай рақым берілді.

8Сондықтан: «Ол биікке көтерілгенде, Тұтқындарды ертіп әкетті және адамдарға сыйлар берді» делінген.

9Ал «Ол көтерілді» деген сөз Оның алдымен жердің түкпір-түкпіріне төмен түскенін де білдірмей ме?

10Төмен түскен сол Тұлға — бүкіл жаратылысты толтыру үшін барлық аспаннан да жоғары көтерілгеннің Дәл Өзі.

11Әрі кейбіреулерді елші, кейбіреулерді пайғамбар, кейбіреулерді ізгі хабаршы, ал кейбіреулерді бағушы әрі ұстаз етіп тағайындаған да Оның Өзі болды,

12бұл — қасиеттілерді қызмет ету ісіне кемелдендіру және Мәсіхтің денесін тұрғызу үшін,

13біз бәріміз сенім мен Құдай Ұлын танып-білу бірлігіне жетіп, Мәсіхтің толысқан кемел шағының толық өлшеміне дейін өскен кемел адам болғанға дейін.

14Сонда біз енді толқындарға шайқалған, адамдардың қулығы мен алдамшы айла-амалдарына еріп, ілімнің әрбір желімен айдалып жүрген сәбилер болмаймыз,

15керісінше, сүйіспеншілікпен ақиқатты ұстана отырып, барлық жағынан Бас болып табылатын Мәсіхтің Өзіне қарай өсіп жетілеміз.

16Сол арқылы бүкіл дене әрбір байланыстырушы буынмен бекітіліп әрі үйлесе құралып, әрбір мүшенің өз қызметін атқаруымен сүйіспеншілікте өсіп жетіледі.

17Сондықтан мен мынаны айтып, Иеміздің атынан үндеймін: басқа ұлттар сияқты бос ойларының жетегінде бұдан былай өмір сүрмеңіздер.

18Олардың ақыл-санасы түнеріп, жүректерінің тастай қатуы салдарынан болған надандықтың кесірінен Құдай беретін өмірден шеттетілген.

19Олар ұят сезімінен мүлде айырылып, тоймас құмарлықпен әр түрлі арамдықты істеу үшін нәпсіқұмарлыққа берілді.

20Бірақ сіздер Мәсіхті бұлай танып білген жоқсыздар.

21Шынында да сіздер Ол жайында естідіңіздер және Исадағы ақиқатқа сай Оның Өзінен тәлім алдыңыздар —

22бұрынғы өмір салтыңызға тән, алдамшы нәпсілер салдарынан тозып бара жатқан ескі болмыстарыңызды шешіп тастауды;

23ой-саналарыңыздың рухында жаңаруды;

24әрі шынайы әділдік пен қасиеттілікте Құдайға ұқсас жаратылған жаңа болмысты киінуді.

25Сондықтан өтіріктен арылып, әрқайсыңыз жақыныңызға шындықты айтыңыздар, өйткені бәріміз бір-бірімізге мүшеміз.

26«Ашулансаңдар да, күнә жасамаңдар». Ашуларыңызға күн батпасын,

27әрі шайтанға еш орын бермеңіздер.

28Ұрлық жасап жүрген адам бұдан былай ұрлық қылмасын, керісінше, мұқтаж жанмен бөлісетін бірдеңесі болу үшін өз қолымен адал еңбек етіп, игілік жасасын.

29Аузыңыздан ешбір зиянды сөз шықпасын, тек тыңдаушыларға рақым сыйлап, қажетті кезде жігерлендіріп нығайтатын ізгі сөз ғана шықсын.

30Құдайдың Киелі Рухын қайғыртпаңыздар, өйткені төлем төленіп құтқарылатын күнге сіздер Сол Рухпен мөрлендіңіздер.

31Барлық араздықтан, қаһар мен ашу-ызадан, айқай-шу мен жала жабудан, сондай-ақ зұлымдықтың кез келген түрінен арылыңдар.

32Бір-біріңе қайырымды әрі мейірбан болыңдар, Құдай сендерді Мәсіхте кешіргендей, бір-біріңді кешіріңдер.