Ephesians 4

1Արդ, ես՝ Տիրոջ կապյալս, աղաչում եմ ձեզ, որ ընթանաք այն կոչմանն արժանի, որով կանչվեցիք.

2ամենայն խոնարհությամբ և հեզությամբ, համբերատարությամբ, սիրով միմյանց հանդուրժելով,

3և ջանասիրությամբ պահելով Հոգու միությունը խաղաղության կապով:

4Մեկ մարմին և մեկ Հոգի, ինչպես որ մեկ հույսի կանչվեցիք ձեր կոչումով.

5մեկ Տեր, մեկ հավատ, մեկ մկրտություն.

6մեկ Աստված և Հայր բոլորի, որ ամենքի վրա է, ամենքի միջոցով և ամենքի մեջ:

7Բայց մեզանից յուրաքանչյուրին շնորհ տրվեց ըստ Քրիստոսի պարգևի չափի:

8Դրա համար ասում է. «Երբ Նա բարձրացավ բարձունքը, Նա գերեվարեց գերիներին և պարգևներ տվեց մարդկանց»:

9Իսկ «Նա բարձրացավ»-ն ի՞նչ է նշանակում, եթե ոչ այն, որ Նա նաև իջավ երկրի ստորին մասերը:

10Նա, Ով իջավ, Նույն Ինքն է, Ով բարձրացավ բոլոր երկինքներից վեր, որպեսզի լցնի ամեն բան:

11Եվ Նա տվեց ոմանց որպես առաքյալներ, ոմանց որպես մարգարեներ, ոմանց որպես ավետարանիչներ, ոմանց էլ որպես հովիվներ և ուսուցիչներ,

12սրբերին կատարյալ դարձնելու սպասավորության գործերի համար, Քրիստոսի մարմինը շինելու համար,

13մինչև որ մենք ամենքս հասնենք հավատի և Աստծու Որդու ճանաչողության միությանը՝ դառնալով չափահաս մարդ Քրիստոսի կատարյալ հասակի չափով:

14Որպեսզի այլևս մանուկներ չլինենք՝ ալեկոծվող և ուսմունքի ամեն հողմից տարուբերվող մարդկանց ճարպիկ խորամանկությամբ իրենց խաբեբա մոլորության մեջ:

15Այլ, ճշմարտությունն ասելով սիրո մեջ, ամեն ինչում աճենք դեպի Ինքը՝ Քրիստոս, Ով գլուխն է:

16Նրանից է ամբողջ մարմինը, հոդերի սպասավորությամբ միացած ու կապակցված, յուրաքանչյուր անդամի չափավոր գործունեությամբ աճում և կերտվում սիրո մեջ:

17Արդ, այս եմ ասում և վկայում Տիրոջով, որ դուք այլևս չընթանաք այնպես, ինչպես հեթանոսներն են ընթանում՝ իրենց մտքի ունայնությամբ:

18Նրանց միտքը խավարած է, և օտարացած են Աստծո կյանքից՝ իրենց մեջ եղած տգիտության և իրենց սրտերի կարծրության պատճառով:

19Անզգա դարձած՝ նրանք իրենց անձնատուր արեցին անառակությանը՝ անհագությամբ գործելու ամեն տեսակ պղծություն:

20Բայց դուք այդպես չճանաչեցիք Քրիստոսին,

21եթե իսկապես լսեցիք Նրա մասին և Նրանով ուսուցանվեցիք, ինչպես ճշմարտությունն է Հիսուսի մեջ,

22մերկանալ նախկին կենցաղի հին մարդուց, որն ապականվում է խաբեպատիր ցանկություններով,

23նորոգվել ձեր մտքի հոգով

24և հագնել նոր մարդը, որն ստեղծված է ըստ Աստծո՝ ճշմարիտ արդարությամբ և սրբությամբ:

25Ուստի դեն գցելով ստությունը՝ ճշմարտությո՛ւն խոսեք յուրաքանչյուրդ իր մերձավորի հետ, որովհետև մենք միմյանց անդամներ ենք:

26«Բարկացե՛ք, բայց մի՛ մեղանչեք»․ թող արևը չմայրամտի ձեր բարկության վրա,

27և տեղի մի՛ տվեք սատանային:

28Ով գողանում էր, այլևս թող չգողանա, այլ ավելի շուտ թող աշխատի՝ իր ձեռքերով բարիք գործելով, որպեսզի ունենա կարիքավորին տալու բան:

29Ոչ մի տհաճ խոսք թող դուրս չգա ձեր բերանից, այլ միայն այն, ինչ բարի է՝ ըստ կարիքի շինության համար, որպեսզի շնորհ պարգևի լսողներին:

30Եվ մի՛ տրտմեցրեք Աստծո Սուրբ Հոգուն, որով դուք կնքվեցիք փրկության օրվա համար:

31Հեռացրե՛ք ձեզնից ամեն դառնություն, զայրույթ և բարկություն, աղաղակ և չարախոսություն՝ ամեն տեսակ չարության հետ միասին։

32Եղե՛ք բարի և գթասիրտ միմյանց հանդեպ՝ ներելով միմյանց, ինչպես որ Աստված Քրիստոսով ներեց ձեզ։