Ephesians 4

1እንግዲህ እኔ በጌታ እስረኛ የሆንሁ፥ ለተጠራችሁበት መጠራት እንደሚገባ ትመላለሱ ዘንድ እለምናችኋለሁ፤

2በትሕትና ሁሉና በየዋህነት በትዕግሥትም፥ እርስ በርሳችሁ በፍቅር ታገሡ፤

3በሰላም ማሰሪያ የመንፈስን አንድነት ለመጠበቅ ትጉ።

4እንደ ተጠራችሁበት የአንድ ተስፋ መጠራት አንድ አካልና አንድ መንፈስ አለ፤

5አንድ ጌታ፥ አንዲት እምነት፥ አንዲት ጥምቀት፤

6ከሁሉ በላይ የሆነ በሁሉም የሚሠራ በሁሉም የሚኖር አንድ አምላክ የሁሉም አባት አለ።

7ነገር ግን እንደ ክርስቶስ ስጦታ መጠን ለእያንዳንዳችን ጸጋ ተሰጥቷል።

8ስለዚህ፦ «ወደ ላይ በወጣ ጊዜ ምርኮን ማረከ፥ ለሰዎችም ስጦታዎችን ሰጠ» ይላል።

9«ወደ ላይ ወጣ» ማለትስ አስቀድሞ ወደ ምድር ዝቅተኛው ክፍል ደግሞ ወረደ ማለት ካልሆነ ምን ማለት ነው?

10ያ የወረደው ሁሉን ይሞላ ዘንድ ከሰማያት ሁሉ በላይ የወጣው እርሱ ራሱ ነው።

11አንዳንዶቹ ሐዋርያት፥ አንዳንዶቹ ነቢያት፥ አንዳንዶቹ ወንጌልን ሰባኪዎች፥ አንዳንዶቹም እረኞችና አስተማሪዎች እንዲሆኑ የሰጠ እርሱ ነው፤

12ይኸውም ቅዱሳንን ለአገልግሎት ሥራ ለማዘጋጀትና የክርስቶስን አካል ለማነጽ፥

13ሁላችን በእምነትና የእግዚአብሔርን ልጅ በማወቅ ወደሚገኝ አንድነት፥ የክርስቶስም ሙላት ወደሚሆን ወደ ፍጹም ሰው ሙላት መጠን እስክንደርስ ድረስ ነው።

14ከእንግዲህም ወዲህ በሰዎች ተንኰልና ወደ ስሕተት በሚወስድ የተንኰል ዘዴ፥ በትምህርት ነፋስ ሁሉ እየተንገላታንና በሞገድም ወዲያና ወዲህ እየተወዛወዝን ሕፃናት አንሆንም።

15ይልቁንም እውነትን በፍቅር እየተናገርን፥ ራስ ወደሚሆን ወደ እርሱ ወደ ክርስቶስ በነገር ሁሉ እናድጋለን።

16ከእርሱም አካል ሁሉ፥ እጅ በሚያገናኘው ሁሉ እየተጋጠመና እየተያያዘ፥ እያንዳንዱ ብልት በልኩ እንደሚሠራ መጠን፥ አካሉን በፍቅር ራሱን ለመገንባት ያሳድጋል።

17እንግዲህ አሕዛብ በአእምሮአቸው ከንቱነት እንደሚመላለሱ ከእንግዲህ ወዲህ እንዳትመላለሱ እላለሁ በጌታም ሆኜ እመሰክራለሁ።

18እነርሱ በልባቸው ድንዛዜ ምክንያት በውስጣቸው ባለ አለማወቅ የእግዚአብሔር ሕይወት የራቃቸው ሆነው አእምሮአቸው ጨለመ፤

19ድንዙዞችም ሆነው ርኵሰትን ሁሉ በስግብግብነት ለማድረግ ራሳቸውን ለመዳራት አሳልፈው ሰጡ።

20እናንተ ግን ክርስቶስን እንዲህ አልተማራችሁም፤

21በእርግጥ ሰምታችሁታልና፥ እውነትም በኢየሱስ እንዳለ በእርሱ ተምራችኋል፤

22ይኸውም የቀደመውን ኑሮአችሁን አስመልክቶ በአታላይ ምኞት የሚጠፋውን አሮጌውን ሰው እንድታስወግዱ፥

23በአእምሮአችሁም መንፈስ እንድትታደሱ፥

24በእውነተኛ ጽድቅና ቅድስና እንደ እግዚአብሔር ምሳሌ የተፈጠረውን አዲሱን ሰው እንድትለብሱ ነው።

25ስለዚህ ሐሰትን አስወግዳችሁ፥ እርስ በርሳችን ብልቶች ሆነናልና እያንዳንዳችሁ ከባልንጀሮቻችሁ ጋር እውነትን ተነጋገሩ።

26«ተቆጡ፥ ነገር ግን ኃጢአት አትሥሩ»፤ በቁጣችሁ ላይ ፀሐይ አይግባ፥

27ለዲያብሎስም ስፍራ አትስጡት።

28የሚሰርቅ ከእንግዲህ ወዲህ አይስረቅ፥ ነገር ግን ለተቸገረ የሚያካፍለው እንዲኖረው በገዛ እጆቹ መልካምን እያደረገ ይድከም።

29ለሚሰሙትም ጸጋን ይሰጥ ዘንድ እንደሚያስፈልገው ለማነጽ የሚጠቅም መልካም ቃል እንጂ ምንም ክፉ ቃል ከአፋችሁ አይውጣ።

30ለቤዛም ቀን የታተማችሁበትን ቅዱሱን የእግዚአብሔርን መንፈስ አታሳዝኑ።

31መራርነትና ንዴት ቁጣም ጩኸትም ስድብም ከክፋት ሁሉ ጋር ከእናንተ ዘንድ ይወገድ።

32እርስ በርሳችሁም ቸሮችና ርኅሩኆች ሁኑ፥ እግዚአብሔርም ደግሞ በክርስቶስ ይቅር እንዳላችሁ ይቅር ተባባሉ።