Ecclesiastes 4

1Quyosh ostida bo‘layotgan barcha jabr-zulmlarga yana boqdim va ko‘rdim: mana, mazlumlarning ko‘z yoshlari, ularga esa hech bir tasalliberuvchi yo‘q; qudrat zolimlar qo‘lida, ammo bularga hech bir tasalliberuvchi yo‘q.

2Shunda men allaqachon jon taslim qilgan o‘liklarni hali tirik bo‘lgan tiriklardan afzal ko‘rib maqtadim.

3Biroq har ikkisidan ham hali vujudga kelmagan, quyosh ostida qilinayotgan yomonliklarni ko‘rmagan kishi yaxshiroqdir.

4Yana ko‘rdimki, har qanday mehnat va har bir mahorat odamning o‘z o‘rtog‘iga bo‘lgan hasadidan kelib chiqar ekan. Bu ham behudalik va shamol ketidan quvishdir.

5Ahmoq esa qo‘llarini qovushtirib o‘tiradi va o‘z etini o‘zi yeydi.

6Orom ila to‘la bir siqim mehnat va shamol ketidan quvish ila to‘la ikki hovuchdan yaxshiroqdir.

7Quyosh ostida yana bir behudalikni ko‘rdim.

8Bir odam borki, u yolg‘izdir, na o‘g‘li, na birodari bor; uning barcha mehnatining esa oxiri yo‘q, ko‘zlari ham boylikdan to‘ymaydi: «Men kim uchun mehnat qilyapman va jonimni lazzatdan mahrum etyapman?» — deydi. Bu ham behudalik va og‘ir mashaqqatdir.

9Birovdan ko‘ra ikkov bo‘lgan yaxshi, chunki ularning mehnatida yaxshi mukofot bor.

10Chunki biri yiqilsa, uning hamrohi uni turg‘izadi; biroq yiqilganda o‘zini turg‘izuvchi boshqa hech kimi bo‘lmagan yolg‘iz kishiga voy!

11Yana, agar ikkov birga yotsa, isinadi; biroq yolg‘iz kishi qanday isinsin?

12Agar kimdir yolg‘iz kishini yengsa ham, ikkovlashib unga qarshi tura oladilar. Uch qatli ip ham osonlikcha uzilmaydi.

13Nasihat olishni bilmay qolgan keksayu nodon podshodan ko‘ra, kambag‘al, ammo dono o‘smir yaxshiroqdir.

14Chunki u o‘z shohligida qashshoq tug‘ilgan bo‘lsa ham, zindondan chiqib shohlikka yetishdi.

15Quyosh ostida yashab, yurgan barcha tiriklarning o‘sha ikkinchisiga, podshoh o‘rnini egallagan yigitga ergashganini ko‘rdim.

16Ulardan avvalgi barcha xalqning son-sanog‘i yo‘q edi. Biroq hatto keyinroq keladiganlar ham bu vorisni olqishlamaydilar. Bu ham behudalik va shamolni quvishdir.