Ecclesiastes 4

1Мен дагы бурулуп, күн астында жасалып жаткан бардык кысымдарды көрдүм. Кысым көргөндөрдүн көз жашын көрдүм, бирок аларды соорото турган эч ким жок эле; бийлик аларды кысымга алгандардын колунда эле, ал эми аларды соорото турган эч ким жок эле.

2Ошондуктан мен эчак эле өлүп калган өлүктөрдү дагы эле тирүү жүргөн тирүүлөрдөн артык көрүп мактадым.

3Бирок экөөнөн тең али жарык дүйнөгө келе элек, күн астында жасалып жаткан жаман ишти көрө элек адам жакшыраак.

4Мен бардык эмгектин жана ар бир ийгиликтүү иштин адамдын өз жакынына болгон көрө албастыгынан улам келип чыгарын көрдүм. Бул дагы курулай убаракерчилик жана шамалды куугандык.

5Акылсыз колун бооруна алып, өз этин өзү жейт.

6Тынчтык менен толгон бир кочуш эмгек жана шамалды куугандык менен толгон эки кочуштан артык.

7Мен дагы күн астындагы курулай убаракерчиликти көрдүм.

8Бир адам бар, ал жалгыз, анын уулу да, бир тууганы да жок; бирок анын бүткүл эмгегине чек жок, анын көзү байлыкка тойбойт: «Мен ким үчүн эмгектенип, жанымды жакшылыктан кур калтырып жатам?» — дейт ал. Бул да курулай убаракерчилик жана оор түйшүк.

9Жалгыз болгондон көрө, экөө болгон жакшы, анткени алардын эмгегинде жакшы сыйлык бар.

10Анткени бири жыгылса, шериги аны тургузат; бирок жыгылганда аны тургуза турган башка бирөөсү жок жалгыз адам кандай гана байкуш!

11Ошондой эле, эгер экөө чогуу жатса, алар жылынат; ал эми жалгыз адам кантип жылынсын?

12Жалгыз адамды жеңип алышса да, экөө ага каршы тура алат; үч кабатталган жип да оңой менен үзүлбөйт.

13Эскертүүнү кабыл алууну билбей калган кары, бирок акылсыз падышадан көрө, кедей, бирок акылдуу жаш жигит артык.

14Анткени ал өз падышалыгында кедей болуп төрөлсө да, түрмөдөн падышалык такка келди.

15Күн астында жашап, жүргөндөрдүн баары падышанын ордун баскан экинчи уландын артынан ээрчигенин көрдүм.

16Алардын алдында болгон бүткүл элдин чеги жок эле. Бирок андан да кийин келе тургандар мураскорду даңазалашпайт. Бул да куру убаракерчилик жана шамалды куугандык.