Ecclesiastes 4

1እኔም እንደገና ተመለከትሁ፥ ከፀሐይ በታች የሚደረገውን ግፍ ሁሉ አሰብሁ፤ እነሆም፥ የተገፉትን እንባ አየሁ፥ የሚያጽናናቸውም አልነበረም፤ በገፊዎቻቸውም እጅ ኃይል ነበረ፥ የሚያጽናናቸው ግን አልነበረም።

2ስለዚህ አስቀድመው የሞቱትን ሙታን፥ አሁን በሕይወት ካሉት ሕያዋን ይልቅ አመሰገንኋቸው።

3ነገር ግን ከሁለቱም ይልቅ ገና ያልነበረው፥ ከፀሐይ በታች የሚደረገውን ክፉ ነገር ያላየው ይሻላል።

4ድካም ሁሉና የተከናወነ ሥራ ሁሉ በሰውና በባልንጀራው መካከል ካለው ቅናት እንደሚመነጭ አየሁ፤ ይህም ደግሞ ከንቱ ነፋስንም እንደ መከተል ነው።

5ሰነፍ እጆቹን ያጣጥፋል፥ የገዛ ሥጋውንም ይበላል።

6በድካምና ነፋስን በመከተል ከሚገኝ ከሁለት እጅ ሙሉ ይልቅ በዕረፍት የሚገኝ አንድ እጅ ሙሉ ይሻላል።

7ደግሞም ከፀሐይ በታች ከንቱነትን አየሁ።

8አንድ ብቻውን የሆነ ሰው አለ፥ ልጅም ሆነ ወንድም እንኳ የለውም፤ ለድካሙም ሁሉ መጨረሻ የለውም፥ ዓይኖቹም ከሀብቱ አይጠግቡም፤ «እኔ ለማን እደክማለሁ? ነፍሴንስ ከደስታ ለምን አጎድላታለሁ?» ይላል። ይህም ደግሞ ከንቱና አስከፊ ድካም ነው።

9ለድካማቸው መልካም ዋጋ አላቸውና አንድ ብቻ ከመሆን ሁለት መሆን ይሻላል።

10ቢወድቁ አንዱ ባልንጀራውን ያነሣዋልና፤ ነገር ግን ወድቆ የሚያነሣው ሌላ ለሌለው ለአንዱ ወዮለት!

11ደግሞም ሁለት በአንድነት ቢተኙ ይሞቃቸዋል፤ ነገር ግን ብቻውን የሆነ ሰው እንዴት ይሞቀዋል?

12አንዱም ቢጠቃ ሁለቱ ሊቋቋሙት ይችላሉ፤ በሦስት የተገመደም ገመድ ፈጥኖ አይበጠስም።

13ማስጠንቀቂያን መቀበል ከእንግዲህ ወዲህ ከማያውቅ ከአሮጌና ከሰነፍ ንጉሥ ይልቅ ድሃ ግን ጥበበኛ የሆነ ወጣት ይሻላል።

14በመንግሥቱ ምንም ድሃ ሆኖ ቢወለድ፥ ያ ወጣት ከእስር ቤት ወጥቶ ወደ ንግሥና መጥቷልና።

15ከፀሐይ በታች የሚኖሩትንና የሚመላለሱትን ሕያዋን ሁሉ፣ በንጉሡ ፈንታ የተተካውን ይህን ሁለተኛውን ብላቴና እንደ ተከተሉት አየሁ።

16በፊታቸው ለነበሩት ሰዎች ሁሉ ወሰን አልነበረውም፤ ሆኖም ከእነርሱ በኋላ የሚመጡት በተተኪው ደስ አይላቸውም። ይህም ደግሞ ከንቱ ነፋስንም እንደ መከተል ነው።