Colossians 3

1Nítorí náà, bí a bá ti jí yín dìde pẹ̀lú Kristi, ẹ máa wá àwọn nǹkan tí ń bẹ lókè, níbi tí Kristi gbé jókòó sí ní ọwọ́ ọ̀tún Ọlọ́run.

2Ẹ máa ronú sí àwọn nǹkan tí ń bẹ lókè, kì í ṣe sí àwọn nǹkan tí ń bẹ lórí ilẹ̀ ayé.

3Nítorí pé ẹ̀yin ti kú, a sì fi ìyè yín pamọ́ pẹ̀lú Kristi nínú Ọlọ́run.

4Nígbà tí Kristi, ẹni tí í ṣe ìyè yín, yóò bá farahàn, nígbà náà ni ẹ̀yin pẹ̀lú yóò farahàn pẹ̀lú Rẹ̀ nínú ògo.

5Nítorí náà, ẹ pa ẹ̀yà ara yín tí ń bẹ ní ayé run: àgbèrè, èérí, ìfẹ́kúfẹ̀ẹ́, ìfẹ́ búburú, àti ojúkòkòrò, èyí tí í ṣe ìbọ̀rìṣà.

6Nítorí àwọn nǹkan wọ̀nyí ni ìbínú Ọlọ́run fi ń bọ̀ wá sórí àwọn ọmọ àìgbọ́ran.

7Nínú àwọn nǹkan wọ̀nyí ni ẹ̀yin pẹ̀lú ti rìn rí, nígbà tí ẹ̀yin wà láàárín wọn.

8Ṣùgbọ́n nísinsin yìí, ẹ gbọ́dọ̀ mú gbogbo nǹkan wọ̀nyí kúrò pẹ̀lú: ìbínú, ìrunú, àrùkàn, ọ̀rọ̀ ẹ̀gàn, àti ọ̀rọ̀ èérí kúrò lẹ́nu yín.

9Ẹ má ṣe purọ́ fún ara yín, níwọ̀n bí ẹ̀yin ti bọ́ ògbólógbòó ènìyàn sílẹ̀ pẹ̀lú àwọn iṣẹ́ rẹ̀,

10tí ẹ sì ti gbé ènìyàn tuntun wọ̀, èyí tí a ń sọ dọ̀tun nínú ìmọ̀ ní àwòrán Ẹlẹ́dàá rẹ̀.

11Níbi tí kò gbé sí Giriki tàbí Júù, kíkọlà tàbí àìkọlà, aláìgbédè, ara Skitia, ẹrú, tàbí òmìnira, ṣùgbọ́n Kristi ni ohun gbogbo, ó sì wà nínú ohun gbogbo.

12Nítorí náà, gẹ́gẹ́ bí àyànfẹ́ Ọlọ́run, mímọ́ àti olùfẹ́, ẹ gbé ọkàn ìyọ́nú, inú rere, ìrẹ̀lẹ̀, ìwà tútù, àti sùúrù wọ̀.

13Ẹ máa fàyè gba ara yín, kí ẹ sì máa dáríjì ara yín bí ẹnìkan bá ní ẹ̀sùn sí ẹnìkejì. Gẹ́gẹ́ bí Olúwa ti dáríjì yín, bẹ́ẹ̀ ni kí ẹ̀yin pẹ̀lú ṣe.

14Àti lórí gbogbo àwọn nǹkan wọ̀nyí, ẹ gbé ìfẹ́ wọ̀, èyí tí í ṣe ìdè ìrẹ́pọ̀ pípé.

15Kí àlàáfíà Kristi sì máa ṣàkóso nínú ọkàn yín, nítorí sí èyí ni a pè yín nínú ara kan; kí ẹ sì máa dúpẹ́.

16Ẹ jẹ́ kí ọ̀rọ̀ Kristi máa gbé inú yín lọ́pọ̀lọpọ̀ nínú gbogbo ọgbọ́n; ẹ máa kọ́ ara yín, kí ẹ sì máa gba ara yín níyànjú nínú sáàmù, àti orin ìyìn, àti orin ẹ̀mí, ẹ máa kọrin pẹ̀lú oore-ọ̀fẹ́ nínú ọkàn yín sí Ọlọ́run.

17Ohunkóhun tí ẹ̀yin bá sì ń ṣe, ní ọ̀rọ̀ tàbí ní ìṣe, ẹ máa ṣe gbogbo rẹ̀ ní orúkọ Olúwa Jesu, ẹ máa dúpẹ́ lọ́wọ́ Ọlọ́run Baba nípasẹ̀ Rẹ̀.

18Ẹ̀yin aya, ẹ tẹríba fún àwọn ọkọ yín, gẹ́gẹ́ bí ó ti yẹ nínú Olúwa.

19Ẹ̀yin ọkọ, ẹ fẹ́ràn àwọn aya yín, ẹ má sì ṣe korò sí wọn.

20Ẹ̀yin ọmọ, ẹ gbọ́ràn sí àwọn òbí yín lẹ́nu nínú ohun gbogbo, nítorí èyí dára gidigidi lójú Olúwa.

21Ẹ̀yin baba, ẹ má ṣe mú àwọn ọmọ yín bínú, kí ọkàn wọn má bàa rẹ̀wẹ̀sì.

22Ẹ̀yin ẹrú, ẹ gbọ́ràn sí àwọn olúwa yín nípa ti ara lẹ́nu nínú ohun gbogbo, kì í ṣe pẹ̀lú àfiyèsí ojú, bí àwọn tí ń wá bí a ti ń tẹ́ ènìyàn lọ́rùn, ṣùgbọ́n ní òtítọ́ inú, ní ìbẹ̀rù Olúwa.

23Ohunkóhun tí ẹ̀yin bá ń ṣe, ẹ fi gbogbo ẹ̀mí yín ṣe é, bí fún Olúwa, kì í sì í ṣe fún ènìyàn,

24níwọ̀n bí ẹ̀yin ti mọ̀ pé láti ọwọ́ Olúwa ni ẹ̀yin yóò ti gba ogún gẹ́gẹ́ bí èrè yín. Olúwa Kristi ni ẹ̀yin ń sìn.

25Ẹnikẹ́ni tí ó bá sì ṣe àṣemáṣe yóò gba èrè fún àṣemáṣe tí ó ṣe, kò sì sí ojúsàájú.