Colossians 3

1Shunday qilib, Masih bilan birga tirilgan ekansiz, yuqoridagi narsalarga intilingiz, u yerda Masih Xudoning o‘ng tomonida o‘tiribdi.

2Yerdagi narsalar haqida emas, yuqoridagi narsalar to‘g‘risida o‘ylangiz.

3Zotan siz o‘lgansiz va hayotingiz Masih bilan birga Xudoda yashiringandir.

4Hayotingiz bo‘lgan Masih zohir bo‘lganda, siz ham U bilan birga ulug‘vorlikda zohir bo‘lasiz.

5Shunday ekan, vujudingizdagi dunyoviy unsurlarni: zino, nopoklik, shahvat, yomon mayllar va butparastlik bo‘lgan ochko‘zlikni o‘ldiringiz.

6Bular tufayli itoatsizlik o‘g‘illariga Xudoning g‘azabi kelmoqda.

7Oralarida yashagan kezlaringizda, siz ham bir paytlar shu yo‘llardan yurgan edingiz.

8Endi esa bularning barchasini: g‘azab, qahr, yovuzlik, tuhmat va og‘zingizdan chiqadigan behayo so‘zlarni bir chetga surib qo‘yingiz.

9Bir-biringizga yolg‘on gapirmangiz, chunki siz eski odamni uning qilmishlari bilan birga yechib tashladingiz,

10va o‘z Yaratuvchisining surati bo‘yicha, bilimda yangilanib borayotgan yangi odamni kiydingiz.

11Bu yerda na yunon va na yahudiy, na sunnatli va na sunnatsiz, na varvar, na skif, na qul va na ozod bor, balki Masih — hamma narsadir va barchasidadir.

12Shuning uchun, Xudoning tanlaganlari, muqaddaslari va sevimlilari sifatida yuragingizga rahm-shafqat, ezgulik, kamtarlik, muloyimlik va sabr-toqatni kiyingiz.

13Bir-biringizga sabr-bardosh qilingiz va birovdan shikoyatingiz bo‘lsa, bir-biringizni kechiringiz. Rabbimiz sizni qanday kechirgan bo‘lsa, siz ham shunday kechiringiz.

14Bularning barchasi ustidan esa komil birlik rishtasi bo‘lgan sevgini kiyingiz.

15Yuraklaringizda Masihning tinchligi hukm sursin, chunki siz bitta tananing a’zolari sifatida shunga da’vat etilgansiz. Va shukr qiluvchi bo‘lingiz.

16Masihning kalomi butun donoligi bilan dilingizda mo‘l-ko‘l maskan topsin; bir-biringizga ta’lim va o‘git bering, qalbingizda minnatdorchilik ila Xudoga zaburlar, hamdlar va ruhiy qo‘shiqlar kuylang.

17So‘zda bo‘lsin yoki amalda, nimaiki qilsangiz, barchasini U orqali Ota Xudoga shukronalar aytib, Rabbimiz Iso nomi bilan qiling.

18Ey xotinlar, Rab yo‘lida munosib bo‘lganidek, erlaringizga itoat qilinglar.

19Ey erlar, xotinlaringizni sevinglar va ularga nisbatan qo‘pol bo‘lmanglar.

20Ey bolalar, har narsada ota-onangizga bo‘ysuninglar, zero bu Rabga xush keladi.

21Ey otalar, bolalaringiz ruhi tushib ketmasligi uchun ularni darg‘azab qilmanglar.

22Ey qullar, har ishda dunyoviy xojalaringizga itoat etinglar; buni faqat ko‘z oldida, insonlarga xushomad qilish uchun emas, balki sidqidildan, Rabdan qo‘rqqan holda bajaringlar.

23Nimaiki qilsangiz, insonlar uchun emas, balki Rab uchun qilayotgandek butun vujudingiz bilan bajaringlar,

24chunki mukofot o‘laroq merosni Rabdan olishingizni bilasizlar. Sizlar xizmat qilayotgan Zot — Rab Masihdir.

25Nohaqlik qilgan har bir kishi qilgan nohaqligi uchun jazosini oladi va yuzxotirchilik bo‘lmaydi.