Colossians 3

1نو کله چې تاسو د مسيح سره راژوندي کړل شوي يئ، د برنو څيزونو لټون وکړئ، چرته چې مسيح د خدائ په ښي لاس ناست دی.

2خپل زړونه او فکرونه په برنو څيزونو ولګوئ، نه په ځمکنيو څيزونو.

3ځکه چې تاسو مړه شوي يئ او ستاسو ژوند په خدائ کې د مسيح سره پټ دی.

4کله چې مسيح چې زمونږ ژوند دی ښکاره شي، نو تاسو به هم د هغۀ سره په جلال کې راښکاره شئ.

5نو په دې سبب د خپلې ځمکنۍ طبيعت غړي مړه کړئ: حرامکاري، ناپاکي، شهوت، بدې هيلې او لالچ، چې دا بُت پرستي ده.

6ځکه چې د دې ټولو په سبب د نافرمانۍ په زامنو باندې د خدائ غضب راځي.

7تاسو هم يو وخت په دې کې تګ راتګ کاوۀ، کله چې په دوی کې اوسېدئ.

8خو اوس تاسو دا ټول څيزونه له ځانه لرې کړئ: غوسه، قهر، کينه، تور او ستاسو له خولې ناوړه خبرې.

9يو بل ته دروغ مه وائئ، ځکه چې تاسو زوړ انسانيت د هغۀ د ټولو کارونو سره له ځانه وويست،

10او هغه نوی مو اغوستی دی، کوم چې د خپل پيدا کوونکي په شکل د پوره پوهې له پاره نوی کېږي.

11دلته نه يوناني شته او نه يهودي، نه مختون شته او نه نامختون، نه وحشي او نه سکيتي، نه غلام او نه ازاد، بلکې مسيح ټول او په ټولو کې دی.

12نو د خدائ د غوره شوو، سپېڅلو او محبوبو په څېر، د زړۀ سوي، مهربانۍ، عاجزۍ، نرمۍ او زغم جامې واغوندئ.

13يو بل وزغمئ او يو بل ته بښنه وکړئ که چېرې څوک له چا ګيله لري. لکه څنګه چې مسيح تاسو بښلي يئ، تاسو هم همداسې وکړئ.

14او له دې ټولو پورته مينه اختيار کړئ، کومه چې د بشپړ يووالي تړون دی.

15او د مسيح سوله دې ستاسو په زړونو کې حکومت وکړي، چې تاسو په يو بدن کې د هغې له پاره رابلل شوي يئ؛ او شکر ګزاره اوسئ.

16د مسيح کلام دې په پوره پرمانۍ سره په تاسو کښې مېشته وي، چې په پوره حکمت سره يو بل ته تعليم او نصيحت کوئ، او په خپلو زړونو کښې په شکرګزارۍ سره خدای ته زبورونه، حمدونه او روحاني سندرې ووايئ.

17او هر څه چې کوئ، که په خبره وي او که په عمل، ټول د مالک عيسىٰ په نوم کوئ او د هغه په وسيله پلار خدای ته شکر وباسئ.

18اے ښځو، د خپلو مړو تابع اوسئ، لکه څنګه چې په مالِک کښې مناسب دي.

19اے خاوندانو، د خپلو ښځو سره مينه کوئ او د هغوئ سره سختي مه کوئ.

20اے بچو، په هر څه کښې د خپلو مور او پلار تابعداري کوئ، ځکه چې دا کار د مالِک خوښ دی.

21اے پلرونو، خپل بچي په غصه مه راولئ، هسې نه چې هغوئ زړه‌توري شي.

22اے غلامانو، په هر څه کښې د خپلو دنياوي بادارانو تابعداري کوئ، نه يوازې د هغوئ د خوشحاله کولو دپاره کله چې ګوري مو، بلکې د زړه په اخلاص او د مالِک په وېره کښې.

23هر څه چې کوئ، د زړه له کومې يې وکړئ، لکه چې د مالِک دپاره وي او نه د انسانانو دپاره،

24ځکه تاسو پوهېږئ چې د مالِک له خوا به د انعام په توګه د ميراث برخه ومومئ. تاسو د مالِک مسيح خدمت کوئ.

25ځکه څوک چې بد کار کوي هغه ته به د خپل بد بدله ورکړل شي، او هلته هيڅ طرفداري نشته.