Colossians 3

1И така, ако сте воскреснати со Христа, барајте го она што е горе, каде што Христос седи оддесно на Бога.

2Мислете за она што е горе, а не за земното.

3Зашто умревте, и вашиот живот е сокриен со Христа во Бога.

4Кога ќе се јави Христос, Кој е ваш живот, тогаш и вие ќе се јавите со Него во слава.

5Затоа умртвете ги деловите на своето земно тело: блудството, нечистотијата, страста, лошата желба и лакомоста, која е идолопоклонство.

6Поради нив доаѓа гневот Божји врз синовите на непослушноста,

7во кои некогаш и вие одевте, кога живеевте меѓу нив.

8А сега отфрлете го и вие сето тоа: гневот, јароста, злобата, хулењето и срамотните зборови од својата уста.

9Не лажете се еден со друг, бидејќи го соблековте стариот човек заедно со неговите дела,

10и се облековте во новиот, кој се обновува во познанието според ликот на својот Создател,

11каде што нема веќе ни Елин ни Јудеец, обрезан или необрезан, варварин, Скит, роб или слободен, туку сѐ и во сѐ е Христос.

12Затоа, како избраници Божји, свети и возљубени, облечете се во срдечно милосрдие, доброта, смиреност, кротост и трпеливост.

13Подносувајте се еден со друг и проштевајте си ако некој има поплака против некого; како што Господ ви прости вам, така проштевајте и вие.

14А над сето тоа облечете се во љубовта, која е врска на совршенството.

15И мирот Христов нека владее во вашите срца, зашто кон него сте повикани како членови на едно тело; и бидете благодарни.

16Словото Христово изобилно нека се всели во вас, додека со секаква мудрост се поучувате и опоменувате еден друг, пеејќи Му на Бога со благодарност во срцата свои со псалми, химни и духовни песни.

17И сè што правите, со збор или со дело, сè правете во името на Господа Исуса, благодарејќи Му на Бога Отецот преку Него.

18Жени, покорувајте им се на своите мажи, како што доликува во Господа.

19Мажи, љубете ги своите жени и не бидете сурови кон нив.

20Деца, бидете им послушни на своите родители во сè, зашто тоа Му е угодно на Господа.

21Татковци, не дразнете ги своите деца, за да не се обесхрабрат.

22Робови, бидете им послушни во сè на земните господари, не само кога ве гледаат за да им угодите, туку со искрено срце и со страв од Господа.

23Сè што правите, вршете го со сето свое битие, како за Господа, а не за луѓе,

24знаејќи дека од Господа ќе го примите наследството како награда. На Господа Христа Му служите.

25А кој прави неправда, ќе му се врати за неговата неправда, и нема пристрасност.