Colossians 3

1Ошондуктан, эгерде силер Машаяк менен кошо тирилген болсоңор, асмандагыны издегиле, ал жерде Машаяк Кудайдын оң жагында отурат.

2Жердеги жөнүндө эмес, асмандагы жөнүндө ойлонгула.

3Анткени силер өлдүңөр, жана силердин өмүрүңөр Машаяк менен бирге Кудайда жашыруун.

4Силердин өмүрүңөр болгон Машаяк ачылганда, силер да Аны менен бирге даңкта ачыласыңар.

5Ошондуктан жердеги табиятыңардын мүчөлөрүн өлтүргүлө: бузуктукту, арамдыкты, кумарды, жаман каалоолорду жана бурканга табынуучулук болгон ач көздүктү.

6Булар үчүн тил албас уулдардын үстүнө Кудайдын каары келе жатат.

7Силер да бир кезде алардын арасында жашаганыңарда ушул жолдордо жүргөнсүңөр.

8Бирок эми силер булардын баарын: ачууну, каарды, жаман ниетти, жалааны жана оозуңардан чыккан уятсыз сөздөрдү четке каккыла.

9Бири-бириңерге калп айтпагыла, анткени силер эски адамды анын иштери менен кошо чечип салдыңар,

10жана өз Жаратканынын бейнеси боюнча таанып-билүүдө жаңыланып жаткан жаңы адамды кийиндиңер.

11Бул жерде грек да, жүйүт да, сүннөткө отургузулган да, отургузулбаган да, варвар да, скиф да, кул да, эркин адам да жок, бирок Машаяк — баары жана баарында.

12Ошондуктан Кудайдын тандалгандары, ыйыктары жана сүйүктүүлөрү катары ырайымдуу жүрөктү, боорукердикти, момундукту, жооштукту жана чыдамкайлыкты кийингиле.

13Бири-бириңерге көтөрүмдүү болгула, эгер кимдир бирөөнүн башка бирөөгө нааразылыгы болсо, кечиргиле: Теңир силерди кандай кечирген болсо, силер да ошондой кечиргиле.

14Ушулардын баарынын үстүнөн жеткилең бирдиктин байланышы болгон сүйүүнү кийингиле.

15Жүрөгүңөрдө Машаяктын тынчтыгы өкүм сүрсүн, анткени силер бир дененин мүчөлөрү катары ошого чакырылгансыңар. Жана ыраазы болгула.

16Машаяктын сөзү силердин ичиңерде мол жашасын; бардык акылмандык менен бири-бириңерди үйрөтүп жана акыл-насаат айткыла, жүрөгүңөрдө ыраазычылык менен Кудайга забурларды, мактоо ырларын жана рухий ырларды созгула.

17Жана сөз менен болобу же иш менен болобу, эмне кылсаңар да, баарын Мырзабыз Ыйсанын ысымынан кылып, Ал аркылуу Кудай Атага ыраазычылык билдиргиле.

18Аялдар, Мырзабызда кандай жарашса, ошондой күйөөлөрүңөргө баш ийгиле.

19Күйөөлөр, аялдарыңарды сүйгүлө жана аларга катаал мамиле кылбагыла.

20Балдар, ата-энеңердин тилин бардык нерседе алгыла, анткени бул Мырзабызга жагымдуу.

21Аталар, балдарыңардын көңүлү чөкпөшү үчүн, аларды кыжырдантпагыла.

22Кулдар, жердеги кожоюндарыңарга бардык нерседе баш ийгиле, адамдарга жагуу үчүн алардын көз алдында гана эмес, таза жүрөк жана Мырзадан коркуу менен кылгыла.

23Эмне кылсаңар да, адамдар үчүн эмес, Мырзабыз үчүн кылгандай, бүт жан-дилиңер менен жасагыла,

24анткени сыйлык катары Мырзабыздан мурас аларыңарды билесиңер. Силер кызмат кылып жаткан — Мырзабыз Машаяк.

25Адилетсиздик кылган адам өз адилетсиздиги үчүн тиешесин алат, жана бет карамалык жок.