Colossians 3

1Сондықтан, егер сіздер Мәсіхпен бірге қайта тірілген болсаңыздар, Мәсіх Құдайдың оң жағында отырған жоғарыдағы нәрселерге ұмтылыңыздар.

2Жердегіні емес, жоғарыдағы нәрселерді ойлаңыздар.

3Өйткені сіздер өлдіңіздер, енді өмірлеріңіз Мәсіхпен бірге Құдайда жасырулы тұр.

4Сіздердің өмірлеріңіз болған Мәсіх аян болғанда, сіздер де Онымен бірге салтанатты ұлылықта аян боласыздар.

5Сондықтан да жерлік болмыстарыңыздың нышандарын өлтіріңіздер: азғындықты, арамдықты, нәпсіқұмарлықты, зұлым құмарлықты және пұтқа табынушылық болып табылатын ашкөздікті.

6Осылар үшін бойұсынбайтындардың басына Құдайдың қаһары төніп келеді.

7Солардың арасында өмір сүрген кезіңізде сіздер де бір кездері осы жолдармен жүрдіңіздер.

8Бірақ енді осылардың бәрін: ашу-ызаны, қаһарды, зұлымдықты, жала жабуды және ауыздарыңыздан шығатын былапыт сөздерді өздеріңізден аластатыңыздар.

9Бір-біріңізге өтірік айтпаңыздар, себебі өздеріңіздің бұрынғы ескі болмыстарыңызды оның іс-әрекеттерімен бірге шешіп тастадыңыздар,

10әрі өз Жаратушысының бейнесі бойынша таным арқылы жаңарып жатқан жаңа болмысты киіп алдыңыздар.

11Онда грек не яһуди, сүндеттелген не сүндеттелмеген, варвар, скиф, құл не азат адам деген жоқ, қайта Мәсіх — барлығы және барлығының бойында.

12Сондықтан да Құдайдың таңдаулылары, киелі әрі сүйіктілері ретінде өздеріңізді жанашыр жүрекпен, қайырымдылықпен, кішіпейілділікпен, биязылықпен және төзімділікпен киіндіріңіздер.

13Бір-біріңізге көніп, өзара біреуге қандай да бір шағымдарыңыз болса, кешіріңіздер. Жаратқан Ие сіздерді қалай кешірсе, сіздер де солай кешіріңіздер.

14Осы ізгі қасиеттердің бәрінің үстіне кемел бірліктің байланысы болып табылатын сүйіспеншілікті киіңіздер.

15Жүректеріңізде Мәсіхтің тыныштығы билік құрсын, өйткені бір дененің мүшелері ретінде сіздер осыған шақырылғансыздар. Және ризашылық білдіруші болыңыздар.

16Мәсіхтің сөзі араларыңда мол ұяласын: бар даналықпен бір-біріңді үйретіп, өсиет айтыңдар және жүректеріңде Құдайға деген ризашылықпен забур жырларын, мадақ өлеңдерін әрі рухани әндерді шырқаңдар.

17Сөзбен не іспен не істесеңдер де, барлығын Иеміз Исаның атымен орындаңдар, Ол арқылы Әке Құдайға алғыс білдіріңдер.

18Әйелдер, Иеміздің жолына сай күйеулеріңе бағыныңдар.

19Күйеулер, әйелдеріңді сүйіңдер және оларға дөрекі болмаңдар.

20Балалар, ата-аналарыңды барлық жағынан тыңдаңдар, өйткені бұл Иемізге ұнамды.

21Әкелер, балаларыңның салы суға кетпес үшін, олардың ашуын қоздырмаңдар.

22Құлдар, дүниелік қожайындарыңа барлық жағынан бағыныңдар; мұны тек олардың көз алдында ұнау үшін ғана емес, шын жүректен әрі Иемізден қорқып істеңдер.

23Не істесеңдер де, адамдар үшін емес, Иеміз үшін істегендей, бар жан-тәндеріңмен еңбектеніңдер,

24өйткені өз сыйларың ретінде Иемізден мұра алатындарыңды білесіңдер. Сендер Иеміз Мәсіхке қызмет етудесіңдер.

25Әділетсіздік жасаған адам өз қиянаты үшін қарымтасын алады және ешқандай алалаушылық болмайды.